Pas Bilong Ol Man

Reip Ol stori bilong yupela long “Reip​—Bikpela Hevi Bilong Ol Meri” i gutpela tru. (Februeri 8, 1994) Mi gat 14 krismas na mi bin harim olsem sampela yangpela meri i no winim krismas bilong mi, man i bin reipim ol. Taim mi kaunim stori bilong yupela aiwara i kamap long ai bilong mi, na mi kisim save olsem dispela hevi i no liklik samting. Bipo mi no bin ting olsem. Tenkyu tru.

S. B., long Amerika

Long namba wan yia bilong mi long haiskul wanpela pren bilong famili i bin reipim mi. Inap sampela yia mi ting mi bin pamuk. Tasol nau mi save Jehova i no ting em asua bilong mi! Wanpela samting tasol mi bel hevi long en, em mi no bin hariap long askim wanpela long helpim mi.

A. S., long Amerika

Klostu long haus bilong mi wanpela man i laik reipim mi. Mi kirap na paitim em. Bipo mi no bin pait olsem mi pait long dispela taim​—mi strong tru long mekim. Na mi bikmaus na planti taim mi kolim nem bilong Jehova. Mi strong long mekim olsem na ol dok i kirap na singaut. Man i laik reipim mi i les long singaut bilong mi, olsem na em i ranawe. I gutpela sapos olgeta manmeri i bihainim tok yupela i bin kamapim. Maski wanem samting i kamap long yumi, ating samting yumi mekim inap helpim yumi o nogutim yumi.

S. P., long Amerika

Klostu 20 yia i go pinis wanpela man mi save liklik long em, em i reipim mi. Mi sem, olsem na mi no tokaut long dispela samting. Mi haitim i stap i go inap long 3-pela yia i go pinis. Na long dispela taim tu mi tokim man bilong mi long samting i bin painim mi bipo. Nau em i save bilong wanem mi no amamas long mekim maritpasin. Taim mi kaunim ol stori bilong yupela mi krai. Inap 20 yia mi no krai olsem nau mi krai​—mi krai, long wanem, mi amamas. Mi no krai long bel hevi; nogat. Na mi tok tenkyu long Jehova.

T. P., long Amerika

Spesim Pikinini Mi no amamas long stori bilong yupela, “Spesim Pikinini​—Bikpela Hevi Bilong Graun.” (Disemba 8, 1993) Mi ting i no stret long tok ol gutpela Kristen i no ken karim planti pikinini. I gat wanem as na yupela i tok lo bilong God long buk Stat [long “kamap planti”] i no lo bilong ol Kristen?

A. D., long Amerika

Lo God i bin givim long Adam tupela Iv long “kamap planti,” em i bin givim long Noa na famili bilong em tu. Tasol Baibel i no tok olsem long ol Kristen. (Stat 1:28; 9:​1-5; Aposel 15:29) Baibel i save mekim gutpela tok long ol Kristen i no save marit inap long ol i ken “mekim wok bilong kingdom.” (Matyu 19:12; 1 Korin 7:38) Olsem na ol marit yet i mas pasim tok long ol i laik mekim wanem bilong pasim bel o ol i laik karim hamas pikinini. God i tok ol papamama Kristen i mas lukautim pikinini long skin na tingting na spirit. Olsem na gutpela papamama bai tingim dispela na ol i no kamapim planti pikinini bambai ol i ken lukautim gut pikinini ol i kamapim pinis. (1 Timoti 5:8) Na sapos man na meri i no kamapim planti pikinini i no olsem ol i no tingim tok bilong Song 127:3 olsem: “God i mekim gut long yumi na givim yumi ol pikinini olsem presen.”​—ED.