Helpim Aipas Long Kisim Save Long Jehova
1. Olsem wanem Jisas i soim pasin sori long tupela aipas?
1 Sampela de tasol i stap na Jisas bai dai. Taim em i lusim Jeriko na wokabaut i go, tupela aipas i singaut olsem: “Bikpela, . . . marimari long mitupela!” Maski Jisas i wok long tingim tingim bikpela hevi bai painim em, em i stop na singautim dispela tupela man, na oraitim ol. (Mat. 20:29-34) Olsem wanem yumi inap bihainim pasin sori Jisas i mekim long tupela aipas?
2. Olsem wanem yumi inap autim tok long wanpela aipas yumi bungim em long pablik ples?
2 Helpim Ol: Sapos yu bungim wanpela aipas, ating long ol pablik ples, tokim em yu husat na yu laik helpim em. Planti taim ol man i save mekim nogut long ol kain man olsem, olsem na ating pastaim em bai tingting planti. Tasol ating pasin bilong yu long toktok gut wantaim em na yu soim olsem yu laik helpim em, dispela bai mekim em i stap bel isi. Tingim, i gat kain kain aipas, na sapos yu tingim gut dispela em bai helpim yu long save long hau yu inap helpim wanpela aipas. Taim yu helpim em pinis, ating yu ken tokim em olsem yu insait long wanpela wok bilong skulim ol man long Baibel. Tokim em yu laik ritim wanpela skripsa long em, olsem Song 146:8 o Aisaia 35:5, 6. Sapos em i save long ritim brel o rait bilong ol aipas, askim em sapos em i laikim wanpela buk samting long rait brel we bai helpim em long save moa long Baibel. Na tu, yu ken helpim em na kisim wanpela buk samting em ol i rekodim na i stap long jw.org. Sapos kompiuta bilong em i gat dispela program bilong ritim ol tok i save kamap long skrin na em inap harim, ating em bai amamas tu long kisim nius samting long kain fail olsem Rich Text Format (RTF) i stap long jw.org em yu inap daunlodim.—Lukim blok “Taim Yu Helpim Wanpela Aipas . . . ”
3. Olsem wanem yumi inap painim na helpim ol aipas long teritori bilong yumi?
3 Wok Long Painim Ol Aipas: Wan wan taim tasol yumi save bungim ol aipas taim yumi autim tok long ol haus, long wanem, planti bilong ol i save sem long toktok wantaim ol man ol i no save long ol em ol i kam long haus bilong ol. Olsem na yumi mas wok strong long “painimaut gut” ol kain man olsem bambai yumi inap autim tok long ol. (Mat. 10:11) Olsem wanem? Yu gat wanpela wanwok o wanskul husat i aipas? Yu yet i mas go pas long toktok wantaim em. Sapos i gat skul bilong ol aipas i stap insait long teritori bilong yupela, i gutpela long go givim sampela buk samting long rait Brel, em rait bilong ol aipas, long laibreri bilong skul. Yu save long wanpela em wanpela long famili bilong em i aipas? Olsem wanem? Long teritori bilong yupela i gat wanpela oganaisesen em ol i save helpim ol aipas o helpim ol wok bilong lukautim ol haus samting em ol aipas i stap long en? Stori gut long ol narapela long famili, o man i sindaun long risepsen, o bos bilong dispela hap olsem yumi ol Witnes Bilong Jehova i laik helpim ol aipas, na tokim em olsem yumi laik bringim sampela buk samting long rait Brel o ol rekoding bilong sampela buk samting i go long em. Soim em ol tok promis bilong Baibel olsem klostu nau bai God i pinisim tru hevi bilong aipas. Ating yu ken soim em tu long vidio i stap long jw.org nem bilong en “Without It, I Would Feel Lost,” we i kamapim stori bilong wanpela aipas man, na olsem wanem Baibel long rait Brel i bin helpim em. Taim yu stori long as na yu go lukim em, dispela i opim rot long yu inap toktok wantaim ol aipas long dispela hap.
4. Yumi kisim wanem skul long ekspiriens bilong Janet?
4 Wanpela aipas sista, nem bilong em Janet, i go visit long wanpela haus bilong ol aipas. Em i kirap stori wantaim wanpela yangpela meri. Janet i tokim em, “Jisas i bin oraitim ai bilong ol aipas bilong soim samting em bai mekim long ol aipas.” Janet i stori long em long Revelesen 21:3, 4, na kamapim klia olsem wanem Kingdom Bilong God bai inapim dispela tok promis. Meri i stap isi na bihain em i tok: “Mi no bin harim wanpela aipas i bin kamapim kain tok olsem. Planti man i no aipas ol i ting olsem ol man i aipas, long wanem, ol i kisim dispela sik long ol tumbuna bilong ol.” Janet i salim e-mail link bilong buk Baibel i Tok long dispela meri, na nau tupela i save stadi long Baibel tupela taim long wik.
5. Maski yumi no inap oraitim ol aipas olsem Jisas i bin mekim, pasin bilong yumi long helpim ol aipas bai kamapim wanem ol blesing?
5 Tru tumas, yumi no inap oraitim ol aipas olsem Jisas i bin mekim, tasol yumi ken helpim ol man em ol i olsem aipas long ol samting bilong lotu, long wanem, god bilong dispela graun i pasim tingting bilong ol, na tu, ol man i aipas tru, long kliagut long Tok Bilong God. (2 Kor. 4:4) Jisas i oraitim tupela aipas man klostu long Jeriko, long wanem, em i “sori tru” long ol. (Mat. 20:34) Sapos yumi gat wankain tingting long ol aipas, yumi inap kisim amamas long helpim ol long kisim save long Jehova, em man husat bai pinisim tru hevi bilong aipas.