Ol Yangpela i Laik Save . . .

Musik Inap Bagarapim Mi?

TOM i gat 14 krismas na em i nambawan sumatin. Em i bin amamas long mekim samting bilong helpim ol man. Tasol em i baim wanpela stereo-kaset i gat bikpela pe, na em i kirap harim ol musik hevi-metal.

Nau Tom i no laik lusim rum bilong em. Papa i tok: ‘Mi save tokim em: “Yu no inap i stap olgeta taim long rum na harim musik tasol.” ’ Tom i no harim papa, em i wok long harim musik tasol. Bihain Tom i kirap sutim mama long naip na kilim em i dai, na bihain em i kilim i dai em yet. Papa bilong Tom i tok: ‘Tokim olgeta papamama long was gut long musik pikinini bilong ol i save harim.’ Sampela de paslain long Tom i bin kilim i dai mama bilong em, Tom i bin singsing planti long wanpela singsing i stori long ‘blut na kilim mama.’

Em samting nogut tru em i mekim, a? Ating i gat sampela samting moa i mekim na dispela hevi i kamap, tasol dispela hevi i makim wanpela samting planti yangpela i ting i no inap pundaunim ol. Olsem: Musik i gat strong bilong paulim tingting bilong yu! Ating yu no givim bel long harim musik hevi-metal na ating bai yu no kirap long pait na bagarapim man, tasol musik inap mekim sampela samting long yu na yu no save long en.

Strong Bilong Musik

Musik i gat strong. Em inap bosim bel bilong man; em inap mekim na bai man i stap bel hevi o amamas, bel isi o belhat. Em inap kirapim man long givim bel long wanpela samting o hambak nabaut. Olsem na long bipo i kam inap long nau, ol kain kain musik i wanpela samting Satan, ‘god giaman bilong dispela graun’ i mekim wok long en bilong kamapim pasin na tingting bilong em.​—2 Korin 4:4.

Olsem: Taim ol Israel i lusim kalabus long Isip, ol i givim baksait long lotu bilong Jehova na ol i kirap na lotuim bulmakau gol. Na taim ol i mekim dispela pasin nogut ol i mekim singsing na danis nogut! (Kisim Bek 32:​1-6, 17, 18) King Nebukatnesar i putim lo na ol man i mas brukim skru long wanpela piksa gol. Yu ting em i kirapim ol olsem wanem long givim bel long mekim olsem? Long rot bilong ol musik i save kirapim bel bilong man!​—Daniel 3:​1-7.

Olsem na yumi save long nau tu, Satan bai paulim ol man long rot bilong musik. Em “hetman bilong ol spirit nogut” na em i bosim “spirit [tingting] i wok yet insait long bel bilong ol man i save sakim tok bilong God.” (Efesus 2:2) Planti musik long nau i save kamapim pasin bikhet bilong Satan, long wanem, planti man i raitim o mekim ol singsing, “tingting bilong ol i paul olgeta, na save bilong ol i olsem tudak. . . . Olsem na ol i stap ausait long laip bilong God.” Tru tumas, taim yumi skelim sindaun bilong planti man bilong singsing na pilaim o raitim musik, “ol i no save sem moa long pasin ol i save mekim.”​—Efesus 4:​17-19.

Olsem na sapos ol yangpela Kristen i kirap na harim musik bilong ol dispela kain man, em inap bagarapim ol. I no olsem olgeta musik ol man i save laikim i nogut​—na i no olsem rok-musik tasol i nogut.a Sampela singsing bilong bipo tu i no gutpela tumas. Sampela i bin tok bokis long maritpasin na tok hait long pamuk samting, tasol planti singsing bilong nau i tokaut klia olgeta long ol dispela samting.

I No Gutpela Long Yau o Long Ai

Tingim musik hevi-metal​—em i pairap strong tru na krai bilong en inap bagarapim yau. Nem bilong sampela string-ben hevi-metal em “Poison,” “Skid Row,” “Guns N’ Roses,” “Slayer.” Wanpela nius (Time) i tok: ‘Yumi tingim nem tasol bilong ol dispela string-ben na yumi save ol i makim pasin nogut na givim pen long man na kilim man i dai.’ Na ol piksa nogut long skin bilong kaset samting, planti em ol piksa i makim samting bilong Satan.

Olsem wanem long ol tok bilong singsing? Het-tok bilong sampela i olsem: “Flesh and Blood” [Skin na Blut] na “Appetite for Destruction” [Bel i Laik Bagarapim Ol Samting], na tok bilong sampela singsing i stori long pasin sem nogut tru, na reip, na kilim man i dai. Wanpela buk (Stairway to Hell) i tok, musik hevi-metal i ‘win long pasin nogut, na long tokaut klia long pasin sem, na long kros pait na no ken tingim narapela.’ Planti taim musik hevi-metal i as na yangpela i harim na kilim i dai em yet, o kisim drak, o lotuim Satan. Tasol ol nius samting i tok, nau planti man i orait long musik hevi-metal.

Planti rap-musik tu i narapela kain tru.b Tok bilong planti rap-musik ol man i laikim, mipela i no inap kamapim, long wanem, i nogut tru. Wanpela yangpela meri i stori long wanpela singsing bilong rap-musik na em i tok: ‘Mi harim namba wan tok bilong singsing na mi kirap nogut tru!’

Na i no stret wanpela Kristen i harim planti rok-musik. Tru planti singsing ol yangpela i laikim tumas i no kamapim pasin sem olsem rap-musik o musik hevi-metal, tasol planti bilong ol i tok hait o tok klia long pasin pamuk na sampela pasin moa i no stret long Kristen. Na planti yangpela i save laikim ol musik long video, na taim ol i lukim, dispela musik i wok strong tru long tingting na bel bilong ol. Sampela man i skelim dispela na ol i tok, long olgeta wan handet wan handet musik long video, 57 i save kamapim kros pait na 75 i kamapim maritpasin. Na planti taim ol man i kamap long ol musik long video i pasim klos i pas tumas na danis ol i mekim i gat pasin sem.

Em Inap Bagarapim Yu?

Planti musik long nau i no gutpela, ‘em i samting bilong dispela graun tasol, na Satan i papa bilong en.’ (Jems 3:15) Tasol sampela yangpela Kristen i no ting i gat rong long harim ol dispela kain singsing o lukim ol dispela kain musik long video. Wanpela yangpela meri i tok: ‘Em i no bikpela samting long yumi harim tok bilong ol singsing rap​—yumi no save long insait bilong ol tok bilong en!’ Ating sapos wanpela i bin wok long kisim gut tok bilong singsing rap, ol bai tok, sampela tok bilong yangpela meri ya i stret.

Planti singsing ol yangpela i save laikim, ol i no save gut long tok hait bilong ol. Sampela man i skelim ol dispela singsing na tokim ol yangpela long kamapim gut insait bilong en. Klostu olgeta yangpela i no save gut long insait bilong ol dispela tok nogut i stori long pasin pamuk, kros pait, ol drak, na lotuim Satan, em ol samting i pulap long musik bilong ol. Wanpela nius (The Journal of the American Medical Association) i tok: ‘I no gat wanpela samting i makim olsem dispela musik i save nogutim ol yangpela.’

Tasol Baibel i no wanbel long dispela tok. Baibel i tok, “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Olsem wanem? Bai yu tromoi planti aua long harim wanpela man i kamapim ol tok doti, na kirapim yu long kisim ol drak, na stori long pasin bilong lotuim Satan, na stori long pasin pamuk? Nogat, a? Orait, bilong wanem ol man i ting dispela kain tok i no inap bagarapim man sapos ol i mekim wantaim musik? Sapos yu harim ol dispela singsing nogut planti taim, ol inap bagarapim yu! Sindaun 6:27 i tok: “Sapos yu holim paia klostu long bros bilong yu, orait ating siot bilong yu i no inap paia, a?”

Long dispela as Baibel i tok strong long yumi no ken toktok liklik long ol dispela kain pasin nogut. Olsem na i no stret tru long kolim kolim ol tok nogut bilong singsing. (Efesus 5:​3-5; Filipai 4:8) Man i givim baksait long dispela lo bai kamapim “kaikai nogut.” (Galesia 6:8) Yangpela meri Jodie i tok: ‘Ol singsing i kirapim tingting bilong yumi. Taim laik nogut i kamap long bel, ol dispela singsing i kirapim yumi long mekim ol dispela samting.’ Wanpela yangpela i bin harim wanpela singsing bilong rap-musik i stori long pasin sem na em i tok: “Toktok bilong dispela singsing mi no inap rausim long tingting bilong mi.”

Na olsem wanem long ol singsing bilong musik hevi-metal i stori long dai na drak na lotuim Satan? Ol inap bagarapim yu? Wanpela yangpela Kristen i bin harim ol dispela kain musik na bihain em i tingting oltaim long indai. Papamama na wanpela strongpela pren Kristen bilong em i wok strong long helpim em, na dispela tasol i helpim em long abrusim bagarap long spirit na skin.

Sampela taim samting yumi tingim, em bai yumi mekim. (Jems 1:​14, 15) Na planti musik bilong nau i bilong pulapim ol samting nogut long tingting bilong yumi. Tru, sapos papamama i bin lainim yu long bihainim ol lo bilong Baibel, ating yu no inap kilim man o mekim pasin pamuk long wanem yu bin harim wanpela singsing i stori long ol dispela samting, a? Tasol ol dispela singsing inap nogutim yu long narapela rot. Sampela yangpela Kristen i save pasim ol klos na katim gras olsem ol man bilong singsing rap na rok i mekim. Toktok na hambak pasin na tingting bilong ol dispela yangpela i kamapim klia olsem musik ol i harim i save pulim tingting bilong ol.

Wanpela yangpela man bilong Saut Afrika i tok: ‘Ol yangpela i tok musik ol i harim i no mekim wanpela samting long ol, tasol musik i opim rot bilong Satan i ken bosim sindaun bilong ol.’ Na dispela yangpela i no tok nating. Em i bin kisim hevi long dispela samting. Em i tok moa: ‘Musik mi bin harim i stori long ol spirit nogut, na drak, na pasin pamuk.’ Em i bin mekim wanem bilong winim dispela hevi?

Em i tok: ‘Mi tromoi olgeta musik kaset bilong mi. Nau em narapela kain samting long sindaun long rum bilong mi na i no gat pairap bilong musik. Tasol samting mi mekim i helpim mi long kamap gutpela man.’ Olsem wanem? Yu tu mas mekim wankain samting? Ating yu no ken tromoi olgeta musik na singsing yu holim sapos ol i gutpela. Tasol yu mas rausim ol kaset i singsing long pasin sem o ol spirit nogut.​—Lukim Aposel 19:19.

Dispela i no olsem yu no ken harim musik, tasol yu mas skelim gut musik yu laik harim!

[Ol Futnot]

[Piksa long pes 26]

Sapos ol samting bilong dai, bagarap, pasin sem, i pulap long tingting bilong yu, yu ting dispela bai helpim yu o nogutim yu?