I Gutpela Yumi Gat Dinau?

‘NO KEN tru tromoi mani bilong yu paslain long yu kisim.’ Em pasin bilong planti man long nau, a? Olsem wanem? Yu ting dispela tok bilong presiden bilong Amerika long bipo, em Thomas Jefferson, em pasin bilong bipo tasol na i no pasin bilong nau?

Long planti kantri, pe bilong ol samting i go antap, tasol ol man i no kisim bikpela pe, olsem na mani bilong ol i pinis kwik. Maski man i bungim liklik mani, em i save pinis hariap. Na nau i gat planti hevi long mani na ol bisnis i wok long bagarap, olsem na ol man i no tingim moa wanem samting i nambawan samting. Tasol stretpela pasin i bikpela samting. Planti man i giaman long baim takis, na ol i no bekim dinau bilong ol, olsem na man i hatwok tru long bihainim stretpela pasin na maus bilong bel. Long olgeta de ol man i no malolo long stori long mani na bisnis. Na ol niuspepa, magasin, na televisen, ol tu i save kamapim kain kain rot bilong bungim mani o painim sampela mani moa, na ol man i save stori long kain kain rot bilong stretim hevi bilong mani. Olsem na i stret yu tingting planti long painim rot bilong lukautim yu yet na famili bilong yu.​—1 Timoti 5:8.

I no planti man i gat mani na gutpela sindaun, olsem na yu ken mekim wanem bilong helpim famili bilong yu long abrusim planti hevi? Orait, i gat wanpela bikpela samting yu mas tingim.

No Ken Kisim Planti Dinau

I gat wanem as na sampela man i dinau? Sampela man i no gat wanpela bikpela hevi olsem sik bambai ol i mas dinau. Nogat. Ating ol i gat bikpela laik long kisim sampela samting bilong skin, olsem kago samting. Tasol i no olsem man i kisim dinau, em i mekim pasin i no stret, nogat. Olsem: Ating i gutpela man i kisim dinau long beng inap long em i ken baim olgeta wanpela haus, nogut em i mas tromoi bikpela mani long olgeta wik samting bilong baim haus. O ating famili bilong man i mas i gat ka, olsem na em i kisim dinau bilong baim wanpela ka. Papa i laik famili bilong em i stap amamas, na em i laik mekim gut wok bilong em olsem man marit na papa. Na ating em i ting, i stret famili bilong em i kisim ol samting bilong skin olsem ol narapela famili i save kisim.

Tru, ating yumi tingting long kisim dinau bilong baim wanpela samting yumi gat bikpela laik long en tasol i no olsem yumi mas kisim dispela samting. Taim yumi kisim sampela samting bilong skin yumi amamas, a? Olgeta man i laik kisim nupela klos, o nupela su, o wanpela samting olsem nupela ka. Na ating olgeta man i laik kisim wanpela gutpela haus, winim olpela haus bilong ol. Tasol was gut! Ol bisnisman inap grisim yu. Ol i kisim bikpela mani long baim kago i go long ol man. Nogut yu baim wanpela samting i no inap helpim sindaun bilong yu na yu no gat mani bilong baim.

Na tingim: Yu mas bekim dinau. Dispela inap kamapim planti hevi insait long famili olsem kros na pait. Wanpela man bilong raitim ol stori (Henrik Ibsen), em i tok tru taim em i tok: ‘Taim famili i dinau bel isi bilong famili bai pinis.’ Sapos yu no bekim ol dinau long taim stret, dispela inap bagarapim gutpela nem bilong yu. Planti man i no hatwok long tromoi mani ol i kisim olsem dinau, tasol ol i hatwok long bekim wantaim liklik hap mani moa antap long dinau olsem winmani. Na ol i kisim save olsem, samting ol i bin baim, em i no kamapim amamas ol i ting em bai kamapim.

Ol gavman i no les long kisim planti dinau, na dinau bilong ol wantaim winmani i go bikpela tru. Ating em pasin bilong ol gavman, tasol yu ting i stret yumi bihainim pasin bilong ol gavman i gat ol bikpela dinau? Ol i ting dinau bai helpim ol man long kisim gutpela sindaun, tasol dispela inap mekim na ol i kamap rabis moa na ol i no stap bel isi. Wanpela savetok bilong Denmak i tok: ‘Yumi hatwok long tromoi mani bilong bret yumi kaikai pinis.’

Dinau i save kamapim planti hevi, tasol ol hevi i go liklik taim yu bihainim savepasin long mekim wok long mani. Olsem na tingting gut pastaim, no ken hariap long baim ol samting bambai yu mas kisim dinau. Na long ol kantri, em pe bilong ol samting i antap tru, i gat sampela rot na ol man i no ken tromoi nating mani bilong ol. Olsem: Sampela taim ol stua i daunim pe bilong sampela samting olsem kaikai, orait baim kaikai samting long dispela taim, na baim tasol ol samting yu inap mekim wok long en. Taim yu gat laik long baim wanpela samting, yu mas tingting gut pastaim. Skelim gut mani bilong yu; sapos mani i no inap, wet na bungim mani na baim, o sapos yu no inap, maski long baim.

Askim skin bilong yu yet: Sapos mi kisim dinau, dispela bai putim hevi long famili bilong mi? Sapos mi no inap bekim dinau, dispela bai bagarapim nem bilong mi? Sapos yu no inap bekim dinau, ating man i no ken bilip hariap long yu! I gat ol gutpela tok bilong helpim yu na stiaim tingting bilong yu long dispela samting. I gutpela sapos yu skelim tok bilong Baibel na save, Baibel inap helpim yu na famili long skelim pasin bilong dinau​—bai yu kisim dinau o nogat.

Baibel Inap Helpim Yu?

Baibel inap helpim yumi olgeta long bilip tru olsem Jehova inap helpim yumi​—em bikpela samting. Yumi olgeta i mas i gat Man bilong helpim yumi long dispela taim bilong “planti hevi.” (2 Timoti 3:1) Baibel i tokim yumi olsem: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ Olsem na yumi ken strongim bel bilong yumi, na yumi ken tok olsem, ‘Bikpela i save helpim mi na mi no inap pret. Ol man i no inap mekim wanpela samting long mi.’ ” (Hibru 13:​5, 6) Yumi mas strongim bilip bilong yumi long God na bilip olsem em Man bilong lukautim yumi long ol samting bilong skin!

Baibel i no tokim yumi wan wan long yumi mas mekim wanem bilong painim mani, tasol God i kamapim sampela gutpela tok long Baibel bilong helpim yumi. Krais Jisas i tokim ol man i harim tok bilong em long tingim ol samting bilong spirit pastaim. Em i tok: “Ol manmeri . . . i stap rabis tru long ol samting bilong God, em ol i ken amamas.” (Matyu 5:3) Na Baibel i tokim yumi long putim sampela mak olsem: “Wok strong long sindaun isi na . . . wok long han bilong yupela yet, na bai yupela inap lukautim yupela yet, olsem bipo mipela i bin tokim yupela. Olsem bai yupela i no sot long wanpela samting, na ol man i stap ausait long sios [kongrigesen], ol bai i amamas long pasin bilong yupela.” (1 Tesalonaika 4:​11, 12) Sapos yumi laik sindaun isi na amamas, ating yumi no ken dinau hariap na baim olgeta samting, em ol samting yumi no gat wok long en o samting i gat bikpela pe, na bai yumi hatwok long bekim dinau, a?

Baibel inap helpim yumi long kisim stretpela tingting long dispela samting. Man bilong raitim Buk Sindaun, em i gat stretpela tingting taim em i askim God olsem: “Yu no ken larim mi i kamap maniman o rabisman. Nogat. Yu ken givim mi kaikai inap long skel bilong mi. Nogut mi gat planti samting tumas na mi givim baksait long yu, na mi tok, ‘Bikpela em husat?’ Na nogut mi kamap rabisman na mi stilim ol samting na mi daunim nem bilong yu, God bilong mi.” (Sindaun 30:​8, 9) Olsem na yu no ken sem sapos yu sot long sampela samting inap liklik taim. Nogut yu kisim tingting bilong planti man, ol i ting, ol i mas kisim planti samting bilong i stap amamas, na ol i laik kisim ol samting olsem ol narapela man i kisim, o ol i tingting planti long mani kago.​—Matyu 6:​31-33.

Na tu, Baibel inap helpim yu long lain long kamapim ol gutpela pasin. Lain long pasin bilong skelim gut mani no ken tromoi nating, tasol helpim yet ol narapela, na amamas long ol samting yu inap baim. Sapos yu wanpela yangpela, nogut yu laik kisim hariap ol samting ol bikpela man i bin wok planti yia bilong kisim. Nogut pasin bilong laikim tumas mani kago i kalabusim yu. Baibel i givim gutpela tok long yumi olsem: I no gat rong long yumi kisim mani, tasol nogut yumi laikim tumas mani. Em i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.” (1 Timoti 6:​9, 10) Yu mas save, ol samting yu mas kisim bilong helpim sindaun bilong yu na ol samting yu laik kisim i narapela narapela kain!

Tasol olsem wanem? Yu ting pe bilong yu i liklik tumas? Tru, ating yu bel hevi sapos yu sot long sampela samting, a? Tasol yu mas amamas long lusim sampela samting i no bikpela samting long sindaun bilong yu, nogut yu dinau long kisim dispela samting na planti hevi i painim yu o mani bilong yu i pinis olgeta. Skelim gut mani bilong yu pastaim na no ken tromoi nating mani. Ating wanpela gutpela pren i gat save long mani samting, em inap givim sampela gutpela save long yu. Olsem wanem? Sapos yu lain long mekim narapela wok, dispela bai helpim yu? Tingim: Maski yu gat wanem wanem kain sindaun, yu mas bilip tru long Jehova, bihainim ol tok bilong Baibel, na tingim ol samting bilong God pastaim​—em bikpela samting.​—Filipai 4:​11-13.

Tru tumas, sapos yu kisim dinau, ating bai yu kisim planti hevi. I gat wanpela savetok olsem: ‘Man i gat dinau, i olsem umben i kalabusim em.’ Dinau inap mekim na sindaun bilong famili i bagarap, o sik i painim yu, o yu bagarap long ol samting bilong spirit. Na sapos man i dinau, dispela inap mekim na em i go rabis olgeta. Sindaun 22:7 i tok: “Ol maniman i save bosim ol man i sot long ol samting. Na ol man i gat dinau, ol i stap olsem wokboi nating bilong ol man i givim dinau.” Olsem na sapos yu gat rot long abrusim, no ken kisim dinau. Yumi ken kisim gutpela tingting long tok aposel Pol i givim long ol Kristen, olsem: “Yupela i no ken larim wanpela dinau bilong yupela i stap. Dispela wanpela dinau tasol i save stap oltaim, em dinau bilong givim bel bilong yumi long ol arapela, long wanem, man i givim bel bilong em long narapela man em i bihainim tru lo.”​—Rom 13:8.

Maski wok bisnis long kantri bilong yu i wok long bagarap o nogat, strongim bel na wetim nupela taim God bai kamapim. Klostu nau bai i no gat wanpela man i gat wok long givim mani long man olsem dinau, na i no gat wanpela man i mas kisim dinau. Aninit long Kingdom bilong God bai i no gat wanpela rabisman. Tok promis bilong Jehova bai kamap tru: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” (Song 72:​12, 13) Olsem na long dispela nupela taim, ol man i no ken hatwok long sindaun bilong ol, nogat; “bai ol i sindaun gutpela tumas na amamas i stap.”​—Song 37:11.

[Piksa long pes 24]

Thomas Jefferson

[Kredit Lain]

Painting by Gilbert Stuart. Courtesy Bowdoin College Museum of Art/Dictionary of American Portraits/Dover

[Piksa long pes 25]

Bikpela dinau inap kamapim planti hevi insait long marit