No Gat Mani Bilong Helpim Ol Aipas

Sapos yumi skelim olgeta aipas i stap long olgeta hap, long olgeta 10-pela 10-pela aipas, inap 8-pela i stap long ol kantri i rabis long mani samting. Bikpela lain tru i stap long hap bilong Saut-is Esia. Wanpela lain (World Health Organization) i tok, long dispela hap, insait long olgeta 25 manmeri, wanpela i aipas o hap aipas. Wanem as tru bilong dispela? As bilong en, em ol i no save kaikai gut, na tu ol i save kisim sik klostu klostu, long wanem ol i no save wasim han o klinim gut ol samting.

Na dispela lain i tokaut olsem sapos ol i gat 2 tausen milion kina, orait long wanpela yia ol inap mekim bikpela wok long stretim dispela sik aipas i stap long ol dispela hap. Dispela mani i no winim mani ol gavman i tromoi bilong baim ol samting bilong pait long olgeta wan wan de, tasol maski​—dispela lain i tok ol i no inap kisim dispela mani bilong helpim ol aipas.

Olsem na dispela lain i save givim wanpela marasin ol i kolim vitamin A long ol pikinini, long wanem ol i no gat mani inap long baim ol marasin o kaikai samting bilong helpim ol dispela lain. Long hap bilong India, na Indonisia, na Banglades, na Filapin, klostu olsem 400,000 pikinini i gat dispela sik, long wanem, kaikai bilong ol i no gat dispela marasin vitamin A i stap long en. Na dispela lain i tok tu olsem long yia 2000 bai i gat olsem 84 milion manmeri long olgeta hap bilong graun ol i aipas o hap aipas.