Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g02 10/8 p. 9-11
  • Abrusim Trap Bilong Pilai Laki

No gat vidio bilong dispela seksen.

Sori, popaia kamap long lodim vidio.

  • Abrusim Trap Bilong Pilai Laki
  • Kirap!—2002
  • Ol Liklik Het Tok
  • Wankain Infomesen
  • Ol i Kisim Strong Long Mekim Senis
  • I Gat Rong Long Pilai Laki?
    Kirap!—2002
  • Pilai Laki
    Kirap!—2015
  • Ol Yangpela—I Kirap na Pilai Laki!
    Kirap!—1995
  • Yu Ting Baibel i Tambuim Pilai Laki?
    Wastaua i Tokaut Long Kingdom Bilong Jehova—2011
Lukim Moa
Kirap!—2002
g02 10/8 p. 9-11

Abrusim Trap Bilong Pilai Laki

“Pilai laki i no bagarapim skin bilong mi, na oltaim mi save bosim gut mani mi tromoi long pilai laki. Tasol mi tokaut olsem long olgeta taim mi pilai loto, mi save makim ol namba em mi tingim olsem ol laki namba bilong mi.”—⁠Linda.

PLANTI man bilong pilai laki ol i kirap bilip long ol laki namba samting. Ating ol i no ting olsem ol i strong tumas long ol bilip nating bilong ol, tasol ol i save bihainim yet ol dispela bilip.

Sampela man bilong pilai laki ol i save beten askim God long helpim ol long win. Tasol Baibel i kamapim tok bilong God long em i no orait liklik long ol man i tok ol i lotuim em, tasol ol i ‘lotuim ol giaman god ol i ting ol i save mekim ol i win.’ (Aisaia 65:11) Yes, God i no laikim tru ol pasin i helpim ol bilip nating olsem ol samting i kamap long rot bilong laki tasol. Ol samting man i mas mekim taim em i pilai laki, dispela i save kirapim man long bilip long wanpela god meri bilong Laki.

Na tu, pilai laki i save kirapim man long laikim tumas mani. Planti man moa long nau ol i no tingim ol samting bilong spirit, na mani i kamap god bilong ol, na pilai laki i olsem pasin bilong lotuim dispela god. Ol nupela haus lotu em ol bikpela haus kasino, na nupela bilip i olsem pasin mangal i gutpela pasin. Ol saveman i kisim save olsem bikpela lain bilong ol manmeri i save go long ol haus kasino ol i tok ol i no go bilong kisim amamas tasol, nogat. Ol i go bilong winim “bikpela mani tru.” Tasol Baibel i tok lukaut olsem: “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”​—⁠1 Timoti 6:⁠10.

Long 1 Korin 6:​9, 10, Baibel i tokaut klia olsem: “Nogut yupela i giamanim bel bilong yupela yet. Ol man i save . . . lotu long ol giaman god . . . na ol man i save mangal long ol samting bilong ol arapela man . . . olgeta dispela kain man bai i no inap i go insait long kingdom bilong God.” Pasin mangal i no wanpela sik i bagarapim tasol i stap bilong ol man, nogat; em i wanpela sik bilong bagarapim man long ol samting bilong spirit​—⁠tasol i gat rot bilong stretim dispela sik.

Ol i Kisim Strong Long Mekim Senis

Kazushige, em yumi bin stori long em long namba wan stori, em i tok: “Planti taim mi bin traim long lusim pilai laki. Mi luksave olsem pasin bilong pilai laki long ol hosres i wok long bagarapim famili bilong mi. Mi save lusim olgeta mani mi winim. Na tu, mi pilai laki long mani em meri bilong mi i bungim bilong redi long taim em i karim namba tu pikinini bilong mipela, na bihain mi pilai laki long mani bilong kampani bilong mi. Dispela i mekim na mi lusim pasin bilong tingim gut mi yet. Planti taim meri bilong mi i krai na tokim mi long lusim pasin bilong pilai laki tasol mi no inap lusim.”

Bihain Kazushige i kirap stadi long Baibel wantaim ol Witnes Bilong Jehova. Em i tok: “Taim mi wok long ritim tok bilong Baibel, bilip bilong mi i kamap strong moa olsem i gat God i stap, na pasin bilong harim tok bilong em bai helpim mi. Mi tingting strong olsem long rot bilong strong God i save givim, mi bai lusim pilai laki. Mi amamas tru olsem mi bin lusim pasin bilong pilai laki, na tu, mi kisim pasin bilong i nolaik tru long en. Nau mi save bel hevi tru taim mi tingim hevi em pasin bilong mi long pilai laki i bin kamapim long famili. Mi tenkyu tru long Jehova olsem em i bin helpim mi long lusim kalabus bilong pilai laki, na em i wok long helpim mi long mekim i stap bilong mi i gat as bilong en!”​​—⁠Hibru 4:​12.

John, em yumi bin stori tu long em long namba wan stori, em tu i kirap stadi long Baibel. Em i tok: “Stadi bilong mi long Baibel i helpim mi long skelim sindaun bilong mi. Long namba wan taim tru, mi inap luksave long bagarap em pasin bilong mi long pilai laki i kamapim long mi na famili. Mi amamas long save olsem pilai laki i save kirapim man long kisim pasin bilong tingim em yet tasol, na pasin mangal​​—⁠em ol pasin Jehova i nolaik tru long en. Taim mi wok long stadi i go, pasin bilong mi long laikim Jehova i strongim mi long lusim kalabus bilong pilai laki. Mi bin kirap long pilai laki, long wanem, mi laik painim gutpela sindaun. Dispela laik bilong mi i bin kamap tru taim mi lusim pasin bilong pilai laki na amamas long mekim wok bilong Jehova.”

Meri bilong John, em Linda, em tu i laik lusim pasin bilong pilai laki. Em i tok: “I hatwok. Tasol taim mi na man bilong mi i kirap stadi long Baibel wantaim ol Witnes Bilong Jehova, mi lain long tingim ol samting i bikpela samting moa long i stap bilong yumi man. Mi kisim save long pasin bilong laikim ol samting God i laikim, na tu, long i nolaik tru long ol samting God i no laikim, na dispela i makim olgeta kain pasin mangal. Nau mi amamas olsem i stap bilong mi i gat gutpela as bilong en, na tu, mi gat sampela mani moa i stap long paus.”​​—⁠Song 97:⁠10.

Taim yu kamapim pasin bilong pas gut wantaim God Jehova, yu tu inap kisim strong na gutpela tingting bilong helpim yu long abrusim trap bilong pilai laki. Taim yu mekim olsem, dispela bai helpim yu long ol samting bilong mani, bel, na ol samting bilong spirit. Yu bai amamas tru long pilim olsem tok bilong Sindaun 10:22 i tru olgeta, em i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”

[Rait long pes 11]

Pasin mangal i no wanpela sik i bagarapim tasol i stap bilong ol man, nogat, em i wanpela sik bilong bagarapim man long ol samting bilong spirit

[Blok/Ol Piksa long pes 9]

Pilai Laki na Ol Spirit Nogut

Long wanpela ripot ol i givim long lain National Gambling Impact Study Commission, ol saveman long Duke Yunivesiti ol i tok olsem ol tok bilong grisim man long pilai laki i kain olsem pasin bilong bilip long ol spirit nogut. Ripot i tok: ‘Planti toksave bilong grisim ol man long pilai laki i strongim tingting bilong kisim planti mani kago. Tasol ol dispela tingting long kisim mani kago i no bilong kisim long rot bilong wok strong, nogat, em long rot bilong majik na driman na ol bilip nating. Na olgeta maneja bilong ol pilai laki ol i save olsem planti manmeri bilong pilai laki ol i save tingim ol bilip nating bilong ol yet, na ol sat bilong glasim ol sta, ol glasman, na ol buk i stori long ol namba i makim wanem ol nem, det, na ol driman. Maski ol man i makim wanem namba, sans bilong ol long win i wankain, tasol ol bisnis bilong pilai laki i no tokim ol olsem, nogat, ol i kirapim ol man long makim ol namba na yusim oltaim ol namba i bikpela samting long ol. Pasin bilong makim oltaim ol namba em planti man i save laikim bai daunim mani man i winim, long wanem, ol i mas brukim mani i go long planti man.’

[Ol Piksa long pes 10]

“Pasin bilong mi long laikim Jehova i strongim mi long lusim kalabus bilong pilai laki.”—⁠John

“Nau mi amamas olsem i stap bilong mi i gat gutpela as bilong en, na tu, mi gat sampela mani moa i stap long paus.”​​—⁠Linda

[Ol Piksa long pes 10]

“Mi amamas tru olsem mi bin lusim pasin bilong pilai laki, na tu, mi kisim pasin bilong i nolaik tru long en.”​​—⁠Kazushige

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim