1990 Inap 2000—Taim Bilong Hevi
TAIM yia 1990 i bin kamap, ol man i tok, ating ol pait i pinis nau na gutaim bai kamap. Tasol nogat. Tingting bilong ol man i paul nabaut.
Bikpela senis i bin kamap long sampela kantri. Gavman bilong ol i senis. Bipo long ol dispela kantri, gavman i bin bosim sampela kampani na bisnis na ol samting bilong kamapim mani, tasol nau ol man yet i save mekim ol dispela samting na wankain hevi i stap—ol dispela wok i no kamap gut. Nau hevi i stap long ol kantri em ol man yet na ol kampani i bosim ol dispela wok—planti man i rabis, na planti ol i stap nating na i no gat wok, na pe bilong ol samting i go antap, na ol dispela kantri i gat planti dinau. Gavman bilong Amerika yet i gat bikpela dinau tru, inap 3 milion milion dola.
Wanpela nius (New York Times) i stori long wanpela hevi nau i go bikpela na nius i tok, ‘Long nau i gat planti man i stap rabis tru na ol i bel hevi i stap.’
Long nau planti man i tingting long lukautim ol yet tasol, na maski long narapela man. Ol i mangalim ol mani kago samting. Ol i tingting tasol long amamasim skin bilong ol, maski ol i mekim nogut long ol narapela man. Na ol i kisim planti drak tu. Wanpela profesa bilong Yunivesiti Rosista, em Christopher Lasch, em i tok, ‘Long nau ol man i lusim stretpela pasin.’
Wanpela saveman bilong ol samting bilong mani, em Arjo Klamer, i tok, ‘Planti man i no bilip moa long ol samting ol man i tok bai kamap; ol dispela samting i bin giamanim ol na nau ol i stap bel nogut na tingting bilong ol i paul; ol i olsem ol lusman i no gat gutpela sindaun.’
Nau yumi save, ol man bilong graun i no inap stretim ol hevi bilong ol. Bikpela hevi i stap long olgeta hap na olgeta lain i tingting planti long i stap bilong ol long bihain. Tasol Baibel i tok pinis long dispela samting bai kamap nau long taim bilong yumi. Baibel i tok: “Long taim bilong las de planti hevi nogut tru bai i kamap.” Na Baibel i tok moa olsem: “Long graun tingting bilong olgeta lain man bai i bagarap tru na . . . ol bai i tingting planti na pret moa yet.”—2 Timoti 3:1; Luk 21:25, 26.
[Piksa Kredit Lain long pes 29]
Fotografía de Publicaciones Capriles, Caracas, Venezuela