Baibel i Tok Wanem?

Pasin Bilong Givim na Kisim Dinau Namel Long Ol Pren

“MAN NOGUT I SAVE DINAU LONG OL SAMTING NA EM I NO SAVE BEKIM DINAU. TASOL STRETPELA MAN I SAVE MEKIM GUTPELA PASIN NA EM I SAVE GIVIM PLANTI SAMTING LONG OL ARAPELA MAN.”​—SONG 37:⁠21.

“YU NO ken kisim dinau o givim dinau, long wanem, planti taim dispela mani i lus na pasin pren namel long yutupela bai bagarap.” Em tok bilong Wiliam Sekspia, em wanpela man bilong Inglan i save raitim ol stori. Em i kolim wanpela gutpela tingting bilong bipo tru. Tru tumas, i no gat planti samting inap bagarapim pasin pren namel long ol man olsem pasin bilong kisim o givim dinau. Maski yumi stretim rot bilong bekim dinau na yumi gat tingting long mekim olsem, tasol sampela taim ol samting i no save kamap olsem yumi bin tingting long en.​—⁠Saveman 9:​11, 12.

Kain kain samting inap kamap long i stap bilong man, na dispela i mekim na i hatwok long em long bekim dinau o em i no inap bekim dinau. O ating man i bin givim dinau, wantu em i gat wok long dispela mani em i bin givim long narapela man. Taim kain samting olsem i kamap, hevi inap kamap namel long ol pren, olsem Sekspia i bin kamapim.

Tru, ating i gat gutpela as na wanpela man i dinau long sampela mani. Olsem: Em i kisim bikpela hevi long mani, long wanem, wanpela bikpela bagarap i painim em o ol i pinisim em long wok mani, na em i ting olsem em i mas kisim dinau. Baibel i strongim ol man long helpim ol man i sot sapos ol inap mekim olsem. (Sindaun 3:​27) Ating wanpela rot long helpim narapela, em long givim dinau long em. Tasol ol Kristen i givim o kisim dinau, ol i mas ting olsem wanem long wok bilong ol long stretim dinau?

Ol Lo Yumi Mas Tingim

Baibel i no wanpela buk bilong givim save long yumi long pasin bilong stretim ol samting bilong mani. Em i no stori long olgeta liklik liklik samting bilong pasin bilong kisim o givim dinau. Olsem: Em i no tok i stret o i no stret long tokim man i kisim dinau long em i mas bekim dinau wantaim interes, olsem winmani, na hamas kina em i mas givim olsem interes. Man i givim dinau na man i kisim dinau, ol yet i mas pasim tok long ol dispela samting.a Tasol Baibel i gat ol lo i klia na i gutpela bilong stiaim tingting na pasin bilong man i kisim o givim dinau.

Tingim sampela lo i stret long man i kisim dinau. Aposel Pol i tokim ol Kristen olsem ol i mas dinau long wanpela samting tasol, ‘em dinau bilong givim bel bilong ol long ol arapela.’ (Rom 13:⁠8) Tru, Pol i kamapim hia wanpela bikpela lo, tasol tok bilong em i olsem wanpela tok lukaut. Sampela taim em i gutpela long yumi sot long wanpela samting, winim pasin bilong kisim dinau long wanpela man. Bilong wanem? Sindaun 22:7 i tok: “Ol man i gat dinau, ol i stap olsem wokboi nating bilong ol man i givim dinau.” Man i mas save, taim em i no bekim yet dinau em i gat wok long mekim olsem. I olsem mani kago bilong em ol i no bilong em olgeta. Em i mas tingting strong long bekim dinau long rot tupela i bin makim. Sapos em i no mekim olsem ol hevi bai kamap.

Olsem: Sapos man bilong kisim dinau em i no bekim hariap, man i bin givim dinau em inap kros. Ol samting man bilong kisim dinau em i mekim​—⁠olsem em i baim ol klos, o em i kaikai long ol haus kaikai, o em i go malolo long wanpela hap, dispela inap mekim na man i bin givim dinau inap kisim tingting nogut long dispela samting. Em inap bel nogut long man i kisim dinau. Ating pasin pren bilong tupela na bilong famili bilong ol i no strong moa o em inap bagarap olgeta. Ol dispela samting nogut inap kamap sapos man i kisim dinau em i no bihainim tok promis bilong em.​—⁠Matyu 5:​37.

Tasol olsem wanem sapos man i kisim dinau em i no inap bihainim tok promis bilong em, long wanem, wanpela bikpela samting i kamap na em i no inap stretim? Olsem wanem? Dispela bai mekim na em i no gat wok long bekim dinau? Ating nogat. Man bilong raitim Song i tok, stretpela man “i save inapim ol promis em i bin mekim, maski dispela pasin i givim bikpela hevi long em.” (Song 15:⁠4) Long kain taim olsem, man i kisim dinau em i bihainim gutpela pasin na tingting sapos wantu em i tokim man em i kisim dinau long em long ol samting i kamap. Nau tupela inap pasim tok long mekim narapela samting bilong stretim dinau. Dispela bai mekim na tupela i stap wanbel, na God Jehova bai amamas long dispela pasin.​—⁠Song 133:1; 2 Korin 13:⁠11.

Ol samting man i mekim bilong stretim dinau i kamapim long ples klia pasin tru bilong em. Man i ting pasin bilong bekim dinau i liklik samting tasol, dispela i kamapim klia olsem em i no save tingim ol narapela man. Em nau, kain man olsem i save tingim em yet tasol​—⁠laik bilong em yet i namba wan samting. (Filipai 2:⁠4) Sapos wanpela Kristen i no bekim dinau na long laik bilong em yet em i mekim olsem, dispela inap bagarapim nem bilong em long ai bilong God, na pasin bilong em inap kamapim klia olsem bel bilong em i nogut na em i gat pasin mangal.​—⁠Song 37:⁠21.

Man i Givim Dinau

Bikpela wok i stap long man i kisim dinau, tasol i gat ol lo i stret long man i givim dinau. Baibel i makim olsem sapos yumi inap helpim ol man i sot, yumi mas mekim olsem. (Jems 2:​14-​16) Tasol dispela i no makim olsem wanpela man i mas givim mani olsem dinau long narapela man, maski dispela man i laik kisim dinau em i wanpela brata spirit. Baibel i tok: “Man i gat gutpela tingting, em i save olsem, hevi i laik kamap long em na em i abrusim.”​—⁠Sindaun 22:⁠3.

Taim yumi save gut long ol hevi bilong givim na kisim dinau, man i gat gutpela tingting em bai skelim gut ol samting taim wanpela man i singaut long kisim dinau long em. Olsem wanem? I gat as tru na man i mas kisim dinau? Em i bin skelim gut dispela samting? Man i laik kisim dinau, em i save stretim gut ol samting bilong em na em i gat gutpela nem? Em i redi long sainim wanpela pepa i kolim ol samting yupela i pasim tok long mekim bilong stretim dinau? (Skelim wantaim Jeremaia 32:​8-​14.) Em i gat tingting tru long bekim dinau?

Dispela i no makim olsem Kristen i no ken givim dinau long man i sot sapos dispela man bai i no inap bekim. Wok bilong Kristen long helpim ol narapela i winim tru wok bisnis em man inap kisim winmani long en. Aposel Jon i tok: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man.” Em nau, ol Kristen i ‘no ken laikim ol brata long tok tasol o long maus tasol. Nogat. Ol i mas givim bel long ol na mekim gutpela pasin long ol.’​—⁠1 Jon 3:​17, 18.

Sampela taim wanpela Kristen i no laik givim mani olsem dinau long brata bilong em i sot. Ating em i laik givim mani long em olsem presen o helpim em long narapela rot. Na taim man bilong kisim dinau i hatwok long bekim, man i bin givim dinau inap marimari long em. Em i ken tingim senis i bin kamap long i stap bilong man i kisim dinau, na em i skruim hap taim moa bilong bekim dinau, o daunim dinau, o rausim dinau olgeta. Ol dispela samting em samting olgeta wan wan yet i mas skelim na pasim tok long bel long ol samting ol i laik mekim.

Ol Kristen i mas tingim olsem God i save lukluk long olgeta samting, na em bai skelim pasin bilong yumi na ol wok yumi mekim long mani samting bilong yumi. (Hibru 4:​13) Baibel i tok, yumi ‘mas givim bel bilong yumi long God na long ol man, na long dispela pasin yumi mas mekim olgeta samting yumi save mekim.’ Dispela tok i stret long pasin bilong givim na kisim dinau namel long ol pren.​—⁠1 Korin 16:⁠14.

[Futnot]

[Piksa long pes 14]

“Man Bilong Senisim Mani na Meri Bilong Em” (yia 1514), Kwentin Masis i wokim dispela piksa

[Kredit Lain]

Scala/Art Resource, NY