Pas Bilong Ol Man

Pilai Laki Ol stori bilong yupela long “Pilai Laki​—Yu Ting Em i Gutpela Samting?” (Februeri 8, 1993) i kamapim gut ol hevi bilong pilai laki, tasol yupela i no skelim gut dispela samting. Olsem: Pasin bilong dring longlong i no stret, tasol i no gat rong long dring liklik. Na olsem tasol i no gat rong long pilai laki sapos yumi skelim gut. I no olsem man i save pilai laki wan wan taim em i lesman o em i laik kisim nating samting bilong narapela man.

J. R., long Amerika

Mipela i no wanbel long dispela tok olsem pasin bilong dring liklik i wankain long pasin bilong pilai laki. Baibel i no tambuim pasin bilong dring. Tasol Baibel i tambuim pasin bilong mangal long samting bilong narapela man na pasin bilong givim bel long ‘god giaman i save mekim [man] i win.’ (Aisaia 65:11; 1 Korin 6:​9, 10) Man i save pilai laki wan wan taim tasol, ating em tu i mangal long kisim samting bilong narapela man. Planti man i save kirap pilai laki wan wan taim, tasol bihain ol i kirap long pilai laki oltaim. Olsem na ol Kristen i mas bihainim gutpela tingting na ol i no ken insait liklik long wanpela pilai bilong laki.​—ED.

Painim Wara Long Stik Mi laik tok tenkyu tru long dispela stori “Painim Wara Long Stik​—Em Wok Marila?” (Janueri 8, 1993) Wan wan taim papa bilong mi i save painim wara long dispela rot. Taim stik i meknais wanpela taim, i olsem wara i stap wanpela fit insait long graun. Taim mi stap long Saut Amerika, mi lukim ol i mekim wankain pasin long painim wara. Tasol taim stik i meknais wanpela taim, i olsem wara i stap wanpela mita insait long graun. Bilong wanem stik i senisim fit i go long mita? Yumi save ol ensel nogut yet i as bilong dispela save.

W. B., long Amerika

Papamama i No Gat Wankain Bilip Dispela stori “Olsem Wanem Sapos Papamama i No Holim Bilip Bilong Mi?” (Septemba 8, 1992) i strongim mi. Papamama bilong mi i save givim bel long lotu bilong ol tumbuna na ol i no laik tru bai mi stap wanpela Witnes Bilong Jehova. Planti taim dispela samting i save daunim mi, tasol taim mi kaunim ol namba wan tok bilong dispela stori, mi save i gat ol narapela tu i save karim wankain hevi.

Y. M., long Japan

Papamama bilong mi i Katolik na ol i no save larim mi i go long ol miting bilong ol Witnes Bilong Jehova. Ol i tok strong olsem ol bai rausim mi long haus. Olsem na mi amamas tru taim wanpela pren i karim dispela nius i kam long skul na bai mi ken kaunim. Dispela stori i strongim mi long karim dispela hevi, na nau mi save hatwok bilong mi i no lus nating.

H. W., long Amerika

Dispela stori i kam long taim stret bilong en. Mi wanpela tasol long famili i wanpela Witnes Bilong Jehova. Papamama bilong mi i putim planti hevi long mi. Stori bilong yupela i helpim mi long pilim ol pasin em ol brata na sista Kristen i save mekim bilong helpim na strongim mi long ol samting bilong spirit.

D. H., long Amerika

Senisim Pasin Raskol Mi gat wanpela pikinini man em i stap long kalabus, na em i save kisim ol nius Kirap! long rot bilong sabskripsen. Mi save beten strong olsem i mas i gat sampela stori long Kirap! bilong sutim tru bel bilong em. Mi amamas tru long dispela tupela stori “Tok i Tru Inap Senisim Pasin Bilong Man” (Mas 8, 1992) na “Bipo Mi Bin Wok Olsem Raskol.” (Epril 8, 1992) Mi krai taim mi kaunim ol dispela stori na mi tok tenkyu long God, long wanem, “em i laik bai olgeta man i mas tanim bel.” (2 Pita 3:9) Mi bilip yet olsem bihain pikinini bilong mi bai mekim wankain samting.

A. F., long Amerika