Ol Aipas Bai Lukluk Gen?

JON MILTEN em i aipas, tasol dispela i no pasim em long raitim tupela bikpela stori olsem song (Paradise Lost na Paradise Regained). Na Helen Keller em i aipas na yaupas, tasol dispela i no pasim em long helpim ol man em hap skin bilong ol i bagarap. Tru tumas, planti aipas ol inap mekim kain kain wok. Tasol sapos olgeta man inap lukluk, dispela i gutpela moa, a? Ating bai yu wanbel wantaim dispela tok sapos yu gat wanpela gutpela pren o wanblut i aipas o em i no inap lukluk gut.

Tru, long sampela kantri sampela lain i save lainim ol aipas long mekim sampela samting bilong helpim sindaun bilong ol. I gat ol buk brel na ol dok ol i lainim pinis long helpim ol aipas, olsem na ol inap mekim planti wok bilong lukautim ol yet. Tasol planti man i ting aipas em wanpela samting nogut tru, winim ol narapela sik. Wanpela man bilong raitim buk i tok: ‘Sapos man i aipas, em i no gat rot bilong save long planti samting i kamap.’ Na planti aipas i mas i gat man bilong helpim ol.

Bilong wanem planti man i aipas? Sik trakoma i mekim na inap 9 milion manmeri i aipas. Wanpela buk (The New Encyclopædia Britannica) i stori long sik trakoma olsem: ‘Em i wanpela sik nogut i save kalap long ol man. Taim planti man i sindaun long ol ples i no gat gutpela toilet samting na ol i pas pas, dispela sik i save kamap. Sapos ol i sot long wara bilong waswas, na pekpek i stap nabaut na planti planti lang i kam, dispela sik inap kalap long ol man. Sapos ol inap stretim rot bilong helpim ol rabisman long kisim gutpela sindaun, na i no gat planti lang, na ol i gat wara bilong waswas, bai i no gat planti man i kisim sik trakoma.’ Na inap wan milion manmeri i gat wanpela sik bilong ai, ol i kolim onkosakaiasis. Na narapela sik ol i kolim siroftalmia, em tu i save bagarapim ai bilong planti man. Na i gat sampela sik moa inap mekim man i kamap aipas, olsem: daiabitis, diptiria, misels, skalet fiva, na ol sik bilong pamuk.

Taim ol man i go lapun, ai bilong ol inap go tudak. As bilong dispela em kain kain sik olsem glokoma na katarak. Dispela buk (The New Encyclopædia Britannica) i tok: ‘Long planti kantri, sik katarak i as na planti man i kamap aipas. Tasol dispela sik i no gat hatwok long stretim sapos dokta i katim em.’

Ol i kisim save pinis long ol nupela rot bilong stretim sik bilong ai, tasol i olsem sik aipas i no ken pinis hariap. Na buk i tok moa: ‘Bilong pasim ol sik na man i no ken aipas, na bilong dokta i ken katim na stretim ai, na bilong kisim marasin bilong helpim man i gat sik long ai, i mas i gat rot long dokta i ken helpim em. Planti man i sot long gutpela kaikai na no gat wara o toilet samting; sapos ol i no stretim ol dispela hevi, maski i gat rot bilong stretim sik aipas, planti man bai aipas yet.’

Marasin antibaiotik inap helpim man i gat sik long ai na dokta inap katim ai, ating dispela inap helpim man, tasol samting i bin kamap 2,000 yia i go pinis, em tasol inap pinisim dispela sik aipas.

Jisas i Bin Helpim Ol Aipas

Long tingting bilong yu, tingim wanpela man i gat 30 krismas samting na em i wokabaut long wanpela rot. Tupela aipas i sindaun i stap arere long rot. Taim tupela i harim tok long dispela man i wokabaut i kam, tupela i singaut strong olsem: “Yu mas sori long mitupela.” Ol manmeri i harim tupela i singaut ol i tok strong long tupela i mas pasim maus, tasol tupela aipas i bikmaus moa yet olsem: “Yu mas sori long mitupela.” Long pasin isi dispela man i tok: “Yutupela i laik bai mi mekim wanem long yutupela?” Tupela i tok: “Mitupela i laik bai yu opim ai bilong mitupela.” Em i putim han long ai bilong tupela na wantu tasol tupela inap lukluk!​—⁠Matyu 20:​29-34.

Tupela man ya bipo ol i aipas, nau ol i amamas nogut tru! Tasol planti manmeri i aipas. Dispela i wanpela stori tasol bilong ol aipas. Bilong wanem i gutpela yumi tingim dispela stori? Long wanem, Jisas bilong Nasaret i bin stretim ai bilong tupela aipas. Spirit holi i stap long Jisas na God i makim em bilong ‘i go bringim gutpela tok bilong God long ol rabisman.’ Na God i ‘salim em i kam long tokaut long ol man i aipas long ol i ken lukluk gen.’​—⁠Luk 4:18.

Long strong bilong spirit holi bilong God, Jisas i wokim ol mirakel. “Ol manmeri i lukim ol mauspas i toktok na ol bun krungut i kamap orait na ol lek nogut i wokabaut na ol aipas i lukluk, na ol i tingting planti. Na ol i litimapim nem bilong God bilong Israel.” (Matyu 15:31) Taim Jisas i oraitim ol sikman em i no singaut long pe, na em i no litimapim nem bilong em yet, nogat; em i kamapim pasin sori na pasin marimari bilong Jehova. Tasol Jisas i save tingim tu ol manmeri i aipas long ol samting bilong spirit na “tingting bilong ol i paul nabaut, na ol i stap nogut tru, olsem ol sipsip i no gat wasman.”​—⁠Matyu 9:36.

Em ol gutpela stori, tasol ating nau yu tingting, Olsem wanem long taim bilong yumi? I no gat wanpela man long nau em inap helpim ol man olsem Jisas i bin mekim, a? Olsem na ol mirakel Jisas i bin mekim ol inap helpim yumi? Ol aipas i ken wetim gutpela samting bai kamap? Plis, kaunim stori i kamap bihain long dispela.

[Rait long pes 4]

‘Planti man i sot long gutpela kaikai na no gat wara o toilet samting; sapos ol i no stretim ol dispela hevi, maski i gat rot bilong stretim sik aipas, planti man bai aipas yet.’—Buk The New Encyclopædia Britannica