Musik—Gutpela Presen Jehova i Givim Long Yumi

TAIM Adam i kamap laip em i harim gutpela musik. Em i harim ol pisin long Iden i singsing. God i redim gutpela musik bilong man i ken amamas long en!

Tasol ol dispela pisin i no gat save long wokim musik na ol i no lain long mekim singsing, ol i mekim tasol. Taim God i wokim “ol kain kain pisin,” em i wokim ol bilong mekim narapela narapela kain krai, olsem singsing bilong ol. (Jenesis 1:21, 23) God Jehova i save tru long musik!

God i no wokim ol pisin bilong singsing nating; nogat. Ol dispela singsing i gat wok bilong en. Pisin i save mekim singsing bilong makim wanem hap i olsem hap bilong en, na ol pisin i save mekim singsing bilong pulim poroman i kam long ol. Na God i wokim ol pisin bilong mekim singsing bambai ol man i ken amamas long harim. Tru tumas, God i gat bikpela save na olgeta samting em i wokim i gat wok bilong en.

Tasol bilong wanem ol man i save mekim singsing? Olsem wanem na musik i save kirapim bel bilong ol na ol i save amamas long musik?

Ol i No Save long As Bilong En

Ol saveman bilong saiens i no save olsem wanem ol man inap wokim musik na wokim gita samting na paitim gita samting. Ol i no save bilong wanem yumi save amamas long musik na singsing. Ol no save long as bilong dispela samting.

Wanpela saveman bilong saiens, em Lewis Thomas, em i tok:

‘Sapos yu wok long painim sampela samting long i stap bilong yumi, em ol saveman bilong saiens na ol narapela man i no save bilong en, orait yu ken skelim musik. Ol man i gat save long musik ol i no save musik em i wanem samting. Ol i no save bilong wanem yumi ol man i save wokim musik, em dispela samting i makim yumi i narapela kain long ol animal. Na ol i no save olsem wanem musik i save kamap insait long tingting bilong yumi taim yumi no raitim yet o paitim long gita samting. Ol dokta i gat save long skin bilong man, na ol dokta i gat save long tingting bilong man, na ol man bilong saiens, na ol saveman bilong graun, ol i no save long dispela samting. No gat wanpela man i save long as bilong en.’—Nius Discover, bilong Julai 1981, pes 47.

Musik em i wanpela gutpela samting tru na wanpela Man i gat bikpela save na tingting em i as bilong en. God Jehova i wokim man bambai man inap pilim samting i gutpela long ai na long yau. Olsem na taim man i harim gutpela musik o singsing em inap pilim long bel na long tingting bilong em. God i wokim ol pisin bilong mekim singsing na dispela gutpela musik i amamasim bel na tingting bilong man. Musik i strongim bel bilong man na em i pilim olsem em i kisim strong gen. Musik i helpim man long i stap gutpela long skin na long spirit. Olsem na musik em i wanpela gutpela samting Man bilong wokim yumi em i bin givim long yumi.

Yes, Man bilong ‘wokim yau,’ dispela Man i “givim maus long ol manmeri,” em i As bilong musik. (Sam 94:9; Eksodas 4:11) Yumi kisim dispela gutpela presen long Jehova na yumi inap wokim musik na amamas long en. Musik em i wanpela gutpela presen Papa bilong yumi i givim long yumi.—Jems 1:17.

Musik i Kamap Pastaim long Heven

Musik em i wanpela samting God i bin wokim. Save bilong em i kamapim musik. Longtaim bipo, taim em i no wokim yet dispela graun na ol kain pisin na ol man, i gat musik na God inap amamas long en! Em i wokim planti planti ensel long heven, em ol inap mekim singsing. Ol i save mekim singsing bilong lotu long Em na litimapim nem bilong Em na tenkyu long Em. Em i amamas long harim ol dispela gutpela singsing.

Ol dispela ensel i “pikinini bilong God” na taim ol i lukim Papa bilong ol i wokim dispela graun ol i singsing na amamas. (Jop 38:4-7, NW) Ol i lukim dispela graun i gutpela samting tru! Em i olsem wanpela ston i dia tumas i gat kain kain kala bilong en na em i tanim tanim long lait bilong san long blakpela skai. Ol ensel long heven i lukim dispela gutpela samting na bel bilong ol i sori gen! Ol i amamas tru long dispela gutpela samting na ol i mekim singsing bilong kamapim dispela amamas!

Kirap long dispela taim bipo na i kam inap long nau i gat musik long heven. (Revelesen 5:9, 10; 14:1-3) Taim Krais Jisas i kamap king long 1914 ating ol ensel i singsing na amamas moa yet. Taim em i kam sanap long ai bilong Jehova, dispela “man em i stap oltaim oltaim,’ ating ol ensel i mekim bikpela singsing. I gat “tausen tausen” na “ten tausen taims ten tausen” ol i stap taim Jisas i kam long sia king bilong Jehova na Jehova i “mekim em king na givim em strong na biknem.” Ol i lukim gutpela samting na ol i mekim gutpela singsing!—Danyel 7:9-14, NW; lukim tu 2 Samyuel 6:15; Sam 27:6.

Ol i mekim ol dispela samting “long tok bilong ol ensel.” (1 Korin 13:1) Ol ensel i strongpela na ol i spirit, olsem na yumi no inap harim o save long gutpela musik na singsing bilong ol. Tasol taim yumi tingim as bilong musik, olsem em i kamap pastaim long heven na em i wanpela gutpela presen Man bilong wokim yumi em i bin givim long yumi, orait, dispela i mas mekim wanem long yumi? Yumi mas laikim wanem kain musik?

Wok Bilong Yumi long Dispela Samting God i Bin Givim long Yumi

God Jehova i givim musik long yumi olsem wanpela gutpela presen na yumi gat wok yumi mas mekim. Wanem dispela wok? Yumi mas bihainim laik bilong God na mekim gutpela wok long musik. Sapos wanpela man i givim gutpela laplap long yu olsem presen, bai yu holim na klinim plua em wel o kaikai samting i bin kapsait long en? Nogat, a? Sapos yu mekim wok nogut olsem long dispela gutpela presen man i bin givim long yu i olsem yu no pilim gutpela pasin dispela man i bin mekim. Na bai em i bel hevi.

Na i wankain tu long musik. Jehova i givim musik long yumi bilong yumi ken amamas long en. Musik na singsing i wanpela rot bilong bringim yumi i go klostu long God, na yumi ken mekim wok long musik bilong litimapim nem bilong God. God i wokim musik bilong helpim yumi long i stap strong long spirit.—Sam 149:1-3;150:1-6.

Ol man i tok, wanpela god giaman, Pan, em i as bilong musik, ol i bagarapim tru nem bilong God. Ol i tok, dispela god i mekim kain kain pasin pamuk na em i kamapim musik. Tasol long nau planti singsing i stori long pasin pamuk, na planti musik i save mekim bel i kirap long pasin pamuk. Nau long “taim bilong pinis” planti musik nogut i kamap. (Danyel 12:4, NW) Kirap long yia 1914 yumi stap long taim bilong ol man i mekim nabaut. Ol i pamuk na pait na bagarapim man na ol i no gat sem moa. planti musik na singsing bilong nau i bihainim dispela pasin bilong ol man, em ol i orait long kain kain pasin i no stret na ol i longlong nabaut nau long “las taim” bilong dispela pasin nogut.—2 Timoti 3:1-5.

Ol manmeri i laikim tumas Jehova ol i mas sakim ol musik nogut na holimpas samting i stret long ai bilong Em! Em bikpela samting. (Sam 97:10) Sampela taim dispela nius Wastaua na nius Kirap! i kamapim sampela tok long musik bilong helpirn ol Kristen long was gut long musik i kirapim ol man long “givim baksait long God.” (Lukim 2 Timoti 2:16.) Ol dispela tok i bin kamapim ples klia wok nogut sampela musik na singsing i mekim, em ol dispela kain musik na singsing i save kirapim bel bilong man na kirapim em long mekim pasin bikhet.a

Sapos yu laik bai Jehova i amamas long yu na yu skelim gut ol musik na singsing bilong nau, ating bai yu tok, ‘Ating i no gat, sampela musik yumi ken harim; olgeta i nogut. Olsem wanem? I gat sampela musik o singsing yumi ken harim na em i no ken bagarapim yumi long spirit?’

I Gat Planti Gutpela Musik!

Kirap long yia 1650 samting ol man i bin raitim planti singsing na musik na liklik hap tasol i no stret wantaim Baibel. I gat sampela singsing na musik bilong bipo (bilong opera na ballet) em i stori long pasin pamuk o man i dai, o sampela stori nating bilong ol tumbuna o bilong ol haiden i as bilong en. Tasol sapos yumi klia long ol dispela kain musik, i gat planti planti gutpela musik i stap em yumi ken harim.

I gat planti musik bilong bipo (bilong Bach na Vivaldi na Telemann na Handel na Haydn na Mozart) i no gat tok long en. Sapos yu laik save gut long ol dispela musik na singsing, yu mas lusim planti yia long mekim. Na i gat ol musik na singsing bilong ol wanlain bilong ol dispela man. Na i gat ol gutpela musik bilong paitim long gita samting na ol gutpela singsing bilong kain kain ples. Tru tumas, i gat planti gutpela singsing na musik!

Ol i putim kain kain musik long ol plete singsing na ol kaset. Olsem na maski yu skelim skelim na sakim sampela, tasol i gat planti gutpela musik na singsing i stap na yu ken harim.

Bai Yu Mekim Wanem Wok long Dispela Presen?

Ol manmeri i laikim tumas Jehova, ol i laik bai Em i amamas long olgeta samting ol i mekim. Olsem na taim ol i tingim wanem kain musik na singsing ol bai harim, ol i tingim dispela samting. Tasol em i samting bilong olgeta wan wan yet. (Galesia 6:5) Wanem samting inap helpim yumi long skelim gut wanem kain musik na singsing yumi bai harim?

I gat sampela musik ol man i bin wokim long 1700 i go inap 1800 samting na i no bilong lotu. Ol Kristen i laik bihainim gut tok bilong maus bilong bel, ol i no gat tok long ol dispela kain musik. Sapos yu harim harim bai yu save long en na amamas long harim.

Taim yu laik skelim musik o singsing, yu no ken skelim tasol nem bilong en, long wanem sampela taim ol narapela nem na man bilong wokim dispela musik o singsing em i no bin putim dispela nem, em i wokim tasol dispela musik o singsing na ol man i laikim.

Wanpela samting yu ken mekim bilong skelim gut musik o singsing, em olsem: Kaunim gut ol tok ol i raitim long karamap bilong plet singsing o kaset. Sapos Musik o singsing i gat sampela tok giaman o pasin i no stret i as bilong en, orait, Kristen tru i no laik baim kain musik olsem.

Ol Witnes Bilong Jehova ol i gat gutpela musik na ol tok bilong ol singsing bilong ol i save litimapim nem bilong God na i stret wantaim ol tok i tru bilong God. Ol Witnes i no ting ol dispela musik na singsing i nambawan gutpela tru, winim olgeta narapela musik na singsing. Nogat. Tasol ol i gutpela musik na singsing, na ol gutpela man i laikim tumas Jehova na ol brata Kristen bilong ol, ol i bin wokim ol dispela musik na singsing. Sapos yu putim kaset na harim ol dispela gutpela musik, dispela bai givim gutpela malolo long skin na tingting bilong yu. Na taim yumi mekim ol dispela singsing long miting o long haus, dispela i kirapim yumi long tingim bikpela wok bilong yumi long litimapim nem bilong Jehova oltaim.

No gat wanpela man i subim Jehova long givim dispela presen long yumi. Sapos em i laik em i ken givim long ol ensel Tasol long heven. Tasol nogat. Em yet i save laikim tru musik na em i laik bai yumi tu i ken amamas long en. Dispela pasin sori Jehova i mekim long yumi i kirapim yumi long laikim em moa yet, a?

Yumi laikim tumas God Jehova, olsem na bai yumi mekim wok long ol presen bilong em bilong litimapim nem bilong em. Tru tumas, ‘sapos yumi kaikai o dring o mekim narapela samting’—mekim singsing o harim o wokim musik tu—bai yumi mekim “dispela olgeta samting bilong litimapim nem bilong God.” (1 Korin 10:31) Na long dispela rot bai yumi soim Jehova yumi pilim tru gutpela presen em i bin givim long yumi, em musik.

[Futnot long pes 22]