Yu Ting Olsem Wanem Long Krismas?

Bai yu bekim olsem wanem? Krismas em i (1) taim bilong bung wantaim famili bilong yu; (2) em i taim bilong pati; (3) em i taim bilong tingim lotu; (4) em i taim bilong tingting planti; (5) em i taim bilong tingim bek ol gutpela samting bilong bipo; (6) em i taim bilong kisim bikpela mani long bisnis.

WANPELA lain i bin askim 1,000 manmeri long Briten long tingting bilong ol long Krismas, na ating bai yu kirap nogut long save, wan wan tasol, inap 6 pesen, ol i ting Krismas em i taim bilong lotu. Tasol 48 pesen i ting Krismas em i taim bilong bung wantaim famili bilong ol. Planti ol i tok, em i wanpela bikpela taim bilong ol pikinini. Ol i bin askim wanpela pikinini meri i gat 11-pela krismas, i gat wanem samting bilong Krismas em i save laikim tru. Em i tok: ‘Em i taim bilong amamas na givim ol presen.’ Wanpela buk (The Making of the Modern Christmas) em tu i tok, ‘bikpela samting bilong Krismas, em famili na ol pikinini.’

Tasol long hap bilong wes long ol kantri i gat nem Kristen, ol i moa tingim Krismas em i taim bilong famili​—⁠ol wanblut i bung wantaim na narapela i givim presen long narapela. Na long ol kantri em misin Isten Otodoks i gat strong, ol man i moa tingim Paska, olsem Ista. Tasol planti lain i tingim Krismas em i taim bilong malolo na raun.

Em “Samting Bilong Bisnis”

Wanpela buk (The New Encyclopædia Britannica) i tok, Krismas “i senis na i kamap olsem bikpela taim bilong . . . bisnis.” Dispela tok i stret tru long Japan, winim ol narapela kantri.

Wanpela nius bilong Wosington (Daily Record) i tok: “Ol Japan i no giaman moa long tingim lotu long taim bilong Krismas​—⁠nau ol i tingim Krismas em i taim bilong kisim mani long bisnis.” Na nius i tok, Krismas long Japan “em i bikpela taim bilong amamas na ol i save tingim moa yet ol samting bilong bisnis, tasol ol i no tingim tumas ol samting bilong lotu.”

Na long sampela kantri i gat nem Kristen, i olsem ol i no tingim lotu long taim bilong Krismas. Inap 40 yia samting bipo, wanpela nius i no orait long Krismas em i tok: “Ol bikpela kampani i litimapim Krismas. Em i nambawan bikpela taim bilong yia long kisim bikpela mani long ol bisnis. Ol bisnisman i tok ol i Kristen ol i amamas long wetim Krismas, tasol i no olsem ol i tingim Krais, nogat; ol i tingim mani ol inap kisim.” Dispela tok i stret long nau tu! Long planti kantri, inap 3-pela mun samting paslain long Krismas ol i kirap toksave long yumi olsem i gat hamas de i stap yet bilong yumi ken baim ol presen bilong Krismas. Na taim pinis bilong yia i kam klostu, ol bisnis i wok gutpela tru, na 25 pesen bilong winmani ol bisnis i kisim insait long yia, ol i kisim long taim bilong Krismas.

Maski nau yu ting olsem wanem long Krismas, ating yu laik save, em i bin kamap olsem wanem. Yu ting Baibel i helpim dispela pasin bilong givim presen long taim bilong Krismas? Pasin bilong wokim Krismas long nau em i pasin Kristen tru? Orait nau yumi ken skelim ol dispela askim.

[Piksa Kredit Lain long pes 2]

Cover: Thomas Nast/Dover Publications, Inc., 1978