Yu Helpim Pikinini Bilong Yu Bai Em Yet i Laik Lotuim Jehova?

WANPELA yangpela man i tok: “Mi bin les long stadi long Baibel. Long pasin hait mi pasim tok long bel long mi no ken kamap wanpela Witnes Bilong Jehova taim mi bikpela pinis.” Yumi laik bai bikpela hap lain pikinini Kristen bihain ol yet i gat laik long lotuim Jehova. Tasol ating pastaim bai sampela i hatwok, olsem dispela yangpela man.

Sampela papamama i no save gut wanem samting ol i mas mekim bilong stiaim gut pikinini. Ol i kotim ol yet, olsem wanpela papa i tingting planti na em i tok: “Sampela taim mi lukim ol pikinini bilong mi i slip na aiwara i stap long pes bilong ol, na mi tingting: Ating mi strong tumas, o . . . ?” Tasol taim tupela pikinini man bilong em i go bikpela, long laik bilong ol yet ol i mekim wok bilong Jehova.

Tasol i gat sampela yangpela ol i lusim Jehova na lain Kristen, na ol i bihainim pasin bilong dispela graun em Satan i bosim. Orait, ol papamama i ken mekim wanem bilong helpim ol pikinini na bai ol yet i laik lotuim Jehova? Bilong bekim dispela askim, pastaim yumi mas save i gat wanem as na sampela i lusim Jehova, maski papamama i laik tru bai ol i stap gut long em.

As na Sampela i Lusim Jehova?

Wanpela samting i mekim em olsem: Sampela yangpela i no kisim save tru long Jehova na long pasin bilong em. Ol i go long ol miting Kristen kirap long taim ol i liklik yet, tasol ol i mekim nating; ol i no wok long painim Jehova. (Aisaia 55:6; Aposel 17:27) Yangpela man yumi stori pinis long em, em i les long ol miting Kristen, long wanem, em i no save long ol tok ol brata long pletfom i mekim.

Sampela yangpela i save long tok i tru, tasol ol i lukim ol lain bilong dispela graun bilong Satan i stap olsem fri na ol i gat planti samting bilong skin na dispela i pulim ol; bel bilong ol i gat laik long dispela kain sindaun. Sampela i laik tumas long bung wantaim ol narapela yangpela na i stap wankain olsem ol.​—⁠1 Stori 28:9; Luk 8:​12-14; 1 Korin 15:33.

Tasol long olgeta hap bilong graun, planti pikinini long ol famili Kristen ol i lotuim Jehova long laik bilong ol yet. Ol gutpela samting papamama bilong ol i bin mekim inap lainim yumi, a?

Kirap Long Taim Ol i Liklik Yet

Wanpela bikpela samting bilong helpim yu na bai ol pikinini bilong yu i laik lotuim Jehova, em olsem: Yu mas kirap long helpim ol long taim ol i liklik yet. Ol samting ol pikinini i lain long en taim ol i liklik yet, ol i no save lusim long taim ol i bikpela pinis. (Sindaun 22:⁠6) Olsem na taim pikinini i liklik yet, stori long em long gutpela pasin bilong Jehova, na pasin sori bilong em, na em i gat bikpela strong. Wok long kirapim bel bilong pikinini bambai em i laikim tumas Jehova na pilim tru ol samting Jehova i bin mekim bilong helpim em. Bilong mekim olsem, planti papamama i mekim wok long ol buk na nius bilong Sosaiti Wastaua i gat stori bilong ol samting Jehova i bin wokim.

Na taim ol i liklik yet, yu mas skulim ol long bihainim tok bilong Jehova na tingim em gut na laikim lotu bilong em. Yumi save amamas long lukim ol liklik pikinini long ol miting Kristen, em ol i no skul yet, tasol ol i wok long raitim sampela tok ol i harim, na lukim ol skripsa long Baibel bilong ol yet, o ol i go wantaim papa o mama bilong wasim pes taim ol i ai slip. Em ol liklik samting, tasol dispela i helpim pikinini long pilim tru gutpela pasin daun ol i mas mekim long Jehova!

Taim ol i liklik yet, yu mas kirap long lainim ol tru long ol tok bilong Baibel. Papamama bilong tupela manki i kirap long kaunim buk Harim Tok Bilong Bikpela Tisa long ol long taim ol i gat tupela krismas tasol.a Bihain, taim tupela manki hia i go long skul, tupela i save kirap kwik long moningtaim na mama i stadi wantaim tupela long buk Baibel Stori Buk Bilong Mi na buk Yu Inap i Stap Oltaim Long Paradais Long Graun.b Bihain papa i save toktok wantaim famili long teks bilong de paslain long ol i kisim kaikai bilong moningtaim. Bikpela wok papamama i mekim i kamap gutpela​—⁠tupela manki hia i bin kisim baptais taim narapela i gat 10-pela krismas na narapela i gat 11-pela krismas na makim olsem ol i givim bel long Jehova na ol yet i laik mekim wok bilong Jehova.

Wanpela gutpela yangpela man nau em i mekim wok long brens-ofis bilong Sosaiti Was Taua long Japan, em i tingting bek long taim em i liklik yet na mama i helpim em long pas gut long Jehova. Mama i save sindaun klostu long bet long nait na helpim em long beten. Dispela i lainim em gut olsem maski em i go we o mekim wanem, Jehova i stap klostu long em na i redi long helpim em.

Ol papamama i lainim gut pikinini ol i save long ol liklik pasin kranki sin i kamapim long em na ol i helpim em long stretim taim em i liklik yet. (Sindaun 22:15) Sapos ol i lukim pikinini i save tingim em yet tasol, o em i bikhet, o em i gat pasin antap, o oltaim em i save sutim tok long ol narapela, kwiktaim ol i kirap na helpim pikinini long stretim dispela pasin. Sapos nogat, dispela i opim rot na bihain bai pikinini i bikhet long Jehova na ol lo bilong em. Olsem: Sampela papamama i larim ol pikinini na ol i ting ol i helpim ol, tasol nogat. Ol dispela pikinini i lain long tingim laik bilong ol yet tasol, na ol i no laik harim tok bilong papamama o Jehova. Bai ol i kamap olsem ol man em Baibel i tok ol “i no save tenkyu.” (Sindaun 29:​21, NW) Tasol sapos yu givim sampela wok bilong haus long ol pikinini na lainim ol long tingting long helpim ol narapela, dispela inap kirapim ol long tenkyu long papamama na Jehova.

Na taim pikinini i liklik yet yu mas putim sampela mak em inap winim long mekim wok bilong God. Sapos yu no wok oltaim long mekim olsem, ol narapela bai givim tingting long em na kirapim bel bilong em long laikim narapela wok. Yu ken kirapim pikinini long winim ol mak olsem: Kaunim Baibel olgeta, mekim stadi bilong em yet long wanpela buk bilong Sosaiti Wastaua, insait long Skul Bilong Wok Autim Tok, kamap man bilong autim tok, kisim baptais.

Takafumi i tingim mama bilong em i bin raitim sampela liklik askim long Wastaua na Kirap! na putim long tebol long haus kuk bambai Takafumi i lukim taim em i kam bek long skul, na dispela i lainim em long kaunim dispela tupela nius long olgeta taim. Yuri i tingting bek long taim em i bin i stap sampela de wantaim ol painiac i autim tok long ples i no gat ol wokman Kristen long en. Em i raun autim tok wantaim ol, na lukim ol i kukim gutpela kaikai, na ol i stap amamas na wok strong, na em i kisim laik long mekim wok bilong Jehova olsem ol i mekim. Planti yangpela i tok, papamama i save kisim ol i go lukim Betel em nem bilong nambawan ofis bilong Sosaiti Was Taua na ol brens-ofis, bambai ol i ken lukim ol narapela yangpela i stap amamas na mekim wok bilong Jehova. Planti brata sista i bin i go lukim Betel taim ol i yangpela, nau ol i wok long Betel long ol narapela narapela hap.

Givim Hap Taim Bilong Yu Long Pikinini

Hap taim yu givim long ol pikinini na wok yu mekim long dispela hap taim, em bikpela samting bilong helpim ol na bai ol yet i laik mekim wok bilong Jehova o nogat. Taim yu stadi wantaim ol long Baibel, sapos yu no bin redim gut stadi, kwiktaim bai ol i pilim. Sapos yu no save wanem hap bilong buk yu pinis stadi long en long wik bipo, o liklik samting i kamap na yu no stadi wantaim ol, dispela bai lainim ol olsem stadi i no bikpela samting. Tasol sapos ol i lukim papamama i lusim sampela samting bambai ol i ken mekim stadi, na ol i redim gut, na mekim stadi long olgeta taim maski wanem samting i kamap, dispela bai lainim ol pikinini olsem stadi em i bikpela samting. I no gat lo tasol long taim bilong stadi wantaim ol pikinini, sampela mama i bilas olsem ol i laik go long miting o mekim Baibel-stadi wantaim narapela. Dispela i givim tingting long ol pikinini olsem wok bilong lotuim Jehova em i bikpela samting.

Yu mas lusim bikpela hap taim na wok strong tru bambai yu inap putim gut ol tok bilong Baibel long bel bilong ol pikinini bilong yu na ol i amamas long stadi. Ol liklik pikinini i save amamas long lukim samting i makim stori ol i lain long en. Olsem na wanpela papa i makim Lasarus i kirap bek bilong helpim ol pikinini long save gut long dispela. Em i go insait long bikpela kabot na kam ausait gen olsem Lasarus i kirap bek.​—⁠Jon 11:​17-44.

Taim ol pikinini i kamap bikpela, olsem yangpela man na meri, nau yu mas wok strong moa na save gut moa long helpim ol, long wanem, bel bilong ol i save kirap nabaut na ol i tingting planti long kain kain samting. Hap taim papamama i givim long pikinini long dispela taim em i bikpela samting bilong helpim em long bilip strong long Jehova. Wanpela papa i bin helpim gut olgeta 4-pela pikinini bilong em na em i tok, taim ol pikinini i gat hevi, em i save painim sampela tok long ol buk na nius bilong Sosaiti Wastaua bilong helpim ol, na em i toktok wantaim ol long dispela long olgeta de inap long ol i winim pinis hevi.

Wanpela mama i gat planti wok​—⁠em i gat tupela pikinini na em i mekim wok painia. Em i lukim olsem pikinini meri bilong em i no laik poromanim moa ol narapela na em i no amamas moa long mekim ol wok bilong God. Olsem na mama i pasim tingting long em i mas i stap long haus taim pikinini meri i kam long skul long apinun na toktok wantaim em taim tupela i dring ti. Long dispela rot tupela inap toktok gut wantaim, na mama i helpim pikinini. Taim pikinini i pinis long haiskul em i kirap long mekim wok painia wantaim mama bilong em.​—⁠Sindaun 20:⁠5.

Ol Gutpela Poroman na Makim Gutpela Pasin

Papamama i mas givim hap taim long ol pikinini na painim ol gutpela poroman bilong ol. Sindaun 13:20 i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”

Planti papamama, em ol i bin helpim gut ol pikinini, ol i save dispela tok bilong Baibel i stret. Wanpela papa i gat 4-pela pikinini i tok: “Taim ol pikinini i liklik yet ol i gat planti poroman long lain bilong Jehova, na mi pilim olsem dispela i bin strongim ol long mekim wok bilong Jehova. Mi bin kirapim ol long painim ol poroman long kongrigesen bilong mipela yet na long ol narapela kongrigesen, na wok long kamap gutpela pren bilong ol.” Wanpela elda Kristen i mekim wok long Betel inap planti yia pinis, em i tok: “Taim mi yangpela, mipela i no gat bikpela haus, tasol mipela i save singautim wasman sekit i kam i stap wantaim mipela. Na mipela save singautim ol painia salim long kongrigesen i kam kaikai wantaim mipela. Ol i save waswas long haus bilong mipela na poromanim mipela. Taim mi harim stori bilong ol long wok autim tok na mi lukim ol i stap amamas, dispela i helpim mi long laik tru long mekim wok painia.”

Ol gutpela poroman inap helpim yangpela i gat hevi. Wanpela pikinini man i gat hevi na mama i toktok wantaim wasman sekit long dispela. Wasman i tok, gutpela sapos mama i kisim pikinini i go autim tok wantaim em. Wasman i tok: “Sapos yu mekim olsem, dispela bai helpim em long kamap strong long spirit, na stretim hevi bilong em.” Mama i tok: “Kongrigesen bilong mipela i putim bung bilong autim tok long apinun, na planti skulmanki, na ol painia oltaim i lapun liklik, na wanpela elda, ol i go. Pastaim mi hatwok long kirapim pikinini long i kam autim tok oltaim long apinun, tasol i no longtaim na senis i kamap, long wanem, em i wok wantaim ol gutpela poroman na dispela i strongim em na taim em i kam bek long haus em i amamas. Taim em i stap yet long haiskul, em i baptais na mekim wok painia haptaim long olgeta mun, na taim em i pinis long skul, em i kirap mekim wok painia oltaim.” Em i gat ol gutpela poroman na mekim wok bilong Jehova na gutpela samting i kamap.

Ating long hap bilong yu i no gat sampela yangpela ol inap kamap gutpela poroman bilong pikinini bilong yu, tasol planti pikinini i tok, gutpela pasin papamama i mekim i helpim ol na ol yet i gat laik long mekim wok bilong Jehova. Planti pikinini i amamas long pasin bilong papamama na ol i laik bihainim. Yuri i tingim gutpela pasin bilong mama bilong em long singautim ol man i kam long haus, na tingim gut ol narapela na telefon long ol na wokim kaikai bilong ol long taim ol i sik. Tatsuo i gat 3-pela brata na nau 4-pela wantaim i bikpela pinis na mekim wok bilong Jehova. Em i tok: “Mama i no inap stadi oltaim wantaim mipela, long wanem, papa i no bilip na ol famili i birua long mama. Tasol mi lukim em i sanap strong long tok i tru na amamas long mekim wok bilong Jehova na mi pilim tru. Na em i redi long helpim mipela inap long biknait bilong stretim hevi.” Sapos papamama i mekim gutpela pasin, bai ol gutpela tok ol i mekim i gat strong. Yoichiro i stori long papamama na em i tok: “Mi no tingim wanpela taim ol i mekim tok i daunim narapela long kongrigesen; na ol i no larim mipela ol pikinini i toktok nabaut long ol liklik pasin kranki narapela i mekim.”​—⁠Luk 6:​40-42.

Amamas Long Lukim Ol Pikinini Yet i Laik Lotuim Jehova

I no gat wanpela rot i save go stret olgeta taim yumi laik helpim ol pikinini long kisim laik long lotuim Jehova. Sampela taim bai yu tingting planti. Tasol dispela papa pastaim yumi stori long em, em i tok: “Mitupela mama i wok tasol long bihainim gut ol tok i kam long oganaisesen bilong Jehova. Dispela i helpim mipela gut long winim ol hevi.” Wok bilong tupela i kamap gutpela.

Tru tumas, sapos yu wok strong long bihainim ol tok bilong Baibel em bilong stiaim tingting bilong yu, na yu lainim ol pikinini long ol gutpela as bilong laikim tumas Jehova, na yu yet yu makim gutpela pasin ol i ken bihainim, na yu laik tru long helpim ol, bai yu inap lukim wok bilong yu i kamap gutpela. Yu tingim yangpela man em pastaim em i no laik kamap Witnes? Taim ol hevi i bin painim em, mama i helpim em gut, na bihain em i tok: “Mi amamas mama i no bin les long helpim mi!” Ating bai yu harim ol pikinini bilong yu i mekim gutpela tok olsem.​—⁠Galesia 6:⁠9.

[Ol Futnot]

[Piksa long pes 30]

Taim yu tingim ol wok yu bin mekim bilong helpim pikinini, yu amamas?