Ol Yangpela i Laik Save . . .

Pilai Laki Em i Nogut o Olsem Wanem?

TUPELA yangpela, Endru em i gat 12-pela krismas na Julian em i gat 10-pela krismas, tupela i raun wantaim famili bilong ol long wanpela bot na tupela i kirap nogut long lukim ol masin bilong pilai laki long dispela bot. Orait tupela i go liklik na i no stap moa long ai bilong papamama na tupela i sanap lukim wanpela man i pilai laki i stap. Em i lukim tupela i sanap olsem, na nau em i givim mani long tupela na bai tupela i ken pilai laki long ol masin. Tasol papamama i bin tambuim ol long ol i no ken go klostu liklik long ol masin samting bilong pilai laki.

Tasol Endru na Julian i tingting long pilai. Ol i tingim yet tok bilong papamama, tasol ol i pilai laki na ol i kisim liklik winmani long pilai! Na bihain ol i winim sampela mani moa. Tupela i kirap nogut long bikpela mani ol i winim long pilai laki! Ol i tingting, ‘Olsem wanem na dispela em i samting nogut? Man, i no hatwok liklik long kisim mani! Ating pasin bilong pilai laki em i no gat rong long en.’

Olsem planti yangpela long ol kantri em planti man i save pilai laki, tupela i ting olsem i no gat rong long en. Yumi inap save long kain tingting ol dispela yangpela i kisim, long wanem, yumi lukim planti ol bikpela manmeri i mekim dispela samting. Planti ol i pilai laki na ol i painim rot bilong tok olsem dispela pasin bilong ol i orait tasol. Ol i save tok, pilai laki em i gutpela rot bilong kisim sampela mani bilong helpim sampela wok olsem bilong haus sik o bilong helpim sampela man. Na sampela i tok i no gat rong long pilai laki​—em i gutpela samting na em i rot bilong kisim amamas.

Planti tausen yangpela bilong Inglan na Aialan na ol narapela hap tu i kamap man bilong pilai laki. I no hatwok long kisim planti mani long dispela rot, olsem na nogut dispela i pulim yu tu.

Pilai Laki​—Ol Hevi i Stap Hait

Pilai laki inap kamapim sampela hevi long ol yangpela. Ol ripot i tok dispela pasin i save kalabusim tru ol yangpela na tingting bilong ol i paul na ol i stap olsem longlong. Wanpela program bilong televisen long Inglan i tok, ol pikinini i pilai laki na ol i ‘mekim ol kain kain pasin bikhet, na pait, na stil, o pilai laki i bosim ol na ol i no inap lusim, o ol i pamuk bilong kisim mani bilong pilai laki, na sampela taim ol i kilim i dai skin bilong ol.’ Olsem na dispela pasin em inap tru long bagarapim i stap bilong man olsem i bin painim sampela pinis.

Yangpela man Adrian i tok, “Mi kirap long pilai laki taim mi gat 11-pela krismas. Mi save go wantaim kandere na kasen brata bilong mi long ol resis bilong dok. Planti taim mi save win.” Dispela pasin i mekim wanem long Adrian? Em i tok, “Mi save mekim ol stori giaman long papa bilong kisim sampela mani long pilai. Taim mi gat 19 krismas samting mi no gat hatwok long stilim mani long bokis mani long stua bilong papa, bambai mi ken pilai laki yet.”

Narapela samting inap bagarapim yu em olsem Adrian i tok, ‘Yu kamap lesman, long wanem mani yu ting yu inap winim long pilai laki i save winim mani yu kisim long mekim wok.’​—Lukim Sindaun 13:4; Saveman 2:24.

Wanpela man nem bilong em Robet (i no nem tru bilong em) i kirap long pilai laki taim em i gat 12-pela krismas tasol. Em i tok long narapela samting nogut olsem: ‘Yu bai bilip long ol bilip kranki bilong ol tumbuna. Papa bilong mi i bin i gat ol masin bilong pilai laki long stua bilong em. Mi save long mekim wok long ol dispela masin, tasol mi mekim ol samting olsem ol dispela bilip kranki bilong ol tumbuna i tok na bai mi ken winim mani: Mi save mekim narapela kain pasin long masin o mi lusim winmani i stap long plet inap longtaim liklik. Na sampela man i save toktok long masin​—ol i ting dispela bai helpim ol long win.’ Tru tumas, planti man i bilip tru long ol dispela pasin giaman na nau laki i kamap olsem god bilong ol​—tasol trupela God i tambuim tru dispela pasin.​—Aisaia 65:11.

Laki i Kalabusim Ol

Pasin bilong pilai laki i save kalabusim tru sampela yangpela. Wanpela ripot i tok, long Inglan long olgeta yia inap 2,000 pikinini i no winim yet 16 krismas, em papamama bilong ol i save kisim ol i go long wanpela lain i gat wok long helpim ol man long lusim pasin bilong pilai laki. Tasol dispela ripot i tok, i gat planti pikinini moa long Inglan em laki i kalabusim ol. Olsem wanpela ripot i tok, taim laki i pulim ol pinis, ol i no inap lusim, maski ol i win o ol i lus.

Robet i tingim wanpela meri bipo i bin tromoi inap olsem 140 kina long olgeta de long laki. Na wanpela yangpela man i strong tru long painim mani bilong pilai long ol masin bilong laki, na em i traim long kilim i dai mama bilong em! Narapela man, em Padi, i lainim pasin bilong pilai laki taim em i liklik yet, na nau em i hatwok long lusim dispela pasin. Em i tok, ‘Famili bilong mi ol i man bilong pilai laki. Olgeta taim mi save tromoi wanem wanem ol samting bilong mi long pilai laki tasol. Taim mi bikpela na mi marit, mi tromoi mani bilong mi long laki, olsem na meri pikinini bilong mi ol i no gat kaikai. Dispela pasin bilong mi i mekim na bihain mi laik kilim i dai skin bilong mi.’

Masin Bilong Laki i Save Pulim Man

I gat kain kain pilai laki ol inap kamapim bikpela hevi long ol yangpela long nau na bagarapim tru ol, tasol wanpela samting i pulim tru ol yangpela em ol masin bilong laki. Wanpela nius (Journal of Gambling Behavior) bilong 1989 i tok, ‘Dispela samting em i save pulim tru ol yangpela long pilai laki.’ Wanpela nius (The Buzz) i tok, ‘ol dispela masin i save wok hait na giamanim ol. Taim yu pilai, yu no laik lusim​—long olgeta taim yu laik pilai tasol.’

Olsem wanem? I gutpela long mekim pilai em olgeta taim yu save tromoi planti mani long en na yu win long sampela mani tasol, maski dispela samting i olsem gutpela samting long yu? Wanpela buk (Young People Now) i stori olsem: ‘Ol masin bilong laki i save giamanim man, olsem: Sapos yu putim 10 kina bilong pilai, orait, em i holim 7 kina na yu kisim bek 3 kina tasol.’

Olsem na wanpela man bilong skelim dispela samting, em Mark Griffiths, em i tok, ‘Sapos yu laik kisim planti mani, orait yu baim wanpela masin bilong laki na bai yu inapim dispela laik.’ Yu ting i stret yu insait long kain samting olsem em i no inap helpim yu liklik?

Ol dispela masin i bilong pulim man na oltaim em i laik pilai. Ol i save pulim man olsem wanem? I gat 3-pela lait i kamap bilong makim olsem klostu yu win. Na dispela bai kirapim yu long pilai gen bilong win, i go i go, tasol yu no win.

Dispela pasin i kamap planti taim long ol wok bisnis bilong masin bilong laki. Ol man i save wokim ol dispela masin bilong givim tingting long man olsem klostu em i win, na em i no ting olsem em i wok long lus! Yu pilim olsem yu mas pilai moa, long wanem, klostu yu win. Kain kain lait na pairap bai i pulim yu long pilai pilai i go, maski yu wok long lus.

Tingting i Stret

Namba wan samting yu ken mekim bilong sakim dispela pasin, em yu no ken traim long pilai laki. Yu mas sakim tru olgeta kain laki, maski yu tromoi liklik mani tasol. Taim yu pilai long liklik mani, bihain bai yu kamap man bilong pilai laki. Taim dispela laik i kirap, gutpela yu tingim tok bilong Jisas, em i tok: “Olgeta gutpela diwai i save karim gutpela kaikai. Na diwai nogut i save karim kaikai nogut.”​—Matyu 7:17.

Tingim dispela samting: Dispela pasin i save kamapim wanem gutpela samting long i stap bilong ol man? Em i helpim yu long kisim ol gutpela pasin em spirit bilong God i save kamapim? Ol dispela gutpela pasin i olsem: amamas, bel isi, daunim laik bilong olpela bel; o em i kirapim yu long mekim pasin birua, na bel nogut, na mangal. (Galesia 5:​19-23) God i nolaik tru long pasin mangal. Sapos pasin mangal i kirapim yu long mekim wanpela samting tasol, inap yu gat asua long ai bilong God. Olsem na askim yu yet: Ol yangpela Kristen i ken poroman wantaim ol man bilong pilai laki? (1 Korin 15:33) Na yu mas tingting tu, “dispela graun olgeta em i stap aninit long strong bilong Satan.” (1 Jon 5:19) Dispela pasin bilong pilai laki em wanpela rot Satan i mekim wok long en. Olsem na yu no ken larim dispela pasin i giamanim yu na yu insait long en.

Long Aialan taim ol i kamapim nupela dispela pasin bilong baim tiket bilong winmoni, sampela i tok pilai na kolim olsem rot bilong kisim takis long ol longlong man. Tasol yumi no laik bai ol man i giamanim yumi long rot bilong laki na pulim mani bilong yumi olsem yumi longlong man, a? Endru na Julian (em yumi stori long tupela long kirap bilong stori) ol i lukim ol hevi dispela pasin i kamapim, olsem na ol i lusim olgeta. Tupela i tok, ‘I gat planti ol narapela gutpela samting mipela inap mekim long i stap bilong mipela na mipela i no ken tromoi nating mani long dispela samting.’

[Piksa long pes 20]

Maski yu tromoi liklik mani tasol long ol pilai laki, em inap pulim yu olgeta