Musik​—Em Inap Nogutim Yu?

ATING yu bai tok: ‘Musik i no inap mekim wanpela samting long yumi. Em i no inap nogutim yumi. Em samting yumi harim tasol.’ Tasol ol samting yumi harim i save mekim sampela samting long yumi; em inap mekim yumi i pret o mekim yumi i amamas. Olsem: Sapos long biknait yu harim wanpela man o meri i singaut nogut tru, ating bai yu pret, a? Na olsem wanem taim yu harim wanpela man i lap? Taim bikpela lain i bung wantaim na wanpela i lap bikpela, ating bai olgeta wantaim i kirap na lap lap lap.

Musik i Gat Strong

Na i wankain long musik na singsing tu. Sampela kain musik yumi harim i save kirapim yumi long paitim han na tanim nabaut skin bilong yumi na singsing. Musik o singsing inap kirapim bikpela lain manmeri wantaim long mekim olsem! Wanem samting i kirapim ol long mekim? Musik o singsing ol i harim.

Olsem na musik i gat strong bilong bosim bel bilong man. Olsem: Wanpela taim Devit, em dispela Devit yumi bin stori long em, em i wok long haus bilong King Sol. Em i save paitim gita na mekim singsing. Em wok bilong em. Dispela yangpela man “i save tru long paitim gita.” Musik em i wokim i save mekim isi bel bilong King Sol taim em i bel nogut o em i tingting planti.—1 Samyuel 16:18-23, NW.

Musik inap mekim isi bel bilong man na i gat strong bilong kirapim bel bilong man. Taim wanpela string-ban o wanpela lain bilong singsing i kirap mekim wanpela singsing ol manmeri i save laikim tru, dispela inap kirapim bel bilong olgeta manmeri i bung na harim, na sapos ol i sindaun ating bai olgeta wantaim i kirap sanap. Na ol manmeri i save laikim tru ol musik na singsing bilong bipo, taim ol i harim wanpela musik (1812 Overture em Tchaikovsky i wokim) i makim pait na pairap bilong gan na krai bilong belo ol man i paitim taim ol i winim pait, em nau, bel bilong ol i kirap na ol i pilim olsem ol yet i stap long dispela pait. Tru tumas, musik i gat strong.

Inap planti handet yia pinis, ol gavman na king na hetman bilong graun ol i bin mekim wok long dispela strong bilong musik, em strong bilong kirapim bel bilong man. Ol i mekim wok long en olsem wanem? Ol i kamapim sampela singsing i save litimapim ples. Ol dispela kain singsing i save kirapim bel bilong ol man na ol i givim bel long helpim ples bilong ol. Lain bilong Hitler long Jemani i bin mekim wok long wanpela singsing olsem (“Deutschland, Deutschland über alles”—long tok Pisin i olsem: “Jemani, Jemani, i winim olgeta”). Long rot bilong dispela singsing ol i bin kirapim bikpela lain long kilim i dai na bagarapim planti man! Ol i kisim musik bilong wanpela man bilong bipo (Haydn) na wokim dispela singsing. Bilong bekim dispela singsing bilong ol Jeman, ol Englan i givim bel long mekim singsing na tok olsem: “God i Mas Helpim King” (“God Save the King”). Hitler i save laikim tru musik bilong wanpela man bilong bipo, nem bilong em Wagner.

Long taim bilong ol man bilong raitim Baibel tu musik i gat strong bilong kirapim bel bilong ol man. Hap bilong Baibel ol i kolim Eksodas em i stori long Moses i go antap long Maunten Horep bilong kisim Lo God i bin raitim long tupela hap ston. Moses i stap longpela taim long maunten na ol Isrel i les. Ol i tokim brata bilong Moses long wokim wanpela god bilong ol, mak bilong en i olsem mak bilong bulmakau. Wokim pinis na nau ol Isrel i mekim ofa long dispela god giaman. “Na ol i sindaun long kaikai na dring, na bihain ol man i go pilai long ol meri.”—Eksodas 32:1-6.

Taim Moses na Josua i kam daun long maunten, tupela i harim ol, manmeri long kem bilong Isrel ol i singaut nabaut. Josua i tok: “E Moses! Mi harim nois bilong pait insait long kem.” Tasol Moses i save dispela singaut i no singaut bilong ol man i winim pait, na i no krai bilong ol man i lus long pait. Olsem na em i tok: “Mi harim nek bilong singsing tasol.” Moses i harim dispela singsing i narapela kain na em i save i makim ol manmeri i mekim pasin nogut. Ol i mekim wanem? Ol i singsing na singaut nabaut na lotuim dispela god giaman, dispela piksa bilong bulmakau ol i bin wokim long gol. Ol i mekim lotu giaman na ol i singsing wantaim. Musik na singsing i bikpela samting insait long lotu giaman bilong ol, em dispela lotu i kirapim ol long mekim pasin i no stret, olsem pasin pamuk samting.—Eksodas 32:7-25.

Dispela samting i bin kamap long bipo em inap givim save long yumi ol Kristen long nau. Nau yumi save musik inap mekim sampela samting long yumi; em inap bosim bel bilong yumi na kirapim yumi long mekim pasin i no stret. Tasol ol manmeri bilong nau ol i save laikim tumas musik na ol kain singsing. Tasol taim Ol Witnes Bilong Jehova i bung wantaim, yu ting i stret ol i ken harim musik i pairap tumas na ol kain musik na singsing planti man bilong nau i laikim em i save kirapim bel bilong ol man na pulim ol long mekim pasin i no stret? Nogat tru! Ol i no ken harim kain musik na singsing olsem. Tasol long dispela taim sampela elda na sampela papamama ol i orait long ol dispela kain musik na singsing, olsem na sampela brata sista i no was gut. Ol i no strong long tambuim. Sampela singsing bilong nau i save stori long pasim pamuk na pasin bikhet na pasin bilong kisim drak na wok bilong ol spirit nogut na i litimapim nem bilong ol dispela pasin olsem i gutpela samting.

Olsem wanem? Ating musik em i samting nogut? Nogat. Taim ol Isrel i lotuim God tru, em Jehova. ol i bin wokim musik na mekim singsing. Na taim Jisas i mekim tok piksa long yangpela man i go bek long papa, Jisas i tok Papa i amamas i tok papa i amamas tru long lukim pikinini i kam bek na em i wokim pati wantaim ‘musik na danis.’—Luk 15:25.

Musik Inap Givim Tingting long Man?

Nau, long taim bilong yumi, musik na singsing i bikpela samting long ol man. Ol i lain pinis long pasin bilong wokim ol plet singsing na kaset na ol i save wokim planti handet milion long olgeta yia. Wan handet samting yia bipo ol man i save go bung long wanpela haus o long wanpela hap na ol i harim wanpela man i wokim musik o em i singsing. O ol yet i save paitim gita o singim song samting. Long kain taim olsem tasol ol i save harim musik na singsing. Olsem na yumi laik save: Musik na singsing inap givim tingting long man o nogat? Em inap senisim tingting o pasin bilong man?

Wanpela samting em inap helpim yumi long save long dispela samting, em olsem: Ol samting ol man i mekim long rot bilong redio o televisen bilong grisim ol man long baim samting ol i bin wokim. Planti tok long redio na piksa long televisen ol putim bilong pulim ol man long baim sampela samting. Ol dispela tok na piksa i gat musik na singsing tu wantaim. Ol man i harim harim dispela singsing na dispela i givim tingting long ol bilong baim dispela samting. Singsing i kolim nem bilong dispela samting ol man bilong bisnis i bin wokim, na taim yumi harim yumi no inap lusim tingting long en. Ol liklik pikinini i save kisim kwik ol kain singsing olsem, na ol tok bilong singsing i pas tru long tingting bilong ol.

Long Isrel bipo ol i save mekim wok long musik bilong givim tingting long ol man, tasol em bilong givim gutpela tingting long ol na bilong kirapim ol long mekim gutpela wok. Taim ol i lotu ol i save mekim ol tok bilong Ol Sam olsem singsing. Dispela samting i helpim ol long putim gut ol dispela tok long tingting bilong ol bambai ol i no ken lusim tingting long en. Baibel i tok, taim ol i laik dediketim haus lotu Solomon i wokim, ol man bilong singsing bilong lain Livai na sampela man moa ol i go bung. Ol i holim “gita samting … na wan handet na twenti pris i sanap wantaim ol na winim biugel; na … ol man bilong winim biugel na ol man bilong singsing ol i singsing gut wantaim na litimapim nem bilong Jehova na tenkyu long em.” Dispela kain musik na singsing i kirapim tingting bilong ol man na strongim ol long mekim gutpela wok. Dispela kain musik na singsing i litimapim nem bilong Jehova.—2 Kronikel 5:12, 13, NW.

Long dispela taim ating ol i bin wokim musik na kolim ol tok bilong Sam 136 olsem singsing. Dispela musik na singsing i helpim ol long tingim gut ol dispela tok. Olsem na yumi save: Musik inap lainim man. Ol man inap mekim wok long musik o singsing bilong givim tingting long ol narapela man o bilong kirapim ol long bihainim wanpela pasin. Maski dispela musik em i musik nating o i gat singsing tu wantaim, na maski em i bilong bipo o bilong nau, ol inap mekim wok olsem long en.

Wanpela bikpela buk (Encyclopaedia Britannica) i stori long Ludwig van. Beethoven na i tok, planti man i ting dispela man “i winim olgeta narapela man long raitim musik.” Dispela buk i tok: ‘Musik bilong dispela man i kamapim klia tingting em i laik givim long ol man, maski em i musik tasol, no gat ol tok bilong singsing’ Wanpela hap musik bilong dispela man em planti man i save long en (Pastoral Symphony) i kamapim klia tingting bilong em, em i laikim tru ol diwai plaua samting God i bin wokim. Tru tumas, musik inap kirapim bel bilong yumi, na em inap bosim bel na tingting.

Orait, nau yumi ken stori long musik bilong narapela man bilong bipo, em Mahler. Long nau planti man bilong laikim ol musik bilong bipo ol i laikim musik bilong dispela man. Wanpela man bilong save long musik em i stori long bikpela tingting bilong dispela man, em i tok: ‘Mahler i tingting oltaim long i dai. Taim yu harim musik bilong em yu inap save, em i wok long painim as bilong i stap bilong yumi.’ Dispela man i stori long wanpela hap musik bilong Mahler (Symphony No. 1) na em i tok, pastaim dispela musik i makim amamas bilong i stap laip na bihain tingting long i dai i karamapim dispela.’ Na em i tok moa olsem: ‘Long narapela hap musik bilong em (Symphony No. 2), pastaim musik i makim tingting long i dai tasol, na bihain em i kamapim bilip Kristen olsem man i gat tewel na i no inap i dai. … Ol dispela musik i kamapim strong tingting bilong lotu.’ Tingting bilong Mahler i paul nabaut long ol samting bilong lotu na em i tingting planti long i stap bilong yumi na long i dai. Olsem na yumi laik save: Musik bilong em inap paulim tingting bilong man i harim?

Wanpela hap musik bilong narapela man bilong bipo (Rite of Spring bilong Stravinsky) em i wankain. Dispela musik bilong danis i makim yangpela meri singel em i danis i go i go inap long em i dai olsem ofa bilong mekim i dai kros bilong wanpela god giaman bilong ol haiden. Wanpela man i stori long dispela musik na em i tok, ‘Dispela musik i makim wanpela pasin lotu bilong ol haiden em i gat bikpela strong—em i kalabusim tingting bilong man na man i no tingting moa, em i mekim tasol ol samting musik i kirapim em long mekim.’ Ol man i harim dispela musik ol i save kirap nogut na tingting planti. Man bilong raitim dispela musik em i laik senisim tingting bilong ol Yuropin long ol olpela lo bilong musik na em i raitim dispela narapela kain musik i save kirapim nabaut tingting bilong man.

Olsem na yumi mas was gut long ol musik bilong bipo. Yu mas askim skin bilong yu yet, olsem: Dispela musik mi harim em bai mekim mi bel hevi? O em bai mekim bel i kirap tumas? Tingting bilong man bilong raitim dispela musik em inap bagarapim tingting bilong mi o nogat? Sapos dispela musik i no bagarapim bilip bilong man i bilip long God na long ol samting God i bin wokim, orait ating dispela musik i no ken mekim wanpela samting long tingting bilong man i harim, o em bai helpim na strongim tingting bilong em. Na tu, yumi inap harim musik na yumi no save man bilong raitim dispela musik i laik kamapim wanem tingting. Tingting yumi kisim taim yumi harim dispela musik em tingting bilong yumi yet.

Tasol olsem wanem long ol musik na singsing bilong nau? Em i save kirapim man long tingim gutpela samting na mekim gutpela pasin? O em i save bagarapim tingting bilong man na pulim em long mekim pasin i no stret? Em inap bagarapim gutpela pasin bilong Kristen na bagarapim em long spirit? Orait, nau yumi ken skelim dispela samting.

[Piksa long pes 8]

Ol inap mekim wok long musik bilong kirapim man long mekim pasin nogut.

[Piksa long pes 9]

Yu Ting Olgeta Musik Bilong Ol Inap Strongim Yumi Long Mekim Gutpela Pasin?

MAHLER

WAGNER

STRAVINSKY