Laip Stori
Nau Famili Bilong Mipela i Stap Wanbel!
STORI BILONG SUMIKO HIRANO
Mi painim pinis nambawan gutpela rot long bihainim, na mi laik bai poroman marit bilong mi tu i bihainim dispela rot. Foti tu yia i mas lus pastaim bilong dispela samting i ken kamap.
MITUPELA man bilong mi i marit long 1951, taim mi gat 21 krismas. Insait long 4-pela yia, mipela i kamapim tupela pikinini man, na mi stap amamas.
Long 1957, bikpela susa bilong mi i tokim mi olsem wanpela misineri bilong ol Witnes Bilong Jehova i save kam lukim em. Maski susa bilong mi i wanpela Budis, em i kirap stadi long Baibel wantaim dispela misineri na em i kirapim mi long mi tu i mas stadi long Baibel. Mi orait long dispela. Long dispela taim mi save go long wanpela misin Talatala, na mi ting olsem long rot bilong dispela stadi bai mi inap kamapim ol bilip kranki bilong ol Witnes Bilong Jehova.
I no longtaim na mi luksave olsem mi no gat bikpela save long Baibel. Mi askim misineri: “Jehova em i husat?” Long misin bilong mi, mi no bin harim dispela nem. Misineri, Daphne Cooke (bihain Pettitt), i soim mi Aisaia 42:8, i tok Jehova em nem bilong God i Gat Olgeta Strong. Daphne i mekim wok long Baibel na bekim olgeta askim bilong mi.
Mi givim ol wankain askim long pasto. Em i tokim mi: “No ken mekim ol askim—dispela em wanpela sin. Bilip tasol.” Maski mi no ting i gat rong long kamapim ol askim, inap 6-pela mun long olgeta Sande long moningtaim, mi save go long lotu bilong mi yet na long apinun mi go long ol miting bilong ol Witnes Bilong Jehova.
Samting Dispela i Mekim Long Marit Bilong Mi
Ol samting mi lainim long Baibel i givim bikpela amamas long mi, na mi kamapim ol dispela samting long man bilong mi, Kazuhiko. Bihain long olgeta stadi na miting, mi save tokim em long ol samting mi bin lainim. Dispela i mekim na bel isi i bin stap namel long mitupela i no stap moa olsem bipo. Em i no laik bai mi kamap wanpela Witnes Bilong Jehova. Tasol mi kisim bikpela amamas long stadi long Baibel, olsem na mi stadi yet na bung wantaim ol Witnes.
Taim mi laik lusim haus long ol apinun i gat miting, mi save redim feiveret kaikai bilong Kazuhiko, tasol em i stat long go long wanpela haus kaikai bilong kisim kaikai. Taim miting i pinis na mi kam bek long haus, em i kros na em i no laik toktok wantaim mi. Bihain long 2-pela o 3-pela de, em i no kros moa, tasol nau em taim bilong mi long go long miting gen.
Long dispela taim, mi kisim sik TB, em wanpela sik i bin kilim i dai sampela long famili bilong man bilong mi. Kazuhiko i wari nogut tru na em i tok, taim mi orait gen, mi ken bihainim laik bilong mi long olgeta samting. Mi tok i gat wanpela samting tasol mi laik mekim. Mi laik go long ol miting i save kamap long olgeta wik. Em i orait long dispela.
Bihain long 6-pela mun, mi orait gen. Insait long dispela haptaim, mi stadi gut long Baibel. Mi wok long painim sampela tok i no stret long ol bilip bilong ol Witnes. Mi ting sapos mi painim wanpela tok i no stret, bai mi no stadi moa. Mi no painim wanpela. Tasol ol bilip kranki bilong Misin Talatala i kamap ples klia. Mi kisim save long pasin laikim na stretpela pasin bilong Jehova na mi luksave olsem sapos mi bihainim ol lo bilong em, dispela bai helpim mi.
Taim sik bilong mi i pinis, man bilong mi i bihainim promis bilong em na em i no pasim mi long go long ol miting. Mi wok yet long kisim save, na long Me 1958, mi kisim baptais olsem wanpela Witnes Bilong Jehova. Mi gat bikpela laik long famili bilong mi tu i lotuim trupela God.
Helpim Ol Pikinini Bilong Mi Long Ol Samting Bilong Lotu
Tupela pikinini bilong mi i save kam wantaim mi long ol miting na long wok autim tok, tasol sampela samting i kamap i soim mi olsem ol yet i wok long kisim save long Baibel. Wanpela taim Masahiko, pikinini man bilong mi i gat 6-pela krismas, i pilai ausait. Mi harim bikpela pairap na bikpela singaut. Wanpela neiba i ran i kam insait long haus, em i singaut strong olsem wanpela ka i bamim pikinini bilong mi. Em i dai pinis o? Mi strongim bel bilong mi long stap isi taim mi ran i go ausait. Mi lukim baiskol bilong em i bagarap pinis na mi pret nogut tru. Tasol bihain mi lukim em i wokabaut i kam long mi. Em i kisim liklik bagarap tasol. Em i holimpas mi na i tok, “Mama, Jehova i helpim mi, a?” Taim mi lukim em i stap laip na mi harim dispela naispela tok bilong em, mi krai.
Narapela taim, mipela i autim tok na bungim wanpela lapun man i bikmaus olsem: “Bilong wanem yu fosim yangpela pikinini i raun wantaim yu? Mi sori long em.” Mi laik bekim tok, tasol kwiktaim pikinini bilong mi i gat 8-pela krismas i tok: “Bubu, Mama i no fosim mi long autim tok. Mi autim tok, long wanem, mi laik mekim wok bilong Jehova.” Lapun i lukluk tasol long mipela na i no mekim wanpela tok.
Papa bilong tupela pikinini bilong mi i no insait long tok i tru, olsem na mi yet i mas lainim ol long ol tok i tru bilong Baibel, maski i gat planti samting mi yet i mas lain na kisim save long en. Mi wok long kisim pasin bilong laikim Jehova na givim bel tru long em, na bilip long em, na stap gutpela piksa em tupela pikinini i ken bihainim. Long olgeta de mi beten na tok tenkyu long Jehova long ai bilong ol pikinini. Mi tokim ol long ol ekspiriens mi kisim long wok autim tok. Dispela i strongim bel bilong ol. Bihain, taim ol arapela i askim ol long as na ol i kamap Witnes Bilong Jehova na mekim wok painia, o autim tok fultaim, ol i tok: “Mipela i lukim mama bilong mipela i amamas long mekim wok painia, na mipela i laik stap amamas tu.”
Mi save was gut long mi no ken mekim wanpela tok i bagarapim nem bilong papa bilong ol o wanpela insait long kongrigesen. Mi save kain tok olsem inap nogutim ol pikinini bilong mi. Nogut ol i no rispek moa long mi o long dispela man mi tok nogut long em.
Winim Ol Hevi i Laik Pasim Mi
Long 1963, kampani bilong man bilong mi i salim mipela famili i go long Taiwan. Em i tokim mi olsem sapos mi autim tok long ol lain bilong Japan long dispela hap, hevi inap kamap. Ol bai salim mipela i kam bek long Japan, na dispela bai kamapim hevi long kampani. Em i laik bai mipela i no bung wantaim ol Witnes.
Long Taiwan we ol i mekim olgeta miting long tok ples Saina, ol Witnes i amamas long lukim mipela. Mi kirap lainim tok ples Saina na bai mi ken autim tok long ol lain bilong Taiwan na i no ol lain bilong Japan. Long dispela rot, mi inap abrusim ol hevi man bilong mi i bin tok long en.
Ol Witnes long Taiwan i prenim mipela na dispela i strongim mipela. Tupela marit i mekim wok misineri, em Harvey na Kathy Logan, i helpim gut mipela. Long ol samting bilong lotu, Brata Logan i kamap olsem papa bilong tupela pikinini bilong mi. Em i soim ol olsem pasin bilong mekim wok bilong Jehova em samting i gat amamas long en. Mi bilip olsem taim mipela i stap long Taiwan, tupela pikinini bilong mi i bin pasim tok long bel long mekim wok bilong Jehova.
Tomoyoshi na Masahiko i go long wanpela skul bilong ol Amerika, we ol i lain long tok Inglis na tok Saina tu. Dispela ediukesen i helpim ol long bihain, taim ol i kirap mekim wok bilong trupela God, Jehova. Mi tenkyu tru long Jehova olsem dispela haptaim long Taiwan i bin kamap wanpela taim we mipela i kisim planti blesing bilong i stap oltaim na i no bin kamap olsem wanpela taim bilong hevi. Mipela i stap 3 na hap yia long Taiwan, na nau mipela famili i kam bek long Japan.
Nau tupela pikinini i winim 15 krismas samting na ol i laik bosim wokabaut bilong ol yet. Mi lusim planti aua long toktok wantaim ol long ol stiatok bilong Baibel, na Jehova i helpim ol long karim dispela hevi bilong ol. Taim ol i pinisim haiskul, Tomoyoshi i kirap mekim wok painia. Insait long sampela yia tasol, em i helpim 4-pela long dediket na baptais. Masahiko i bihainim brata bilong em na em tu i stat long painia taim em i pinisim skul. Insait long 4-pela yia em i mekim wok painia, em i helpim 4-pela yangpela long kamap Witnes.
Bihain Jehova i givim sampela blesing moa long ol. Tomoyoshi i stadi wantaim man bilong wanpela meri mi bin helpim em long kisim save long ol tok i tru bilong Baibel. Tupela pikinini meri bilong ol tu i kamap Witnes. Bihain, Tomoyoshi i maritim namba wan pikinini meri, em Nobuko, na Masahiko i maritim namba 2 pikinini meri, Masako. Nau Tomoyoshi na Nobuko i mekim wok long hetkota bilong ol Witnes Bilong Jehova long Brooklyn, New York. Na Masahiko na Masako i mekim wok misineri long Paragwai.
Isi Isi Tingting Bilong Man Bilong Mi i Senis
Pastaim i luk olsem man bilong mi i no tingim tumas ol samting bilong lotu mipela i mekim, tasol bihain mipela i lukim olsem tingting bilong em i wok long senis. Taim ol arapela i birua long mi, em i kamapim ol tok bilong helpim ol bilip bilong mi, tasol em i no luksave olsem long dispela rot em i sapotim ol tok i tru bilong Baibel. Em i save helpim ol Witnes long ol samting bilong skin ol i sot long en. Long wanpela sotpela tok em i mekim long weding bilong wanpela pikinini bilong mipela, em i tok: “Wok bilong helpim ol man long save long stretpela rot ol i mas bihainim, em i nambawan gutpela wok, tasol i gat bikpela hatwok long en. Tupela pikinini bilong mi wantaim ol poroman bilong ol i bin makim dispela wok i gat hatwok long en olsem wok tru bilong ol. Plis helpim ol.” Ol dispela samting i mekim na mi ting em bai kirap bung wantaim mipela long lotuim Jehova.
Mi stretim rot bilong ol Witnes i ken kam long haus na long dispela rot ol inap bungim man bilong mi. Mi singautim Kazuhiko i kam long ol miting na ol kibung Kristen na long Memorial bilong tingim i dai bilong Krais. Taim em i no bisi tumas long wok, em i save kam, maski em i no gat bikpela laik tumas long kam. Planti taim, mi pilim olsem em bai orait long stadi long Baibel, olsem na mi singautim ol elda Kristen i kam long haus, tasol em i no laik stadi. Mi save tingting planti, i gat wanem as na em i no laik stadi.
Mi tingim tok bilong aposel Pita: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.” (1 Pita 3:1, 2) Mi save olsem sampela taim mi no bin bihainim dispela tok. Bilong bihainim tru dispela tok, mi mas bihainim moa yet pasin Kristen.
Long 1970, mi kirap mekim wok painia, mi laik kamap gutpela Kristen moa. Tenpela yia i lus, na bihain narapela 10-pela yia gen i lus. Tasol poroman bilong mi i stap wankain yet long ol samting bilong lotu. Wanpela taim wanpela Baibel sumatin i tok: “Ating i hatwok long yu long helpim ol arapela man, long wanem, yu no inap helpim man bilong yu yet.” Dispela tok i mekim na mi bel hevi tru, tasol mi no givap.
Long 1988 samting, papamama bilong mitupela i kamap lapun olgeta. Mi lukautim ol na mekim ol narapela wok tu, na dispela i pinisim tru strong bilong mi. Inap planti yia, ol i bin birua long bilip bilong mi long Jehova, tasol mi mekim gutpela pasin sori long ol. Mama bilong mi i gat 96 krismas, na klostu long em i laik i dai em i tok: “Sumiko, sapos mi kirap bek, bai mi joinim lotu bilong yu.” Em nau, mi save hatwok bilong mi i no bin lus nating.
Man bilong mi i lukim ol samting mi bin mekim bilong helpim papamama bilong mipela. Bilong kamapim tenkyu bilong em, em i stat long kam long ol miting. Inap planti yia em i mekim olsem, tasol em i no kamap Kristen. Mi wok long mekim ol samting em i amamas long en. Mi singautim ol pren na ol wanwok bilong em i kam long haus na kaikai wantaim mipela. Mi raun wantaim em long ol samting em i mekim bilong kisim amamas. Taim ol i daunim aua bilong mekim wok painia, mi lusim planti aua moa bilong raun wantaim em.
Senis i Kamap Taim Em i Ritaia
Man bilong mi i ritaia long 1993. Mi ting nau em bai gat haptaim bilong stadi long Baibel. Tasol em i tok olsem sapos em i stadi, long wanem, em i gat haptaim long mekim, dispela i no soim rispek. Em i tok em bai lotu long God taim bel i kirapim em long mekim olsem, na mi no ken subim em.
Wanpela taim Kazuhiko i askim mi long bihainim ol pasin em i laikim i go inap long taim mi dai. Mi bel hevi tru long dispela tok, long wanem, kirap long taim mipela i marit nupela, mi bin givim bel tru long amamasim em. Mi bin wok strong long mekim ol samting em i laikim, tasol em i ting mi bin wokabaut long pasin Jehova i laikim na mi no tingim em tumas. Mi wok long tingting long dispela askim bilong em, na bihain mi tokim em olsem i no gat sampela samting moa mi ken mekim. Tasol sapos em i joinim mi long wok mi mekim, orait mipela inap statim wanpela nupela laip wantaim i bilong i stap olgeta taim na i no bilong sampela yia tasol. Inap planti de, em i no bekim dispela tok bilong mi. Bihain em i askim mi: “Inap yu stadi wantaim mi long Baibel?” Taim mi save tingim dispela askim bilong em, bel bilong mi i save amamas tru.
Pastaim, mi laik bai wanpela elda Kristen i stadi wantaim em, tasol em i tok: “Mi laik stadi wantaim yu tasol.” Olsem na mitupela i kirap stadi long Baibel na mekim long olgeta de. Mipela i mekim dispela stadi long tok ples Saina, long wanem, em i save gut long dispela tok ples na mi stap long kongrigesen bilong tok Saina. Na tu, mitupela wantaim i ritim Baibel olgeta insait long wanpela yia.
Insait long dispela taim, wanpela elda long kongrigesen bilong tok ples Saina, wantaim meri bilong em, ol i mekim gut long mipela. Ol i yangpela long ol pikinini bilong mipela, tasol ol i kamap pren tru bilong mipela. Planti arapela Witnes tu i tingim tru man bilong mi. Ol i singautim mipela i kam long haus bilong ol na ol i toktok wantaim Kazuhiko olsem em i papa bilong ol. Dispela i mekim em i amamas tru.
Wanpela taim, man bilong mi i kisim wanpela pas i singautim mipela long go long wanpela weding bai kamap long kongrigesen. Em i pilim tru dispela samting olsem pas i kam long nem bilong em, na em i orait long go. I no longtaim na em i stat long toktok wantaim ol Witnes olsem pren, na em i kirap stadi long Baibel wantaim wanpela elda Kristen. Stadi em i mekim long Baibel, ol miting, na pasin laikim bilong ol bratasista long kongrigesen, i helpim em long kamap Kristen.
Famili i Wanbel Wantaim
Long Disemba 2000, man bilong mi i kisim baptais bilong makim olsem em i dediket pinis long Jehova. Tupela pikinini man bilong mi wantaim meri bilong ol i lusim longwe hap na i kam bilong lukim dispela samting i olsem wanpela mirakel. Inap 42 yia i bin lus pastaim, tasol nau mipela famili i stap wanbel wantaim.
Nau long olgeta moningtaim, mitupela i save ritim Baibel na toktok long wanpela ves bilong en. Long olgeta de, mipela i amamas long stori wantaim long Baibel na insait long sampela wok bilong lotu. Nau man bilong mi i wanpela kongrigesen sevan, na i no longtaim i go pinis em i mekim wanpela pablik tok long tok Saina. Mi tenkyu tru long Jehova i bin helpim mitupela long stap wanbel long lotu. Mi wetim dispela taim we mi wantaim ol famili na pren bilong mi inap litimapim nem bilong Jehova na wok king bilong em inap oltaim oltaim.
[Mep long pes 13]
(Bilong save ol dispela rait i stap we long pes, lukim buk o magasin)
SAINA
RIPABLIK DEMOKRATIC BILONG KOREA
RIPABLIK BILONG KOREA
Solwara Bilong Japan
JAPAN
Tokyo
Solwara Bilong Is Saina
TAIWAN
Taipei
[Piksa long pes 12]
Mi wantaim famili bilong mi long 1958, em yia mi kisim baptais
[Ol Piksa long pes 13]
Taim mipela i lusim Tokyo na go long Taipei, ol gutpela pren olsem Harvey na Kathy Logan i strongim mipela long ol samting bilong lotu
[Piksa long pes 15]
Long nau, famili bilong mi i stap wanbel wantaim long lotu i tru