Sampela Tok i Kam Long Olgeta Hap
Ol Bikbus na Win Bilong Graun
Wanpela marasin ol i kolim amonia i stap insait long win bilong graun na em i bikpela samting, long wanem, em inap pinisim strong bilong marasin nogut (acid) nau i save kam daun wantaim ren long sampela hap bilong graun. Tasol sapos bikpela hap amonia i stap long win bilong graun, dispela i mekim na ol braunpela klaut i kam na hangamap antap long planti ol biktaun. Ol saveman i tok, ol bikbus i save helpim win bilong graun na bai skel bilong marasin amonia i stret—em i no ken planti tumas na em i no ken sot. Wanpela nius (The Denver Post) i kamapim wok bilong sampela saientis taim ol i skelim win long ol bikbus bilong Kolorado long Amerika. Ol i kisim save olsem, taim win i no gat planti marasin amonia long ol lip bilong ol diwai samting, ol diwai na sayor samting bilong bikbus i save rausim dispela marasin amonia long win. Tasol taim win i gat planti marasin amonia long en, ol diwai na sayor samting bilong bikbus i save pulim dispela marasin na nau win i no gat planti tumas bilong dispela marasin long en. Wanpela saveman (Andrew Langford) bilong dispela lain i skelim dispela samting i tok: ‘Bikbus i gat strong long bosim win bilong graun sapos i no gat wanpela samting i bagarapim ol samting bilong bikbus.’
“Bikpaia i Stap”?
Wanpela nius (La Civiltà Cattolica) bilong ol Lain Bilong Jisas bilong lotu Katolik long Itali i tok, “Bikpaia i stap na i bilong i stap oltaim.” Ating ol i tingting planti, long wanem, sampela long lotu Katolik i ting bikpaia em i no wanpela samting tru, na ol man i no save pilim pen long dispela ples. Ol Lain Bilong Jisas i no orait long buk katekismo bilong ol yangpela, long wanem, dispela buk i no stori liklik long bikpaia bilong bekim pasin nogut bilong ol man. Dispela Lain Bilong Jisas i strong long tok, “paia” bilong bikpaia i no makim tasol olsem yumi stap longwe long God, nogat. Paia i makim tu pen em ol sinman bai kisim, long wanem, God bai givim strafe long ol. Ol i tokaut strong olsem ol saveman bilong lotu, na ol pris, na ol katekis, i mas tokaut long bikpaia, na em i gutpela sapos ol i mekim moa yet long ol yangpela. Tasol Baibel i no stori long bikpaia. Saveman 9:5 long Baibel i tok: “Ol man i dai pinis, ol i no inap save long wanpela samting.”
Asua Bilong Komik-Buk na Ol i Mekim Pasin Sem
Ol polis long Tokyo long Japan i kotim wanpela yangpela man i gat 16 krismas, long wanem, em i bin holim 25 narapela na mekim pasin sem long ol. Yangpela man ya em i tok, pasin em i mekim em asua bilong ol komik-buk nogut i gat ol piksa nogut long en. Wanpela taim em i bin kisim wanpela komik-buk i gat ol piksa nogut long en, na bihain em i holim wanpela liklik meri i gat 10-pela krismas, na em i subim liklik meri i go long wanpela toilet, na em i mekim wankain pasin sem wantaim em olsem komik i kamapim. Em i tokaut long polis olsem em i bin mekim wankain pasin long 24 narapela, na klostu olgeta pasin sem em i bin mekim em i bin kisim tingting pastaim long ol komik nogut em i bin kaunim. Wanpela nius (The Daily Yomiuri) i tok: ‘Long 1991 long Tokyo, 86 yangpela i bin mekim pasin sem long narapela, ol i bin kisim dispela tingting long ol komik-buk i gat piksa nogut long en.’
Haus Bret Bilong Bipo Tru
Sampela saveman i gat wok long skelim ol samting bilong ol man bilong bipo, ol i bin wok klostu long sampela traipela haus matmat bilong ol bikman Isip bilong bipo, na ol i painim wanpela haus bret bilong bipo tru. Ating i no gat narapela haus bret bilong bipo long olgeta hap graun i winim krismas bilong dispela haus bret. Ol saveman i ting taim ol wokboi i sanapim ol dispela traipela haus matmat, ol man i mekim wok long dispela haus bret bilong wokim bret bilong ol wokboi. Wanpela bilong dispela lain i skelim ol samting bilong bipo (Mark Lehner) i tok: ‘Ol man bilong bipo i bin wokim planti bret long dispela olpela haus bret, inap 30,000 man i ken kaikai long olgeta de.’ Na em i tok, ating ol man i wok long dispela haus bret ol i bin hatwok tru, long wanem, bikpela hat na bikpela blakpela smok i bin pulap long dispela haus bret taim ol i wok. Ol dispela saveman i ting dispela haus bret i gat wankain krismas olsem ol dispela traipela haus matmat bilong ol bikman Isip bilong bipo.
Ol i Painim Pinis Matmat Bilong Kaiafas?
Wanpela nius (The Star) bilong Johanisbek long Saut Afrika i tok, ol saveman i ting ol i painim pinis long Jerusalem, matmat na ol bun samting bilong hetpris Kaiafas bilong lain Juda. Em dispela hetpris i bin strong long ol i mas kilim i dai Jisas Krais. Ol i bin painim wanpela bokis i gat ol bun long en na i gat dispela rait “Yehosef bar Caiapha” i stap long en. Kaiafas i kamap hetpris long yia 18 samting, na em i bin mekim nogut long Krais na ol disaipel bilong em. Ol i rausim Kaiafas long wok bilong em long yia 36. Wanpela man Juda bilong raitim ol stori bilong ol samting i bin kamap bipo, em Josifas, i bin stori long dispela hetpris. I gat wan wan man tasol bilong bipo em ol saveman i save, ol bun ol i painim em bun tru bilong ol dispela man, na Kaiafas em wanpela bilong ol. Wanpela saveman bilong ol dispela man bilong painim samting bilong bipo i tok: ‘Mipela i painim pinis inap wan tausen bokis samting long Jerusalem i gat ol bun bilong ol man i stap bipo, tasol mipela i save long nem bilong 5-pela tasol.’
Pasin Nogut i Go Bikpela
Wanpela nius bilong Frans (Le Figaro) i tok, i no gat narapela yia i bin winim yia 1991 long ol pasin raskol i bin kamap long Frans. Ol polis i kisim save olsem 3 milion 700 tausen pasin raskol i bin kamap. Long 1990 i no planti olsem. Planti bilong ol dispela pasin raskol i bin kamap long ol hap bilong Paris. Dispela nius i tok moa olsem, klostu olgeta kain pasin nogut i go moa nogut—kros pait long ol taun, na ol pasin giaman long wok bisnis samting na planti pasin giaman i kamap bikpela moa namel long ol lain politik. Olsem na pasin raskol na ol narapela kain pasin nogut long Frans long nau i winim bilong yia 1951 samting inap olsem 7-pela taim samting.
Dring na Patpela Skin
Yumi save pinis, ol manmeri i save dring planti, skin bilong ol inap go patpela. Bilong wanem dring i mekim olsem long skin bilong man? I no longtaim i go pinis na sampela man i skelim dispela samting long Yunivesiti bilong Surik long Swiselan. Ol i kisim save olsem i no dispela dring tasol i save mekim skin i go patpela, nogat. Dring i mekim narapela samting tu long skin na skin i no inap rausim gris. Ol saveman bilong skelim ol kaikai i save helpim skin, ol i save pinis olsem skin i no save wok hariap long pinisim gris—skin i save holim gris na pinisim hariap ol marasin suga na ol marasin kabohaidret long skin. Tasol dring i mekim na skin i wok isi isi tru long pinisim gris. Sampela man i laik kisim save long dispela samting, olsem na ol i dring olsem 6-pela glas strongpela dring long olgeta de. Taim ol dispela man i mekim olsem, ol i no rausim planti gris olsem bipo ol i bin mekim taim ol i no kisim yet ol dispela strongpela dring. Tasol sapos man i kaikai planti samting i gat gris, skin bilong em i save go patpela tu.
Kot Bilong Pulim Smok Bilong Narapela
Distrik Kot Bilong Niu Saut Wels long Ostrelia i orait long wanpela meri i gat 64 krismas long kisim mani long wanpela kampani bipo em i bin wok long en. Em i bin wok 12-pela yia samting namel long ol man i save smok, na dispela meri i tokim kot em i bin kisim bikpela sik, long wanem, em i pulim win em smok bilong ol wanwok i pulap long en. Bipo taim dispela kain hevi i kamap, ol man i no go long kot, ol yet i save stretim. Tasol dispela meri long Ostrelia i go long kot na kot i tok, kampani i mas givim K60,000 long em. Wanpela nius (The Australian) i tok, em namba wan taim kot i tok, ol man bilong smok inap bagarapim skin bilong ol man i no save smok, taim ol i pulim win em smok i pulap long en. Sampela i ting nau dispela samting inap kirapim ol man i no save smok na ol i wok long ol haus kaikai, na hotel, na ol klap samting, na ol bai kotim bos bilong ol, long wanem, ol dispela ples i larim man i smok long en.
Maritpasin na Ol Hevi Long Tingting na Bel
Taim ol yangpela i mekim maritpasin, dispela samting em i no kamapim sik bilong pamuk tasol, nogat, ol i save kisim planti ol narapela hevi tu. Wanpela nius bilong Itali (La Stampa) i tok: ‘Sapos ol yangpela i mekim maritpasin dispela inap kamapim planti hevi long tingting na bel bilong ol. Na taim ol i mekim olsem, ol i no inap pas gut wantaim narapela man, na ol i no mekim pasin i stret, na ol i kirap na dring na kisim ol drak nogut, na mekim pasin raskol.’ Tupela lain long Itali (Center for Psychosocial Studies na Ministry of Justice) i bin wokim wanpela kibung long Rom na ol i tok, nau ol yangpela i save mekim maritpasin taim ol i yangpela yet. Planti bilong ol i gat 17 krismas tasol.