Sampela Tok i Kam Long Olgeta Hap

Ol Solwara Nogut

Taim ol pait i pinis ol kantri i save mekim wanem long ol samting bilong pait, olsem ol han-bom samting? Wanpela nius (Hannoversche Allgemeine) bilong Jemani i tok, taim Namba 2 Pait i pinis, ol ami bilong Inglan na Amerika i ting ol i gat gutpela rot, olsem na ol i tromoi ol dispela samting long solwara. Dispela nius i tok, ami bilong Jemani i bin tromoi planti bom samting bilong pait i go long solwara inap olsem 630,000 i go inap 1,360,000 tan. Ol dispela ami i bin makim hap ol i laik tromoi ol dispela samting long en olsem long Solwara Not na Boltik, na wanpela hap bilong Solwara Not ol i kolim Skagerak, tasol ol i no bin makim stret long pepa samting. Long 1953 samting ol i bin rausim bikpela hap bilong ol dispela samting nogut, tasol ol i ting 450,000 tan i stap yet insait long solwara. Nau ol man i tingting planti long ol dispela samting. Gavman i salim ol man bilong glasim ol dispela hap bilong solwara em bipo ol ami i bin tromoi ol samting bilong pait long en, bilong kisim save long hamas pipia nogut bilong pait i stap yet, na em inap mekim nogut long ol man o nogat. Sampela bom inap pairap yet, tasol sampela i bagarap, olsem na ol marasin nogut insait long en i wok long kapsait i go insait long solwara.

Esia i Wok Bisnis Long Sampela Hap Bilong Skin

Long yia 1992 i gat 600 sikman long Hong Kong i wet long kisim kidni bilong narapela man, tasol ol i ting 50 tasol bai kisim. Olsem na planti bilong ol dispela sikman i save go long ol narapela kantri olsem India. Long olgeta yia ol dokta long India i katim 6,000 man i gat sik long kidni na putim kidni bilong narapela man insait long skin bilong ol. Dispela samting i kamap olsem bikpela wok bisnis. Long olgeta yia ol i save kisim 20 milion kina long dispela samting. Planti ol rabisman o ol man i gat bikpela dinau samting i save givim wanpela kidni bilong ol long haus sik. Ol i mekim bilong kisim mani, na maski ol i gat wanpela kidni tasol, ol inap i stap laip. Wanpela nius (Asiaweek) i tok, pasin giaman i kamap long dispela wok bisnis long baim hap skin bilong man. Sampela man i givim kidni, tasol sampela man i wok namel long ol na haus sik i mekim pasin giaman na paulim mani, na man i givim kidni bilong em i no kisim mani. Wanpela man i gat liklik sik long bel na em i go slip long haus sik. Ol dokta i giaman na katim em na rausim wanpela kidni bilong em​—ol i no askim em pastaim!

Kilim i Dai Ol Pikinini

Wanpela nius (The Washington Post) i tok, long 1991 inap 1,383 pikinini i bin i dai, long wanem, wanpela i mekim nogut long ol, olsem paitim ol samting. Wanpela lain (National Committee for Prevention of Child Abuse) i bin kamapim dispela tok, na taim yumi skelim dispela samting i olsem long olgeta de 4-pela pikinini i dai long dispela pasin nogut. I gat kain kain as na dispela hevi i kamap. Sampela saveman i tok, as bilong dispela samting em planti wok bisnis i bagarap, olsem na planti man i no gat wok mani, o mani i sot long lukautim famili, olsem na ol i bel hevi na kirap na paitim pikinini. Dispela nius (Post) i tok, sampela pikinini i bagarap long han bilong man o meri i lukautim ol taim papamama i go long wok samting, tasol ‘ol saveman i tok, papamama yet i bagarapim planti bilong ol dispela pikinini.’

Maunten i Pairap na Nau Graun i Kol Liklik

Taim Maunten Pinatubo long Filipin i bin pairap long 1991, ol saientis i tok graun bai go kol liklik. Tok bilong ol i stret. Taim maunten i pairap em i bin tromoi wanpela kain ges long win na dispela ges i gat 18 milion tan marasin salfa-daioksait long en. Dispela ges i bin kamap olsem wanpela traipela klaut na marasin salfurik-asit i pulap long en olsem ren. Win bilong graun i kisim klaut i go na insait long sampela wik tasol dispela klaut i kamap long olgeta hap. Em i bruk na go nabaut na pasim sampela hap strong bilong san, olsem na graun i go kol liklik. Wanpela nius (Science News) i tok, bihain long Maunten Pinatubo i pairap, sampela kantri long hap bilong Not ol i wok long go kol liklik. Tasol dispela samting i kamap em i no bilong i stap oltaim, nogat. Wanpela saveman i tok dispela samting maunten i mekim olsem graun i go kol liklik, em bai pinis long yia 1994, olsem na graun bai go hat gen.

Ol Man i Kamap Planti​—Bilong Wanem?

Long ol kantri i stap rabis, bilong wanem ol man i kamap planti tumas? Wanpela man (Paulo Nogueira Neto) na bipo em i wok long dipatmen i save lukautim ol wara na graun na win samting long Brasil, i tok: “Long Brasil i gat wanpela tok i save kamap olsem: Ol i askim wanpela man olsem wanem na em i gat 9-pela pikinini. Dispela man i tok: ‘Long famili 3-pela pikinini i save dai taim ol i liklik yet; narapela 3-pela i save lusim ples na go long Sau Paulo o Rio de Janero o biktaun Brasilia, na 3-pela i save stap wantaim papamama na lukautim ol taim ol i lapun.’ Olsem na long ol lain i stap rabis, pikinini bilong ol i stap bilong givim gutpela sindaun long ol.” Na Neto i tok moa olsem: ‘Sapos yu lukim ol kantri em ol man i stap rabis, bai yu lukim ol manmeri i kamap planti tumas. Na sapos dispela pasin bilong ol manmeri long kamap planti tumas i go bikpela moa, dispela graun bai bagarap olgeta.

Ol i Kamapim Jisas Long Video

Kain kain lotu i gat nem Kristen i mekim planti samting bilong grisim ol yangpela long kisim sampela save long Baibel. Olsem: Baibel Sosaiti Bilong Amerika i bin wokim wanpela video i stori long taim Jisas i oraitim wanpela man i gat spirit nogut, na dispela stori i stap long Baibel long Mak 5:​1-20. Wanpela nius (The Miami Herald) bilong Florida i tok, wanpela video i gat rap-musik na narapela i gat narapela kain singsing. Man i makim Jisas em i pasim T-siot na saket, na em i pait long han wantaim wanpela man i gat spirit nogut na spet i kamap long maus bilong em, na dispela man i pasim hat bilong beisbal long het bilong em. Long narapela video (Resurrection Rap) Jisas i kamap olsem gopas bilong wanpela lain raskol!

Biktaun Venis i Mekim Wok Long Gras Bilong Solwara

Venis em i stap long hap not bilong Itali na ol i sanapim dispela naispela taun long wanpela raunwara i gat solwara i go insait long en. Tasol dispela taun i gat bikpela hevi long gras bilong solwara. Solwara bilong Venis i gat ol marasin samting long en, olsem na planti gras bilong solwara i kamap. Long olgeta yia ol man i save kisim 450,000 tan gras bilong solwara long en! Ol man i mekim wanem long dispela bikpela hap gras bilong solwara? Wanpela nius (Le Scienze) i tok, ol man i skelim dispela samting na ol i traim wokim pepa long dispela gras bilong solwara. Ol i mekim wok long 36,000 i go inap 54,000 tan gras bilong solwara. Ol saientis i bin kamapim dispela pepa ol i tok, ol samting ol i mekim bilong wokim dispela pepa i no save bagarapim ol wara samting, na em i save winim pasin bilong kisim ol olpela pepa na mekim i kamap nupela pepa. Na yu ting dispela pepa i gat wanem kala? Em grinpela liklik na em i gat ol liklik mak mak!

Planti Snek

Long 1960 samting bikpela hevi i bin kamap long Guam long hap bilong Maikronisia. Dispela hevi i kilim i dai klostu olgeta kain kain pisin bilong ol long bikbus. Dispela hevi i no wanpela sik o wanpela marasin samting bilong kilim i dai ol binatang nogut, nogat; em wanpela snek​—braunpela snek bilong diwai. Dispela snek i gat liklik gip. Ol i ting dispela snek i kam long Papua Niugini taim ol balus bilong ami bilong Amerika i lusim Papua Niugini na kam long Guam. Dispela snek i bin kamapim planti pikinini long Guam, olsem na nau long sampela hap bilong Guam i gat 30,000 bilong dispela snek long olgeta skwea mail skwea mail. Ol i save hangamap long ol banis, na ol rop bilong paua, na ol i save go insait long ol haus, na kamap long ol paip wara. Na ol i save kaikaim ol bebi na ol animal ol man i save lukautim. Tasol nau ol saveman long Hawaii i pret, nogut dispela snek bai kamap long ples bilong ol. Hawaii i no gat snek long bus, tasol ol i gat planti pisin, na dispela kain snek inap bagarapim ol dispela pisin. Inap long nau sampela bilong dispela snek i bin kamap long ol ples balus bilong Hawaii. Ol i bin kalap long balus long Guam na hait i stap inap long ol i kamap long Hawaii.

Kru na Ol Tok Ples

Wanpela man (Franco Fabbro) i wok long Yunivesiti Trieste long Itali em i tok, olgeta tok ples yumi save long en o save liklik long en i stap long wanpela hap stret bilong kru bilong yumi. Olsem wanem em i save long dispela samting? Sampela manmeri em ol i save liklik long tupela o 3-pela tok ples samting na bihain ol i kisim bikpela bagarap long kru na nau ol i no inap toktok gut long tok ples tru bilong ol, ol inap toktok gut long narapela tok ples em bipo ol i ting ol i no save gut long en. Olsem na wanpela nius (L’Espresso) i tok, ‘tok ples tru bilong wanpela man i save pasim em long kamapim gut narapela tok ples em i save long en.’

Em Gutpela Lain?

Wanpela nius (Consumer Reports) i stori long wanpela lain i save bungim mani bilong helpim ol man i gat sik kensa. Dispela lain i save salim pas long ol man na askim ol long tokim ol pren na man i stap klostu long ol long givim mani long dispela lain. Dispela nius i tok, taim ol i kaunim liklik rait i stap baksait long pas ol i kisim save olsem: Dispela lain bilong bungim mani i bin kisim klostu 2 milion, 500 tausen kina long 1992, tasol long olgeta wan wan kina, ol i putim klostu wan toea tasol bilong helpim wok bilong skelim dispela sik kensa. Ol narapela hap bilong dispela bikpela mani ol i tromoi long man i save tokaut long wok bilong dispela lain, na bilong baim ol samting ol i mas kisim bilong helpim wok bilong dispela lain, na bilong baim kot, long wanem, bipo taim ol i mekim wankain wok ol i no mekim gut, ol i giaman. Na tu, ol i tromoi mani long skulim ol man long rot bilong abrusim dispela sik. Tasol ol i skulim ol man olsem wanem? Ol i mekim wanpela tok tasol na planti man i save pinis long dispela tok, olsem: ‘Nogut ples wok bilong yu i gat sampela samting em inap kamapim sik kensa.’