Mi Painim Amamas Maski Skin Bilong Mi i Nogut

Stori bilong Paulette Gaspar

Mi bin i gat 3-pela kilogram taim Mama i karim mi, tasol dokta i save olsem mi gat wanpela bikpela sik. Sampela bun bilong mi i bin bruk taim Mama i karim mi. Mi gat sik bilong bun i bruk nating nating. Hariap tru ol i bringim mi i go long rum bilong kisim operesen, tasol ol dokta i ting mi no inap i stap laip. Ol i ting bai mi dai insait long 24 aua.

MAMA i bin karim mi long Canberra, em nambawan biktaun bilong Australia, long Jun 14, 1972. Maski ol dokta i ting mi bai i dai, mi stap laip yet long pinis bilong namba wan de. Tasol sik numonia i kisim mi. Ol dokta i ting bai mi dai, olsem na ol i larim mi na i no givim marasin long mi​—ol i ting bodi bilong mi i ken mekim wok bilong en. Orait bodi yet i mekim wok bilong en na mi no i dai.

Mi save papamama i bin kisim bikpela hevi na ol i bin hatwok tru long mi long dispela taim. Ol dokta na nes samting i ting mi no inap i stap longtaim, olsem na ol i tokim papamama olsem ol i no ken pas tumas wantaim mi. Mi stap 3-pela mun long haus sik na insait long dispela taim ol i tambuim papamama long holim mi, nogut wanpela bun bilong mi i bruk. Bihain i luk olsem mi bai stap laip, olsem na ol dokta i tokim papamama long putim mi long wanpela kain haus sik bilong lukautim ol pikinini i gat bagarap long bodi.

Tasol papamama i kisim mi i go long haus. Mama i bin kirap long stadi long Baibel wantaim ol Witnes Bilong Jehova, na ol tok em i lainim i givim tingting long em olsem em i gat wok long lukautim mi. Tasol ating em i hatwok tru long pas gut wantaim mi, long wanem, em i bin lusim olgeta strong bilong em long mekim bikpela wok tru bilong lukautim mi. Planti taim ol i mas kisim mi i go long haus sik. Ol bun bilong mi i save bruk nating long ol liklik liklik samting, olsem long taim Mama i wasim mi. Na sapos mi kus, dispela inap mekim na wanpela bun i bruk.

Bikpela Bel Hevi i Kisim Mi

Taim mi wok long kamap bikpela, oltaim mi save sindaun long wilsia. Mi no inap lain long wokabaut. Maski papamama i gat bikpela hatwok, ol i lukautim mi gut tru long ol samting bilong skin.

Na tu, Mama i wok strong long skulim mi long ol tok bilong Baibel we i save mekim gut bel bilong man. Olsem: Em i skulim mi olsem bihain God bai mekim graun i kamap wanpela ples paradais na olgeta manmeri bai i stap nambawan tru long ol samting bilong spirit, long tingting, na long skin. (Song 37:​10, 11; Aisaia 33:24) Tasol Mama i tokaut olsem em i no ting i stap bilong mi long nau bai i kamap gutpela, i go inap long dispela gutpela taim i kamap bihain.

Pastaim mi bin i go long skul bilong ol pikinini em ol i gat bagarap long bodi. Ol tisa i no putim sampela mak ol i laik bai mi winim bihain, na mi tu mi no putim sampela mak olsem. Mi hatwok tru long i go long skul long olgeta de. Planti pikinini long skul ol i mekim nogut long mi. Bihain mi go long skul bilong ol pikinini i no gat sampela bagarap long bodi. Mi mas lain long i stap gut wantaim ol narapela pikinini, na dispela i pinisim strong bilong mi long skin na bel na tingting. Tasol mi tingting strong olsem mi mas inapim 12-pela yia bilong mi long skul.

Taim mi stap long haiskul, mi tingting olsem i stap bilong ol wanskul i no gat as bilong en na ol i no inap tingim gutpela samting bai kamap bihain. Na mi tingting tu long ol tok bilong Baibel em Mama i bin skulim mi long en. Long tingting mi save olsem dispela tok em i mekim em tok i tru. Tasol long dispela taim ol tok bilong Baibel i no go daun long bel bilong mi. Olsem na mi tingting long painim amamas tasol na mi no ken tingting long ol de bihain.

Taim mi gat 18 krismas, mi lusim papamama na mi go sindaun long wanpela haus wantaim sampela lain em ol i gat bagarap long bodi. Bel bilong mi i kirap tru long nupela sindaun bilong mi, tasol mi pret liklik. Mi stap fri long mekim ol samting, na mi inap bosim i stap bilong mi yet, na mi gat ol pren, na mipela inap raun wantaim, na amamas long ol pati samting​—mi laikim tru ol dispela samting. Planti pren bilong mi ol i marit. Mi tu mi gat bikpela laik long marit na bai mi gat poroman bilong laikim mi. Tasol sik bilong mi i mekim na i luk olsem mi no inap painim wanpela poroman marit. Mi bel hevi tru long dispela.

Tasol mi no bin sutim tok long God long dispela hevi bilong mi. Ol save mi bin kisim long God i soim mi olsem God i no inap tru long mekim wanpela pasin i no stret. (Jop 34:10) Mi ting mi mas orait tasol long i stap bilong mi. Tasol maski mi traim long holim dispela kain tingting, bikpela sik bilong bel hevi i kisim mi.

Isi Isi Mi Wok Long Kamap Orait

Mama i luksave olsem mi no stap orait, na em i toksave long wanpela elda bilong kongrigesen husat i stap klostu long hap mi stap long en. Elda i ringim mi na singautim mi i go long ol miting Kristen long Haus Kingdom bilong ol Witnes Bilong Jehova long hap mi stap long en. Na tu, wanpela sista long kongrigesen i kirap stadi wantaim mi long Baibel long olgeta wik.

Mi lainim gen ol tok i tru bilong Baibel em Mama i bin skulim mi long en long bipo, na tingting bilong mi i wok long kamap gutpela. Mi amamas long bung wantaim ol wanlain Kristen. Tasol mi bin lain long pasim ol tingting na hevi bilong mi long mi yet na mi no save kamapim long ol narapela, nogut ol i bagarapim bel bilong mi. Ating dispela i mekim na mi pilim hatwok long laikim tru God. Tasol mi save olsem i stret mi mas dediketim laip bilong mi long em. Olsem na long Disemba 1991, mi kisim baptais bilong makim olsem mi dediket pinis long em.

Mi lusim dispela haus mi bin sindaun long en wantaim ol pren bilong mi na mi kisim wanpela flet na mi yet i stap long en. Dispela senis i kamapim sampela gutpela samting na i gat sampela hevi tu. Olsem: Mi pilim olsem mi wanpis tru. Na mi pret, nogut sampela man i brukim haus na kam insait. I no longtaim na bikpela sik bilong bel hevi i painim mi gen. Mi save lap na i olsem mi stap amamas, tasol nogat. Mi laik tru long painim wanpela gutpela pren husat bai i stap gut long mi.

Mi pilim olsem God Jehova i givim wanpela gutpela pren olsem long mi. Ol elda long kongrigesen i mekim gutpela pasin na ol i makim Suzie, em wanpela sista marit, long stadi yet wantaim mi long Baibel. Suzie em tisa bilong mi, na i no dispela tasol. Em i kamap wanpela gutpela pren tru na mi save laikim em tumas.

Suzie i skulim mi long tokim ol narapela long ol tok mi lainim​—long haus bilong ol man na long kain kain taim na ples. Nau mi wok long pilim moa yet ol gutpela pasin bilong God. Tasol maski mi baptais pinis, mi no kisim yet pasin bilong laikim tumas God. Wanpela taim mi tingting olsem mi bai lusim wok bilong em. Mi kamapim dispela long Suzie na em i helpim mi na mi winim dispela hevi.

Na Suzie i helpim mi long luksave long wanpela samting i mekim na mi save bel hevi tru; mi save poroman wantaim sampela em ol i no givim bel tumas long laikim Jehova. Olsem na mi kirap poromanim ol narapela em ol i givim bel tru long lotuim God​—na moa yet em ol sista i lapun liklik. Mi wantaim mama i no pas gut wantaim, olsem na mi kirap mekim ol samting bilong pas gut wantaim em na wantaim brata bilong mi. Dispela i mekim na mi kirap nogut long pilim wanpela kain amamas em bipo mi no bin pilim. Mi kisim bikpela amamas na strong long rot bilong ol bratasista long kongrigesen, na famili bilong mi, na Jehova.​—Song 28:7.

Wanpela Nupela Wok

Mi go long wanpela kibung na mi harim wanpela tok i stori long ol amamas em planti bratasista i kisim long wok Kristen bilong autim tok fultaim. Dispela i mekim na mi tingting olsem: ‘Mi inap mekim dispela wok!’ Tru, mi save olsem em bai i hatwok tru long mi mekim olsem. Tasol mi beten na skelim dispela samting, na mi raitim pepa bilong mekim wok fultaim olsem wanpela tisa bilong Baibel, na long Epril 1998, mi kirap mekim dispela nupela wok bilong mi.

Bodi bilong mi i gat bagarap long en, olsem na mi mekim dispela wok bilong autim tok olsem wanem? Mi gat pasin bilong lukautim mi yet, na mi no laik givim hevi long ol narapela long kisim mi long ka na helpim mi long ol narapela samting. Olsem na Suzie wantaim man bilong em, Michael, ol i tokim mi long wanpela rot bilong stretim dispela hevi. Mi mas baim wanpela motobaik! Tasol olsem wanem mi inap raun long motobaik? Olsem yu lukim long piksa i stap hia, motobaik bilong mi em i narapela kain​—ol i bin wokim long wei i stret tru long helpim mi. Na mi no gat wok long apim liklik bodi bilong mi i gat 19 kilogram tasol na lusim wilsia, nogat!

Motobaik bilong mi i mekim na mi no gat wok long wetim ol narapela long helpim mi, olsem na mi inap i go lukim ol man na stadi wantaim ol long Baibel long taim i stret long ol na long mi tu. Mi save laik tru long raun long motobaik na win i holim pes bilong mi​—em wanpela gutpela samting tru!

Mi save amamas long toktok wantaim ol manmeri long rot, em ol i save mekim gutpela pasin na soim olsem ol i tingim mi. Na mi save amamas long helpim ol manmeri long kisim save long Baibel. Mi tingim wanpela taim mi bin autim tok long ol haus wantaim wanpela poroman husat i longpela man. Em i tok gude long meri bilong haus, na meri i lukluk strong long mi na em i kirap nogut na em i askim poroman bilong mi, “Meri ya inap toktok?” Mitupela wantaim i lap indai. Taim mi autim tok pinis long meri, nau em i save olsem mi inap tru long toktok!

Nau mi amamas long i stap bilong mi na mi lain pinis long laikim tumas God Jehova. Mi tenkyu tru long Mama i bin skulim mi long ol tok i tru bilong Baibel, na mi bilip na wetim taim i klostu pinis, na God bai “mekim olgeta samting i kamap nupela,” na em bai mekim olsem tu long liklik bodi bilong mi.​—KTH 21:​4, 5.

[Rait long pes 30]

“Mi ting mi mas orait tasol long i stap bilong mi. Tasol maski mi traim long holim dispela kain tingting, bikpela sik bilong bel hevi i kisim mi”