Yu Wanpela Gutpela Papa o Mama?
YU LAIKIM tumas ol pikinini bilong yu? Yu amamas long ol? Yu pilim olsem olgeta wan wan i bikpela samting na i narakain tru? Klostu olgeta papamama i pilim olsem. Tasol yu save tokim ol pikinini bilong yu long yu pilim olsem? Yu save litimapim nem bilong ol taim ol i mekim wanpela gutpela wok? Yu save kamapim pasin sori bilong yu long ol long ol narapela rot tu—olsem pilai wantaim ol, o holim ol, o putim han bilong yu long sol bilong ol long kamapim pasin sori bilong yu long ol?
Tasol ating sampela inap tok: ‘Dispela i no pasin bilong mi, mi no man bilong kamapim ples klia bel bilong mi.’ I tru, i no pasin bilong olgeta papamama long holim pikinini bilong ol na kis long ol, tasol dispela em i bikpela samting tru.
Wanpela nius (The New York Times) i kamapim wok bilong sampela saveman. Ol i bin skelim 94 manmeri na ol i tok, sampela bilong ol dispela manmeri taim ol i liklik na papamama i bin holim ol, na kis long ol, na kamapim pasin sori long ol, taim ol i bin kamap bikpela, sindaun bilong ol i gutpela, winim ol man papamama bilong ol i no bin mekim dispela kain pasin long ol. Marit bilong ol i gutpela, na ol i mekim bikpela long pikinini bilong ol, na ol i amamas long wok bilong ol. Dokta Carol Franz i go pas long dispela wok bilong ol saveman na em i tok long nius, ‘bel bilong ol dispela man na meri i stap isi na sindaun bilong ol i gutpela.’
Dokta Franz i tok moa: ‘Sindaun bilong ol man na meri em papamama i no bin kamapim pasin sori long ol taim ol i liklik yet i no gutpela tumas—ol i no pas gut wantaim ol pren, na bel bilong ol i no stap isi.’ Sapos papamama i no kamapim bel bilong ol long ol pikinini, olsem holim ol na kis long ol, dispela inap mekim nogut long pikinini, winim pasin bilong papa o mama i dring oltaim, o ol i stap rabis, o ol i katim marit.
Ol man i stadi long Baibel i no ken kirap nogut long dispela samting. Ol i save gut long pasin Jisas i bin mekim long ol liklik pikinini. Em i laikim tru ol pikinini, na em i larim ol pikinini i kam long em, na em i holim ol, na em i kamapim pasin sori long ol. (Mak 10:13-16; Luk 9:46-48; 18:15-17) Em i bihainim pasin Papa bilong em long heven i mekim—Em i save lukautim ol pikinini, papa bilong ol i dai pinis. (Song 68:5) God i gutpela Papa tru; em inap helpim tru ol man i laikim em na papamama bilong ol i no bin kamapim tumas pasin sori long ol.—2 Korin 6:18.