Dring Planti Tumas—Wanpela Bikpela Hevi
PASIN bilong dring alkohol inap kamapim amamas o bel hevi. Baibel i tok sapos yu dring liklik alkohol, dispela inap mekim bel bilong yu i amamas. (Song 104:15) Tasol Baibel i tok pasin bilong dring planti tumas inap bagarapim man o kilim em i dai, olsem snek nogut i bin kaikaim em. (Sindaun 23:31, 32) Yumi laik skelim gut ol bikpela hevi pasin bilong dring planti tumas i save kamapim.
Niuspepa Le Monde i kamapim dispela stori: “Long Sarere wanpela spakman i draivim ka na bamim wanpela mama i gat 25 krismas na pikinini man bilong em i gat tupela krismas. . . . Yangpela mama hia i gat bel na em i dai long Sande. Pikinini man bilong em i kisim bagarap long het na em i stap long mak bilong i dai.” Sori tru, kain stori olsem i save kamap planti taim. Ating yu yet i save long wanpela i bin insait long eksiden em man i dring i bin kamapim. Long olgeta yia planti tausen pipel i painim indai o bagarap long ol spakman i draivim ka.
Hamas Man i Dai
Long olgeta hap bilong graun planti man i dai, long wanem, ol man i mekim nabaut long dring. Long Frans namba bilong ol man i dai long pasin bilong mekim nabaut long dring i planti tru, ol manmeri i dai long sik kensa na sik bilong klok tasol i winim dispela namba. Mekim nabaut long dring i save kilim i dai 50,000 manmeri long Frans long olgeta yia. Wanpela ripot em Helt Ministri bilong Frans i kamapim i tok dispela namba “i kain olsem tupela o tripela traipela balus i pundaun long olgeta wik.”
Planti yangpela moa yet i dai long rot bilong ol hevi alkohol i kamapim. Ripot em Wol Helt Oganaisesen i bin raitim long 2001 i tok namba wan as na ol man bilong Yurop namel long 15 na 29 krismas i dai em long rot bilong alkohol. Ol i tok i no longtaim na long sampela kantri bilong Isten Yurop, alkohol bai kilim i dai wanpela bilong olgeta tripela tripela yangpela man.
Pasin Pait na Mekim Nogut Long Meri
Alkohol i save kirapim ol man long mekim pasin pait. Alkohol inap mekim na man i no inap kontrolim tingting na pasin bilong em yet na em inap kisim tingting kranki long ol samting ol narapela i mekim na em i skrap long pait.
Alkohol i save kirapim pait insait long ol famili na pasin bilong mekim nogut long meri. Long Frans ol i bin skelim ol kalabusman na ol i kisim save olsem 67 pesen bilong ol man i bin reipim ol meri, ol i bin dring alkohol pastaim. Magasin Polityka i tok ol man bilong Polan husat i gat sik bilong dring oltaim, 75 pesen i bin paitim meri bilong ol. Narapela ripot (American Medical Association, Council on Scientific Affairs) i tok “taim man i dring, planti taim pasin bilong kilim i dai man i save kamap, na tu, planti taim man i dring i save kilim i dai wanpela wanhaus bilong em.”
Hevi Olgeta Man i Karim
Taim yu tingim pe bilong lukautim sikman, insurens, na wok bisnis i no ron gut, long wanem, ol wokman i insait long ol eksiden, sik, o indai taim ol i no lapun yet, dispela em i bikpela hevi tru olgeta man i karim. Pe bilong ol samting pasin bilong dring planti tumas i kamapim long kantri Aialan em 3 bilion kina long olgeta yia. Wanpela ripot long niuspepa The Irish Times i tok dispela bikpela mani i olsem “pe bilong baim wanpela nupela haus sik, wanpela stediam bilong pilai spot, na wanpela smok balus bilong olgeta Minista long olgeta yia.” Long 1998 niuspepa Mainichi Daily News i tok pe bilong ol hevi pasin bilong dring planti tumas long Japan i kamapim “long olgeta yia i moa long 165 bilion kina.” Wanpela ripot ol i givim long palamen bilong Amerika i tok: “Pe bilong ol hevi em pasin bilong dring planti tumas i bin kamapim long 1998 em 553 bilion kina, dispela i olsem 1,914 kina long olgeta man, meri, na pikinini i stap long Amerika.” Na tu, yumi no stori long ol samting dispela i bin mekim long bel na tingting bilong ol manmeri we pasin bilong dring i bin bagarapim famili, kamapim indai, na bagarapim ediukesen o wok skin bilong ol man.
I no hatwok long luksave olsem pasin bilong dring planti tumas i save nogutim ol man. Olsem wanem? Pasin bilong yu long dring i laik bagarapim helt bilong yu na ol narapela man? Hap i kamap bihain bai stori long dispela askim.