I Gat Rong Long Pilai Laki?

“Inap 290,000 manmeri bilong Australia ol i gat hevi bilong pilai laki oltaim, na long olgeta yia ol i save lusim mani winim 3 bilion dola. Dispela i nogutim ol dispela man bilong pilai laki, na dispela pasin bilong ol i givim hevi long 1.5 milion manmeri moa. Em ol hevi olsem bisnis i bagarap, katim marit, man i kilim i dai em yet, na lusim taim bilong wok.”​—⁠J. Howard, praim minista bilong Australia, 1999.

JOHN, em yumi bin stori pinis long em long stori i kamap paslain long dispela, em i kisim pasin bilong pilai laki oltaim.a Em i go sindaun long Australia, na em i maritim Linda, em tu i save pilai laki. Pasin bilong John long pilai laki i go nogut moa yet. Em i tok: “Pastaim mi baim ol laki tiket, na bihain mi betim mani long ol hosres na pilai laki long ol haus kasino. Bihain, mi pilai laki long olgeta de. Sampela taim mi save lusim olgeta fotnait pe long pilai laki na i no gat mani bilong baim dinau bilong haus o baim kaikai bilong famili. Maski sapos mi winim planti mani, mi save pilai laki yet. Mi kalabus long amamas bilong winim mani.”

Planti man i gat wankain hevi olsem John. I luk olsem long planti hap, bikpela lain manmeri i kalabus long pilai laki. Nius USA Today i tok namel long 1976 na 1997 long Amerika, mani ol man i tromoi long ol pilai laki em gavman i orait long en i go antap inap 3,200 pesen.

Nius bilong Canada, The Globe and Mail i tok: “Bipo ol man i ting pilai laki i olsem wanpela pasin i no stret. Long nau ol man i ting em i samting bilong kisim amamas tasol.” Nius i stori long wanpela as bilong dispela senis long tingting bilong ol man, olsem: “Dispela senis long tingting bilong ol man long pilai laki i kamap long rot bilong ol toksave bilong grisim ol man long pilai laki em gavman bilong Kanada i bin tromoi bikpela mani tru inap longpela taim tru bilong kamapim.” Ol samting ol man i mekim bilong helpim pilai laki i mekim wanem long ol man?

Pasin Bilong Pilai Laki Oltaim i Go Bikpela

Wanpela lain (Harvard Medical School Division on Addictions) i tok olsem long 1996 i bin i gat “7.5 milion manmeri bilong Amerika em ol i gat pasin bilong pilai laki oltaim na ol i no inap bosim dispela laik,” na tu, i gat “7.9 milion yangpela manmeri bilong Amerika em ol i gat pasin bilong pilai laki oltaim na ol i no inap bosim dispela laik.” Ol dispela namba i stap long wanpela ripot em wanpela lain (National Gambling Impact Study Commission o NGISC) i bin givim long gavman bilong Amerika. Dispela ripot i tok olsem ating namba bilong ol manmeri long Amerika em ol i gat hevi bilong pilai laki oltaim i antap moa long namba ol i kamapim.

Amerika i mas tromoi planti bilion dola long olgeta yia bilong stretim ol hevi i kamap long pasin bilong pilai laki oltaim, olsem man i lusim wok mani, ol sik bilong skin i go bikpela, mani gavman i tromoi bilong helpim ol man i no gat wok mani, na ol klinik samting bilong helpim ol man i save pilai laki oltaim. Tasol dispela mani i no kamapim klia bikpela hevi i kamap long pasin bilong pilai laki oltaim. Pasin bilong pilai laki oltaim i as bilong pasin stil, man i paulim mani bilong kampani samting, man i kilim i dai em yet, man i paitim meri, na pasin bilong mekim nogut long ol pikinini, na ol dispela pasin i save givim bikpela hevi long famili, pren, na ol wanwok. Long Australia ol i skelim ol man na ol i kisim save olsem 10-pela man inap kisim hevi long rot bilong wanpela man tasol bilong pilai laki oltaim. Wanpela ripot bilong lain National Research Council long Amerika i tok inap “50 pesen bilong ol poroman marit na 10 pesen bilong ol pikinini ol i bin kisim bagarap long skin em man bilong pilai laki oltaim i as bilong en.”

Ol Narapela Tu Inap Kalabus Long En

Olsem long sampela sik, pasin bilong pilai laki oltaim inap kalap long ol papamama i go long ol pikinini. Ripot bilong lain NGISC i tok: “Ol pikinini bilong ol man i kalabus long pilai laki ol inap mekim ol pasin bikhet olsem smok, dring, kisim drak, na ol inap tru long kisim pasin bilong pilai laki oltaim o ol i no inap bosim dispela laik.” Ripot i tok lukaut tu olsem “em i isi moa long ol yangpela i kisim pasin bilong pilai laki oltaim na no inap bosim dispela laik long pilai laki winim ol manmeri i bikpela pinis.”

Dokta Howard J. Shaffer (dairekta bilong Harvard Medical School’s Division on Addiction Studies) i tok: “Planti samting i kamapim klia olsem planti yangpela moa ol i wok long mekim ol pilai laki em gavman i tambuim, na namba bilong ol i wankain long namba bilong ol yangpela i mekim ol pilai laki em gavman i orait long en.” Em i stori long ol man i no inap bosim laik bilong ol long pilai laki, na olsem wanem ol inap mekim sampela wok i no stret long Intenet, em i tok: ‘Pasin bilong kisim drak krek koken olsem smok i bin senisim pasin bilong kisim koken nating, na olsem tasol ol kompiuta bai kamapim sampela senis long pasin bilong pilai laki.’

Planti taim ol man i kamapim tingting olsem ol bisnis bilong pilai laki ol i rot bilong kisim amamas tasol. Tasol long ol yangpela, pilai laki inap tru long kalabusim ol olsem drak nogut inap mekim, na em inap kirapim ol long mekim pasin raskol. Wanpela wok painimaut ol i mekim long Yunaitet Kingdom i kamapim olsem namel long ol yangpela i pilai laki, inap “46 pesen ol i bin stilim ol samting long famili” bilong kisim mani bilong pilai laki.

Maski ol dispela hevi i save kamap, wanpela bikpela kampani bilong pilai laki i mekim tok bilong kamapim olsem i orait long pilai laki na i tok: “Bikpela lain bilong ol manmeri bilong Amerika em ol i save amamas long pilai laki, ol i no kisim wanpela hevi.” Maski sapos yu ting pilai laki i no givim yu hevi bilong mani o bagarapim skin bilong yu, yu ting em i mekim wanem long yu long ol samting bilong spirit? Yu ting i gat ol gutpela as na yu mas abrusim pasin bilong pilai laki? Stori i kamap bihain long dispela bai bekim ol dispela askim.

[Futnot]

[Blok/Ol Piksa long pes 4, 5]

Mi Gat Hevi Long Pilai Laki?

Lain American Psychiatric Association i tok lista long pes 5 inap helpim man long save sapos em i gat hevi long pilai laki o nogat (sampela taim ol i kolim olsem pasin bilong pilai laki oltaim na ol i no inap lusim). Ol man i gat save i wanbel olsem sapos yu kamapim sampela bilong ol dispela pasin, dispela i makim olsem yu gat hevi long pilai laki, na sapos yu gat wanpela tasol bilong ol dispela pasin, yu tu inap kisim dispela hevi.

Tingting tumas Yu tingting tumas long pilai laki​​—⁠yu laik tingim gen ol pilai laki yu bin mekim bipo, na tingting long wanem pilai laki yu bai mekim, o yu tingting long ol rot bilong yu inap kisim mani bilong pilai laki.

Lain pinis Yu lain pinis long pilai laki wantaim liklik mani olsem na yu laik pilai laki wantaim bikpela mani moa, winim bipo, bambai yu inap kisim amamas yu laik kisim.

Lusim Yu pilim skin i les o yu kros hariap taim yu traim long lusim pasin bilong pilai laki.

Ranawe Yu pilai laki na bai yu no ken tingim ol hevi bilong yu, i olsem yu laik ranawe long ol hevi, o yu laik daunim ol tingting olsem yu no gat rot bilong kisim helpim, o bel i gat tok, o yu tingting planti, o bel hevi.

Painim Taim yu lusim mani long pilai laki, yu save go bek gen long narapela de na traim long winim bek mani yu bin lusim. Ol i kolim dispela olsem pasin bilong painim ol samting man i bin lusim.

Tok giaman Yu mekim tok giaman long famili bilong yu, ol dokta, o ol narapela, long wanem, yu laik haitim pasin bilong yu long insait tru long pilai laki.

No inap bosim Planti taim yu bin traim long lusim, bosim, o daunim liklik pasin bilong pilai laki, tasol i no gat gutpela samting i bin kamap.

Ol pasin i brukim lo Yu mekim ol pasin i brukim lo, olsem pasin giaman, stil, o paulim mani bilong kampani bambai yu gat mani bilong pilai laki.

Bagarapim pasin bilong pas gut wantaim gutpela pren o famili Pilai laki i mekim na yu bin bagarapim pasin bilong yu long pas gut wantaim gutpela pren o famili, o yu lusim skul, o wok mani.

Narapela i helpim Ol narapela i bin givim yu mani bilong stretim ol hevi bilong mani em pilai laki i bin kamapim.

[Kredit Lain]

Dispela tok i kam long: National Opinion Research Center at the University of Chicago, Gemini Research, and The Lewin Group.

[Blok/Piksa long pes 7]

Ol Toksave Bilong Pilai Laki

Long wanpela ripot ol i givim long lain National Gambling Impact Study Commission, ol saveman long Duke Yunivesiti long Amerika i tok: ‘Yumi ken tingim ol samting ol man i mekim bilong helpim pilai laki i olsem gutpela rot bilong skulim ol man olsem pilai laki i wanpela gutpela samting ol i ken mekim.’ Ol toksave bilong grisim ol man long pilai laki i mekim wanem long ol man? Ripot i tok: “Em i no giaman long tok olsem ol toksave bilong pilai laki i save paulim tingting bilong ol man​—⁠i olsem bilong i stap gut yu mas makim wanpela namba i stret tasol. Dispela tingting kranki ol bisnis bilong pilai loto i save kirapim ol man long bihainim em inap mekim na bihain gavman bai i no inap kisim bikpela mani olsem bipo ol i bin kisim. Olsem: Ol samting bilong helpim pilai laki i daunim laik bilong ol man long wok, na bungim mani bilong ol, na baim skul samting, dispela bai mekim na ol wok bisnis i no kamap gutpela. Pasin bilong stap nating na wet tasol long gutpela samting i kamap, em i no rot bilong i stap gut olsem yumi save skulim ol pikinini bilong yumi.”

[Blok/Piksa long pes 8]

Olgeta Haus i Haus Kasino

Long nau ol oganaisesen bilong pilai laki ol i save tromoi liklik mani tasol long wokim ol Web-sait long kompiuta​—⁠dispela mani i daun moa long mani ol i tromoi bilong wokim ol nupela haus bilong pilai laki​—⁠na long dispela rot olgeta haus i gat Intenet ol inap kamap olsem ol haus kasino. Long 1995 samting, i bin i gat olsem 25 Web-sait bilong pilai laki long Intenet. Long 2001, namba bilong ol Web-sait bilong pilai laki i winim 1,200 na mani i kam long dispela rot i wok long i go antap long olgeta yia. Long 1997, ol Web-sait bilong pilai laki i kisim mani inap olsem 300 milion dola. Long 1998, ol i kisim bikpela mani inap 650 milion dola. Long 2000, ol Web-sait bilong pilai laki long Intenet i kisim mani inap 2.2 bilion dola, na long 2003, nius ripot bilong lain Reuters i tok dispela mani bai “go bikpela moa inap 6.4 bilion dola.”

[Piksa long pes 6]

Wanpela hevi i kamap long pasin bilong pilai laki oltaim em ol famili i no gat mani bilong baim kaikai

[Piksa long pes 7]

Namba bilong ol yangpela i pilai laki i wok long i go antap hariap

[Piksa long pes 8]

Em i isi moa long ol pikinini bilong ol man i kalabus long pilai laki, long kisim pasin bilong pilai laki oltaim