Mi Amamas na Mi Inap Mekim Gutpela Wok, Maski Mi Aipas
Em stori bilong Polytimi Venetsianos
Taim mi pilai wantaim 3-pela brata susa bilong mi na wanpela kasen, wanpela liklik samting i flai i kam insait long windo bilong haus. Em i wanpela hanbom, na taim em i pairap olgeta 3-pela brata susa bilong mi ol i dai, na mi kamap aipas.
EM JULAI 16, 1942, taim mi gat 5-pela krismas tasol. Inap planti de, sampela taim tingting bilong mi i dai na sampela taim nogat. Taim mi kisim bek tingting, mi laik save long ol brata na susa bilong mi. Mi kisim save olsem ol i dai pinis, na mi ting i gutpela sapos mi tu i bin i dai.
Taim mama i karim mi, famili bilong mi i sindaun long ailan Salamis bilong kantri Grik, klostu long Pairius, em pasis bilong Atens. Maski mipela i stap rabis, mipela i stap bel isi. Tasol bel isi bilong mipela i pinis taim Namba Tu Pait i kirap long 1939. Papa bilong mi i wok boskru long sip long hap bilong Mediterenian. Planti taim sip bilong em i mas ranawe long ol sabmarin, ol bikpela sip bilong pait, ol roket bilong bagarapim sip, na ol bom, maski em ol samting bilong Jemani, Itali, Japan, o bilong ol birua bilong ol. Long dispela taim, gavman Fasis na gavman Natsi i bosim Grik.
Lain Long Bel Nogut Long God
Sindaun bilong mipela i nogut tru long taim bilong pait, olsem na mama i lusim narapela pikinini. Nau 4-pela pikinini bilong em i bin i dai. Bel bilong mama i bagarap stret, na em i kisim sik TB, na bihain long em i karim namba 6 pikinini, em i dai long Ogas 1945. Ol man bilong lotu i sindaun klostu long mipela, ol i tok God i givim strafe long mipela. Sampela pris bilong lotu Grik Otodoks, ol i laik strongim bel bilong mipela taim ol i tok God i bin kisim ol brata na susa bilong mi i go long heven bilong kamap ol liklik ensel, tasol tok bilong ol i bagarapim moa yet bel bilong mipela.
Papa i kros nogut tru. God i gat planti milion milion ensel i stap wantaim em, olsem na bilong wanem em i tekewe 4-pela liklik pikinini long wanpela famili i stap rabis? Dispela bilip bilong Misin Otodoks i mekim na papa i strong long sakim God na ol samting bilong lotu. Kirap long dispela taim em i klia olgeta long lotu. Em i lainim mi long bel nogut tru long God, na em i tok God yet i as bilong ol samting nogut i painim mipela.
Olsem Animal Insait Long Banis
Liklik taim bihain long mama i dai long 1945, papa tu i kisim sik TB na em i mas slip long wanpela kain haus sik. Ol i kisim liklik susa bilong mi na putim em long wanpela ples bilong lukautim em. Bihain, taim papa i lusim haus sik na em i go long dispela ples bilong kisim liklik susa bilong mi, ol i tokim em, em i dai pinis. Ol i putim mi long wanpela skul bilong ol aipas na mi stap 8-pela yia long en. Pastaim, bel bilong mi i bagarap stret. Mi bel hevi moa long ol de famili bilong ol aipas i kam lukim ol. Klostu olgeta wanskul bilong mi ol i gat wanpela i kam lukim ol, tasol mi nogat.
Pasin bilong mi i olsem wanpela animal insait long banis. Ol i kolim mi bikhetmeri bilong skul. Olsem na ol i paitim mi na mekim mi i sindaun long wanpela sia bilong ol bikhet. Planti taim mi bin tingting long kilim i dai skin bilong mi. Tasol bihain, mi kisim save olsem mi mas lain long lukautim mi yet. Mi kirap helpim ol aipas wanskul na dispela i givim bikpela amamas long mi. Planti taim mi helpim ol long pasim klos bilong ol o long stretim bet bilong ol.
Ol pris i tokim mipela olsem God i mekim na mipela i aipas, long wanem, papamama bilong mipela i bin mekim wanpela bikpela rong. Dispela i mekim na mi bel nogut moa long God, em i olsem wanpela God nogut. Wanpela bilip bilong lotu i bin pretim mi na mekim mi i bel nogut, em dispela bilip olsem tewel bilong ol man i dai pinis ol i raun na mekim nogut long ol man i stap yet. Olsem na maski mi laikim tru mama na ol brata susa bilong mi em ol i dai pinis, mi pret long “tewel” bilong ol.
Papa i Helpim Mi
Bihain papa i bungim ol Witnes Bilong Jehova. Em i kirap nogut long lain long Baibel olsem Satan i as bilong pen na indai, na Jehova nogat. (Song 100:3; Jems 1:13, 17; KTH 12:9, 12) Kwiktaim papa i kirap na go long ol miting bilong ol Witnes Bilong Jehova, na em i kamap strong long spirit, na kisim baptais long 1947. Sampela mun paslain long em i kisim baptais, em i marit gen na em i kisim wanpela pikinini man. Bihain, nupela meri bilong em i bung wantaim em bilong lotuim Jehova.
Taim mi gat 16 krismas, mi lusim skul bilong ol aipas. Mi go bek long wanpela gutpela famili Kristen na dispela i mekim gut bel bilong mi! Ol i stadi long Baibel olsem wanpela famili, na ol i askim mi long sindaun wantaim ol. Mi tingim ol na mi laik mekim gutpela pasin long ol, olsem na mi sindaun long dispela stadi, tasol mi no putim gut tingting long en. Mi strong yet long bel nogut long God na lotu.
Famili i stadi long wanpela liklik buk (God’s Way Is Love). Pastaim mi no givim bel long stadi, tasol bihain mi harim papa i toktok long ol man i dai pinis i stap olsem wanem. Dispela tok i kirapim tingting bilong mi. Ol i kaunim Saveman 9:5, 10 long Baibel: “Ol man i dai pinis, ol i no inap save long wanpela samting. . . . Yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”
Nau mi save, mi pret nating. Mama, na ol brata susa bilong mi em ol i dai pinis, ol i no inap mekim nogut long mi. Bihain mipela toktok long ol man i dai pinis bai kirap bek long matmat. Nau mi putim gut yau long ol tok i kamap. Taim mi harim tok promis bilong Baibel olsem aninit long wok king bilong Krais ol man i dai pinis bai kirap bek, bel bilong mi i amamas tru! (Jon 5:28, 29; KTH 20:12, 13) Nau mi laikim tru dispela stadi. Mi wetim tru dispela de mipela famili bai toktok long Baibel, na maski mi aipas, mi redi gut bilong insait long en.
Kisim Ai Bilong Spirit
Taim mi wok long kisim save bilong Baibel, ol tingting kranki bilong mi long God na ol samting em i bin mekim ol i pinis. Mi kisim save olsem i no asua bilong God, na mi o narapela i aipas, nogat; tasol as bilong ol samting nogut em Birua bilong em, Satan. Mi bel hevi, long wanem, mi no save gut, olsem na mi bin sutim tok long God! Mi gat strongpela laik long kisim save, olsem na stretpela save bilong mi long Baibel i go bikpela moa. Maski mipela i stap longwe long Haus Kingdom inap planti kilomita, mi bin go long olgeta miting Kristen na bekim tok. Na tu, mi insait tru long wok autim tok, mi no larim aipas bilong mi i pasim mi long mekim dispela wok.
Mi amamas tru taim mi kisim baptais long Julai 27, 1958, em 16 yia samting bihain long dispela hevi i bin painim mi na mi kamap aipas! Mi inap tingting na wet long gutpela samting bai kamap bihain. Nau i stap bilong mi i gat as bilong en—em long mekim wok bilong gutpela Papa bilong mi long heven. Mi kisim save long em na dispela i helpim mi long lusim ol tok giaman, na i strongim bel bilong mi long karim hevi bilong mi olsem wanpela aipas na ol hevi dispela samting i save kamapim. Planti taim mi bin lusim 75 aua o sampela aua moa long olgeta mun bilong autim gutnius long ol narapela man.
Marit i Bruk
Long 1966, mi maritim wanpela man na mitupela i gat ol wankain mak bilong winim. I olsem mipela bai amamas long marit bilong mipela taim mipela i wok long mekim bikpela wok moa long autim tok. Sampela mun mipela i bin lusim planti aua long dispela wok bilong helpim ol man long abrusim bagarap na i stap laip. Mipela i go sindaun long wanpela hap klostu long Livadia, long sentral Grik. Taim mipela i stap long dispela hap long 1970 i go inap 1972, maski wanpela lain bilong ami i bosim strong kantri Grik, mipela inap helpim sampela manmeri long kisim save long tok i tru bilong Baibel na long kamap Kristen i baptais. Na tu, mipela i amamas long helpim liklik kongrigesen bilong ol Witnes Bilong Jehova long dispela hap.
Tasol bihain, man bilong mi em i no strong tumas long stadi long Baibel na long go long ol miting Kristen, na bihain em i lusim ol bilip bilong Baibel. Dispela i mekim na bikpela hevi i kamap insait long marit bilong mipela, na long 1977 mipela i katim marit. Bel bilong mi i bagarap stret.
Mi Stap Amamas na Mekim Gutpela Wok
Long dispela taim bilong bikpela bel hevi, Jehova na oganaisesen bilong em, ol i helpim mi gen. Wanpela gutpela brata Kristen em i tokim mi, dispela hevi em man bilong mi bilong bipo i as bilong en, sapos mi larim hevi i mekim na mi no amamas moa, mi stap olsem wokmeri bilong em. Em bai bosim amamas bilong mi. Long dispela taim wanpela lapun bilong kongrigesen Kristen em i askim mi long helpim em na wok autim tok bilong em i ken kamap gutpela moa. I no longtaim na mi givim bel tru long wanpela wok i save givim bikpela amamas long mi—em wok autim tok!
Na narapela Kristen i tok: ‘Yu ken wok yet long ol hap yu inap mekim bikpela wok long en. Yu ken kamap olsem wanpela lam God Jehova i mekim wok long en.’ Man! Em gutpela tingting! Wanpela aipas i ken kamap olsem ‘wanpela lam God Jehova i mekim wok long en’! (Filipai 2:15) Kwiktaim mi lusim Atens na mi go sindaun long ples Amarintos long sauten Evoia, em wanpela hap i gat liklik lain tisa tasol long en bilong skulim ol man long Baibel. Ol brata sista long dispela hap i helpim mi, olsem na mi gat haus na ol samting bilong lukautim mi long skin.
Olsem na winim 20 yia nau, long sampela mun long olgeta yia, mi save mekim bikpela wok moa long autim tok. Long strong bilong Jehova, mi inap insait long olgeta kain wok bilong autim tok—autim tok long haus bilong ol manmeri, na long rot, na mekim Baibel-stadi wantaim ol manmeri i laik harim tok. Long nau, mi save mekim 4-pela Baibel-stadi wantaim ol manmeri i laik kisim save long Man bilong wokim yumi. Long 20 yia i go pinis, i gat liklik lain brata tasol long dispela hap, olsem na mi kisim bikpela amamas tru long lukim 3-pela kongrigesen i kamap!
Tupela taim long olgeta wik, mi mas raun inap olsem 60 kilomita bilong i go i kam long ol miting Kristen, tasol mi tingting strong long mi no ken lusim wanpela miting. Mi no inap lukim brata i mekim tok long miting, olsem na taim tingting bilong mi i wokabaut mi save mekim wok long notbuk Brel bilong mi, em wanpela kain notbuk bilong ol aipas, na mi save raitim sampela tok long notbuk. Long dispela rot mi strong long putim gut yau na tingting bilong mi long tok i kamap. Na mi amamas wanpela miting bilong kongrigesen i save kamap long haus bilong mi. Sampela manmeri bilong ol ples klostu, ol i save kam long dispela miting mipela kolim Buk-Stadi Bilong Kongrigesen. Mi no wetim ol narapela i kam lukim mi long haus, nogat; mi yet i save go lukim ol, na dispela i mekim na narapela i save strongim bel bilong narapela.—Rom 1:12.
Taim mi yangpela na stap wantaim papa, em i no mekim long mi olsem mi pikinini aipas. Em i lusim bikpela hap taim long lainim mi long mekim ol wok long han bilong mi, na em i no les long mekim olsem. Dispela wok papa i lainim mi long en i mekim na mi inap lukautim gut gaden bilong mi na sampela pik na bulmakau samting. Mi save wok strong long haus—olsem klinim haus na redim kaikai. Mi kisim save olsem yumi inap kisim amamas long ol liklik samting long i stap bilong yumi, long ol samting yumi holim pinis. Maski mi no inap lukluk, mi bin mekim planti samting long rot bilong ol narapela samting bilong skin olsem yau, nus, maus, na han, na dispela i givim bikpela amamas long mi. Na tu, ol man i no Witnes ol i kirap nogut long dispela.
God Bilong Mi i Strongim Mi
Planti manmeri i laik save olsem wanem mi inap holim gutpela tingting na lukautim mi yet, maski mi aipas. Bikpela samting—mi mas givim biknem long Jehova, em “God bilong mekim isi bel bilong olgeta man i gat hevi.” (2 Korin 1:3) Bihain long mi no inap lukluk moa, planti taim mi bin tingting long kilim i dai skin bilong mi. Olsem na mi ting, sapos mi no bin kisim save long Jehova na tok i tru bilong Baibel, mi no ken stap long nau. Mi kisim save olsem Man bilong wokim yumi em i givim planti gutpela samting long yumi—em i no givim ai bilong lukluk tasol—na sapos yumi mekim wok long ol dispela samting, yumi inap stap amamas. Wanpela taim ol Witnes i autim tok long ples bilong mi na wanpela meri i stori long ol long mi, olsem: “Em dispela God em i save lotuim, em i save helpim em long mekim ol dispela samting!”
Ol hevi bilong mi i mekim na mi go klostu moa long God. Dispela i strongim tru bilip bilong mi. Na mi tingim aposel Pol, em tu i karim wanpela hevi long skin em i kolim olsem ‘nil i sutim skin.’ Ating em hevi bilong ai bilong em. (2 Korin 12:7; Galesia 4:13) Dispela i no pasim em long “autim tok strong.” Olsem em, mi ken tok: “Olsem na nau mi save amamas moa yet long stap olsem man i no gat strong. . . . Long wanem, taim mi no gat strong, long dispela taim tasol mi gat strong tru.”—Aposel 18:5; 2 Korin 12:9, 10.
Wanpela bikpela samting tru mi wetim bilong bihain em Baibel i as bilong en, em kirap bek. Mi laik lukim long ai bilong mi yet gutpela mama bilong mi, na ol susa na brata bilong mi—dispela samting mi wetim i save helpim mi tru. Baibel i tok promis olsem “ol aipas bai ol i lukluk” na “God bai i kirapim bek ol man i dai pinis, em ol stretpela man na ol man nogut wantaim.” (Aisaia 35:5; Aposel 24:15) Ol kain samting olsem i mekim gut bel bilong mi na mi amamas long tingim na wetim ol gutpela samting bai kamap bihain aninit long Kingdom bilong God!
[Piksa long pes 15]
Papa bilong mi, em i stadi long Baibel wantaim mi
[Piksa long pes 15]
Long haus kuk bilong mi
[Piksa long pes 15]
Mi wantaim wanpela pren bilong mi long wok autim tok