Pas Bilong Ol Man

Pikinini Man o Pikinini Meri  Mi amamas long kaunim ol tok long liklik blok i gat het-tok: “Olsem Wanem Pikinini i Kamap Man o Meri?” Dispela i bin stap long stori “Ol Meri​—Famili i Save Tingim Gut Ol?” (Epril 8, 1993) Bikpela susa bilong mi i bin karim 5-pela pikinini meri insait long 10-pela yia, em i no karim pikinini man. Mi bin tok em asua bilong em na em i karim ol pikinini meri tasol. Tasol stori mi kaunim i lainim mi, i no stret sapos mi tok em asua bilong meri. Ating yumi ken tok, em asua bilong man.

E. J. O., long Naijiria

Tru, ol samting i makim mama bai kamapim ol pikinini meri tasol o ol pikinini man tasol, em samting i stap long spem-sel bilong papa, tasol em i no stret sapos yumi tok em asua bilong mama o papa. Olsem stori bilong mipela i tok, “em lo bilong skin.”​—ED.

Pasin Kranki Bilong Papamama  Mi bin krai nogut tru taim mi kaunim stori “Ol Yangpela i Laik Save . . . Olsem Wanem Sapos Papa o Mama i Semim Mipela?” (Ogas 8, 1993) Inap tupela yia i go pinis ol i bin rausim papa bilong mi long kongrigesen Kristen, na mitupela mama i bin karim bikpela hevi. Mi mekim olsem stori bilong yupela i tok, mi bin toktok wantaim wanpela strongpela elda Kristen na em i givim gutpela tok long mi bilong strongim mi.

A. O., long Japan

Bipo papa bilong mi em i wanpela Witnes Bilong Jehova, tasol em i lusim tok i tru na em i bikhet long Jehova. Em i mekim traim long kirapim ol narapela long lusim tok i tru. Na em i save sanap long ol haus lotu na mekim ol tok. Ol man i save kolim em “reveren.” Pasin bilong em i mekim na mi sem pipia! Tasol stori bilong yupela i bin helpim mi gut.

B. A., long Amerika

Pasin Nogut Bilong Ol Natsi  Tenkyu long stori “Stap Gut Long God Long Natsi Jemani.” (Oktoba 8, 1993) Ol brata sista Kristen bilong yumi i bin karim planti hevi, tasol ol i stap gut long God! Sapos bikpela hevi i kamap long mi, mi laik stap strong olsem Josef Rehwald na famili bilong em i bin mekim.

D. J., long Amerika

Nau tasol mi kaunim stori bilong Josef Rehwald. Aiwara i kamap long ai bilong mi taim mi tingim ol samting Jehova i save mekim bilong lukautim ol wokboi bilong em taim ol i gat hevi. Olsem na mi no inap pasim maus, mi bin tok tenkyu long Jehova!

V. M., long Itali

Ol Amamas  Tok bilong ol stori “Kain Kain Amamas i Save Mekim Wanem Long Yu?” (Septemba 8, 1993) i sutim stret taim bilong yumi. Mi pilim tru ol tok yupela i bin kamapim long ol piksa wokabaut. Mi save wok long wanpela stua bilong ol video. Ol man i save kam long dispela stua na baim video bilong liklik taim na bihain ol i bekim. Yupela i bin stori long piksa wokabaut Basic Instinct. Planti man i kam bilong kisim dispela video. Mi kirap nogut tru long save, nau bisnis bilong wokim ol piksa wokabaut nogut i kamap wanpela bikpela wok bisnis tru!

D. M., long Amerika