Pas Bilong Ol Man

Ol Bubu Ol tok long stori “Ol Yangpela i Laik Save . . . ” long Kirap! bilong Epril na Me 1993 i stori long taim ol bubu i kam i stap. Lapun bubu bilong mi i kam na stap wantaim mipela taim man bilong em i dai. Papamama bilong mi i bin wok mani, olsem na lapun bubu i bin lukautim mi na 5-pela brata susa bilong mi. Mi bin pas gut wantaim bubu bilong mi. Nau em i lapun tru na em i no inap lukautim em yet, olsem na mi amamas long mekim sampela liklik samting bilong lukautim em. Em i hatwok liklik long mi, long wanem, mi gat famili na mi save sik. Tasol mi amamas long mekim sampela samting bilong lukautim lapun bubu. Tru tumas, taim lapun bubu i kam i stap wantaim famili, planti gutpela samting inap kamap long dispela.

B. M., long Amerika

Nupela Musik Tenkyu tru long stori “Nupela Musik​—Em i Bilong Givim Wanem Tingting Long Man? (Epril 8, 1993) Long skul bilong mi ol yangpela i save laikim tru musik hevi-metal na rap. Sapos wanpela i no laikim dispela kain musik ol narapela bai tok bilas long em. Stori yupela i bin kamapim i bin helpim mi long tokim ol yangpela bilong wanem mi no insait long dispela kain musik. Tenkyu tru.

M. F., long Jemani

Toktok Long Ai Bilong Ol Man Mi laik mekim liklik tok long stori “Yu Inap Toktok Long Ai Bilong Ol Man!” (Me 8, 1993) Bipo mi man bilong sem. Wan wan taim tasol mi inap sanap long ai bilong ol wanskul na toktok. Mi gat dispela hevi, olsem na mi lusim skul. Bihain mi kamap Kristen na mi insait long Skul Bilong Wok Autim Tok, olsem na mi mas toktok long ai bilong ol man. Em i hatwok long mi, tasol mi beten na mi strongim bel long winim dispela hevi. Mi save pret yet, tasol sampela taim mi bin sanap na mekim ol toktok long ol bikpela kibung bilong ol Witnes Bilong Jehova!

A. H., long Brasil

Tingim Ol Samting Paslain long mi kaunim stori “Olsem Wanem Yu Ken Tingim Ol Samting?” (Me 8, 1993), mi bin lusim tingting gen long kisim sampela samting long stua taim mi go baim kaikai. Stori bilong yupela i kamapim sampela rot bilong helpim ol man na bai ol i no ken lusim tingting olsem: Long tingting bilong ol, ol i mas wokim wanpela piksa long samting ol i laik tingim. Mi amamas long tok piksa bilong yupela olsem: Sapos mi laik baim susu na marasin bilong klinim tit, long tingting mi ken wokim wanpela piksa bilong bulmakau i klinim tit. Bihain bai mi mekim wok long ol rot yupela i bin kamapim bilong helpim ol man na ol i ken tingim ol samting, na ating bihain mi no gat wok moa long raitim ol samting mi laik baim long stua.

E. B., long Jemani

Pas Bilong Ol Man Tenkyu tru long hap bilong Kirap! olsem “Pas Bilong Ol Man.” Yupela i no save putim tasol ol pas i save truim tok bilong yupela, nogat. I gat kain kain pas. Planti i kamapim tingting na bel bilong ol man. Yupela i gat pasin daun, long wanem, kwiktaim yupela putim pas bilong man i gat tok long yupela, na bihain long pas bilong em, yupela raitim liklik tok bilong givim bekim long em.

C. Q., long Itali

Ol Binatang Mi salim liklik pas bilong tok tenkyu long stori “Ol Binatang i Winim Tru Samting Ol Man i Wokim.” (Mas 8, 1993) Mi save wok long wanpela bikpela kampani bilong wokim ol masin samting. Ol man i save amamas long wok ol yet i save kamapim. Tasol ol man i no tingim ol gutpela samting God i bin wokim. Wanpela taim mi harim tupela wanwok bilong mi, em tupela saientis, i toktok long gutpela pikinini bilong diwai kumurere. Tupela i tok olsem: ‘Ol gutpela samting i save kamap nating, a?’ Tru tumas, tingting bilong ol i pas.

P. G., long Amerika