Inap Mi Ken Singaut Long Kisim Dinau Long Brata Bilong Mi?
LASPELA pikinini bilong Saimon i gat sik na em i mas kisim kwik sampela marasin. Tasol Saimon em i rabis tru na em i no gat mani bilong baim. Orait em i ken mekim wanem? Wanpela wanbilip Kristen, nem bilong em Maikel, em i gat planti mani liklik. Saimon i ting Maikel bai givim mani long em olsem dinau. Tasol long bel bilong em, Saimon i save em bai no inap bekim dispela dinau.a
Taim Saimon i kamapim hevi bilong em long Maikel, em nau, Maikel i tingting planti. Em i save, pikinini bilong Saimon i mas kisim dispela marasin, tasol em i pilim olsem Saimon bai i no inap bekim dispela mani, long wanem, em i hatwok tru long painim mani bilong baim kaikai bilong famili bilong em. Orait Maikel i mas mekim wanem?
Long planti kantri, wok mani bilong man inap pinis wantu tasol, na nau ol i no gat mani bilong baim marasin o insurens bilong bekim mani ol i bin tromoi long marasin. Na long sampela hap ol i no inap kisim dinau long beng, o sapos ol i kisim dinau long beng, orait taim ol i bekim ol i mas tromoi bikpela hap mani moa antap long en, olsem interes. Olsem na taim wanpela hevi olsem sik samting i kamap, i gat wanpela rot tasol: Ol i mas kisim dinau long wanpela pren bilong ol. Tasol nogut ol i kirap kwik na singaut long dinau—pastaim ol i mas tingim sampela bikpela samting.
Skelim Gut Pastaim
Baibel i kamapim sampela tok bilong stiaim tingting bilong man bilong givim dinau na man bilong kisim dinau. Sapos yumi bihainim ol dispela tok, bai yumi inap abrusim planti hevi na kros inap kamap long dispela pasin.
Olsem: Baibel i tok olsem yumi no ken ting pasin bilong kisim dinau em i liklik samting tasol. Aposel Pol i tokim ol Kristen long Rom: “Yupela i no ken larim wanpela dinau bilong yupela i stap. Dispela wanpela dinau tasol i save stap oltaim, em dinau bilong givim bel bilong yumi long ol arapela, long wanem, man i givim bel bilong em long narapela man em i bihainim tru lo.” (Rom 13:8) I gutpela sapos Kristen i gat wanpela dinau tasol bilong bekim—em bilong laikim tru ol narapela. Olsem na pastaim yumi ken askim skin bilong yumi: ‘Mi mas kisim tru dispela dinau?’
Sapos yumi tok, yes yumi mas kisim tru, orait em i pasin bilong gutpela tingting sapos yumi skelim gut ol hevi inap kamap taim yumi gat dinau yumi mas bekim. Krais Jisas i kamapim klia olsem taim yumi tingting long mekim sampela bikpela samting, pastaim yumi mas tingim gut na skelim ol samting bai yumi mekim. Em i tokim ol disaipel: “Sapos wanpela bilong yupela i laik wokim wanpela haus bilong ol man i ken i stap na was long ol samting bilong en, orait ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat.” (Luk 14:28) Yumi mas bihainim dispela lo taim yumi skelim olsem yumi bai askim wanpela brata long givim dinau long yumi o nogat. Taim yumi skelim hamas mani yumi laik kisim olsem dinau, yumi mas skelim olsem yumi bai bekim olsem wanem, na wanem taim bai yumi bekim.
I stret man bilong givim dinau em i mas save olsem wanem bai yumi bekim dinau, na wanem taim bai yumi bekim. Taim yumi skelim gut dispela samting, bai yumi inap tokaut klia long em. Olsem wanem? Yumi bin skelim hamas mani yumi mas bungim bilong bekim dispela dinau insait long sotpela taim liklik? Tru, i no hatwok long tokim brata: “Sapos i gat rot, bai mi bekim hariap. Yu save yu inap bilip long tok bilong mi.” Tasol sapos yumi mekim olsem, dispela i no gutpela pasin tumas, a? Taim yumi singaut long dispela dinau, yumi mas pasim tok strong long bel olsem yumi bai bekim, long wanem, Jehova i laik bai yumi mas mekim olsem. Song 37:21 i tok: “Man nogut i save dinau long ol samting na em i no save bekim dinau.”
Sapos yumi skelim gut olsem yumi bai bekim dinau olsem wanem, na wanem taim bai yumi bekim, dispela bai kirapim yumi long tingting olsem em i wanpela bikpela tok promis yumi mekim, na em i no liklik samting tasol. Taim yumi tingim gut dispela samting, orait ating bai yumi no dinau nating tasol. Sapos yumi ken abrusim pasin bilong kisim dinau, dispela inap helpim yumi long sampela samting. Sindaun 22:7 i toksave olsem: “Ol man i gat dinau, ol i stap olsem wokboi nating bilong ol man i givim dinau.” Na maski man bilong kisim dinau na man bilong givim dinau ol i brata spirit, dispela dinau inap mekim na bai i gat hevi i kamap namel long tupela. Na pasin bilong kisim dinau i bin kamapim sampela kros na dispela i bagarapim bel isi bilong sampela kongrigesen.
Toksave Long As na Yu Mas Kisim Dinau
I stret man bilong givim dinau em i mas save bai yumi mekim wanem wok long mani em i givim long yumi olsem dinau. Olsem wanem? Yumi kisim dinau long ol narapela tu? Sapos olsem, orait yumi mas tokaut klia long em long dispela samting, long wanem, dispela inap makim olsem yumi inap bekim dispela dinau o nogat.
Em i bikpela samting tru long yumi mas kamapim klia olsem dispela dinau i bilong wanpela bisnis o i gat wanpela hevi i kamap, olsem sik samting, na yumi mas kisim dinau. I no gat wok long wanpela brata i mas givim dinau bilong helpim wanpela wok bisnis narapela brata i laik kirapim, tasol ating em bai pilim olsem em i mas helpim dispela brata sapos em i save i gat wanpela hevi i bin painim em na i no asua bilong em yet, na em i no gat mani bilong baim kaikai, klos, marasin samting bilong famili. Sapos brata i tokaut stret na mekim tok tru long ol dispela samting, dispela inap mekim na bai i no gat sampela kros i kamap long en.—Efesus 4:25.
Raitim Long Pepa
Ol tok yumi bin pasim wantaim brata long ol samting bilong dispela dinau, yumi mas raitim long pepa. Dispela em i bikpela samting bilong helpim yumi long abrusim sampela kros inap kamap bihain. Yumi inap lusim tingting long sampela samting bilong dispela tok yumi bin pasim sapos yumi no raitim long pepa. Yumi mas raitim hamas mani yumi bin kisim na wanem taim yumi mas bekim. Na i gutpela sapos man bilong givim dinau na man bilong kisim dinau, tupela wantaim i raitim nem bilong ol long pepa, na ol i ken wokim tupela pepa olsem, na bai tupela i gat pepa bilong ol yet. Baibel i makim olsem taim narapela i givim mani long narapela olsem dinau o bilong baim wanpela samting, ol i mas raitim long pepa. Klostu long taim ol Babilon i bagarapim Jerusalem, Jehova i tokim Jeremaia long baim hap graun long wanpela wanblut bilong em. Orait yumi ken stori long ol samting ol i bin mekim na dispela inap helpim yumi.
Jeremaia i tok: “Mi baim dispela graun. Mi raitim kontrak bilong baim graun na mi pasim na putim mak bilong mi long en, long ai bilong ol sampela man. Na mi skelim silva inap 200 gram na mi givim long Hanamel olsem pe bilong dispela hap graun. Mi bin raitim tupela pepa bilong kontrak bilong baim graun na tupela pepa i gat ol tok bilong ol samting mitupela i promis long mekim. Wanpela pepa mi pasim na narapela mi no pasim. Na mi kisim dispela tupela pepa na mi givim long Baruk, pikinini man bilong Neria, na tumbuna pikinini bilong Masea. Na planti man i lukim mi mekim ol dispela samting bilong baim graun. Brata bilong mi, Hanamel, na ol man i bin raitim nem bilong ol long kontrak, na ol arapela Juda i sindaun i stap long dispela hap, olgeta i lukim dispela samting mi mekim.” (Jeremaia 32:9-12) Tru, dispela em i stori bilong baim graun, na i no bilong kisim dinau, tasol em i soim yumi olsem taim yumi mekim wok long ol samting bilong mani wantaim narapela man, em i bikpela samting long yumi mas kamapim klia ol tok, nogut sampela hap tok i no klia na man inap kisim tupela kain tingting long en.—Lukim Wastaua, Ogas 1, 1997, pes 30, 31.
Sapos sampela hevi i kamap, ol Kristen i mas wok strong long stretim long wankain pasin em Jisas i bin tok long en long Matyu 18:15-17. Tasol wanpela elda, em i bin wok long helpim ol brata long kain samting olsem, em i tok: “Planti taim, ol tok ol i bin pasim wantaim ol i no bin raitim long wanpela pepa. Olsem na tupela i no kamapim klia olsem man bilong kisim dinau em i mas bekim olsem wanem. Mi bilip tru olsem taim yumi raitim ol dispela samting long pepa, em i makim olsem yumi laikim tru narapela, na i no makim olsem yumi no bilip long em.”
Taim yumi mekim wanpela tok promis, yumi mas wok strong long truim dispela tok. Jisas i tok: “Yupela i mas tok ‘Yes’ na ‘Nogat’ tasol. Em inap. Tok ol i save skruim long dispela, em ol tok Satan yet i kamapim.” (Matyu 5:37) Sapos i gat wanpela hevi i kamap na yumi no inap bekim dinau long taim stret olsem yumi bin makim, orait kwiktaim yumi mas toksave long man yumi bin kisim dinau long en na tokim em klia long samting i bin kamap. Ating em bai larim yumi i bekim isi isi na em bai givim bikpela hap taim liklik long yumi.
Tasol maski taim nogut i painim yumi, i no olsem yumi no gat wok moa long bekim ol dinau. Man i pret long Jehova em i save wok strong long truim tok promis bilong em. (Song 15:4) Maski sampela samting i kamap em yumi no bin tingim, yumi mas redi long lusim sampela samting bilong yumi bambai yumi inap bekim ol dinau bilong yumi, long wanem, yumi Kristen na yumi gat wok long mekim olsem.
Tingting Gut Taim Yu Laik Givim Dinau
Tru, man bilong kisim dinau em i mas skelim gut ol samting pastaim. Tasol dispela brata em i bin singaut long kisim dinau long en, em tu i mas skelim gut pastaim. Taim yumi no givim mani yet, yumi bihainim savepasin sapos yumi tingim gut dispela samting. Baibel i laik kirapim yumi long tingting gut pastaim. Em i tok: “Taim wanpela man i kisim dinau, yu no ken promis long bekim dispela dinau sapos em yet i no inap.”—Sindaun 22:26.
Nogut yu mekim tok promis hariap—pastaim yu mas tingim ol samting inap kamap sapos dispela brata i no inap bekim dinau long yu. Olsem wanem? Dispela bai mekim na nau yu yet yu sot tru long mani? Maski brata i gat laik tru long bekim dinau, sampela hevi samting inap painim em, o em i no bin skelim gut pastaim na em i bin ting em inap bekim, tasol nogat. Jems 4:14 i tokim yumi olgeta: “Yupela i no save wanem samting bai i kamap long tumora. Laip bilong yupela i olsem smok i save kamap na i stap liklik taim tasol na i pinis olgeta.”—Skelim wantaim Saveman 9:11.
Na sapos wanpela i laik kisim dinau bilong wokim bisnis, bai yu bihainim savepasin sapos yu tingting gut olsem dispela man i gat gutpela nem o nogat. Em i gat nem olsem man yumi inap bilip long em na em i save bihainim ol tok promis bilong em, o em i no gat save long pasin bilong lukautim gut mani? Em i save go long ol brata insait long kongrigesen na askim ol long givim dinau long em? I gutpela sapos yu tingim gut dispela tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”—Sindaun 14:15.
Sampela taim, sapos yumi givim dinau long wanpela man, dispela i no inap helpim em. Dispela inap putim hevi long em na em i no ken amamas moa. Olsem wanem? Yumi laik bai dispela brata i kamap “wokboi nating” bilong yumi? Nogut em i no inap bekim dinau na em i sem long lukim yumi, na nau yumi no pas gut moa wantaim.
Sapos em i sot tru long mani, orait olsem wanem? Yumi inap givim sampela mani long em olsem presen, maski dispela mani i no bikpela olsem dinau em i bin singaut long en? Baibel i laik kirapim yumi long mekim pasin sori taim yumi lukim brata bilong yumi i sot long ol samting. Man bilong raitim Song i tok: “Stretpela man i save mekim gutpela pasin na em i save givim planti samting long ol arapela man.” (Song 37:21) Pasin bilong laikim tru narapela i mas kirapim yumi long helpim ol brata i sot long ol samting.—Jems 2:15, 16.
Tingting Gut Pastaim
Pasin bilong kisim dinau em inap kamapim sampela kros na hevi, olsem na i gutpela yumi ken ting olsem, sapos i no gat narapela rot, orait long dispela taim tasol bai yumi kisim dinau, na yumi no ken mekim bilong abrusim sampela hatwok tasol. Olsem yumi tok pinis, man bilong givim dinau em i mas tok stret long man bilong kisim dinau olsem tupela i mas raitim tok long pepa long em bai bekim dispela dinau olsem wanem, na wanem taim em bai bekim. Na sapos taim nogut i bin painim dispela man na em i sot tru long mani, orait pasin bilong givim mani olsem presen, ating em i gutpela rot bilong helpim em.
Maikel i no bin givim dispela dinau long Saimon olsem em i bin singaut long en. Maikel i givim sampela mani long em olsem presen, tasol i no bikpela olsem mani em Saimon i laik kisim olsem dinau. Saimon i amamas long dispela gutpela helpim em i kisim bilong baim marasin bilong pikinini bilong em. Na Maikel i amamas long em inap kamapim pasin bilong em long laikim tru brata bilong em na helpim em olsem. (Sindaun 14:21; Aposel 20:35) Maikel na Saimon wantaim ol i wetim taim Kingdom bai bosim graun na Krais bai “helpim ol rabisman i singaut long em,” na i no gat wanpela man bai i tok, “Mi gat sik.” (Song 72:12; Aisaia 33:24) Tasol nau long dispela taim yumi mas tingting gut pastaim sapos yumi pilim olsem yumi mas singaut long kisim dinau long wanpela brata.
[Futnot]
a Ol dispela nem i no nem tru bilong ol.
[Piksa long pes 25]
Taim yumi raitim long pepa ol tok yumi bin pasim long ol samting bilong dinau, em i makim olsem yumi laikim tru narapela, na i no makim olsem yumi no bilip long em