Was Gut Long Musik i Laik Pulim Yumi Long Mekim Pasin i No Stret!
“Bikpela, yu lainim mi long samting yu laik mi mekim. Yu bringim mi long gutpela rot.”—SAM 27:11.
1. Presen bilong musik, God i givim long husat?
GOD JEHOVA i givim wanpela gutpela presen long ol man, em musik. Dispela i kamapim sori bilong God. Long wanem musik i no wanpela samting yumi mas kisim bambai yumi inap i stap laip, tasol long rot bilong musik na singsing yumi inap kamapim tingting i stap long bel bilong yumi—samting yumi hevi long en na samting yumi amamas long en. (Jen. 4:21) Taim yumi gat hevi, musik inap mekim isi bel bilong yumi. Na taim yumi amamas, musik inap mekim bel i moa amamas. Olsem Jems i tok: “Ating bel bilong wanpela brata i amamas? Orait em i mas singim song bilong litimapim nem bilong God.”—Jems 5:13.
2. Olsem wanem long lotu bilong Jehova musik na singsing?
2 Long bipo yet, taim ol man i lotu Jehova, ol i save singsing na mekim musik. Lain bilong Jehova long bipo, taim Jehova i helpim ol, ol i save amamas na mekim singsing bilong litimapim nem bilong Em. (Eksodas 15:1-21; Hetman 5:1-31) Jehova i tok ol i mas makim sampela man bilong singim song na mekim musik na ol i mas mekim wok long haus lotu bilong Em. (Sam 68:24-26) Krais Jisas na ol aposel i singim wanpela song taim ol i mekim pinis Kaikai Bilong Bikpela. (Mak 14:26) Aposel Pol i kirapim ol Kristen long kamapim tingting bilong ol na mekim “song bilong strongim spirit” Em i tok: “Oltaim yupela i mas kirapim song long maus na long bel bilong yupela tu.” (Efesas 5:19) Na long witnes bilong Jehova i save singsing ol i bung wantaim bilong lotu long Jehova.
3. I gat wanem samting na yumi ken save, musik i gat strong?
3 Musik i gat strong. Em i gat strong bilong kirapim bel bilong man. Ol gavman i save mekim wok long musik na singsing bilong kirapim ol man long givim bel long helpim kantri bilong ol. Na sampela skul i gat wanpela singsing ol i save mekim taim ol i insait long resis samting. Tok bilong dispela singsing i save kirapim ol skul manki long givim bel long winim resis. Na ol man i laik grisim yumi long baim sampela samting, ol i save putim musik na singsing long redio bilong pulim yumi long baim. Olsem na yumi save, musik i gat strong na yumi mas was gut.
Bilong Wanem Yumi Mas Was Gut?
4. Ol manmeri i lotuim Jehova, bilong wanem ol i was gut long musik?
4 Seten tu i save musik i gat strong. Sampela taim long rot bilong musik o singsing em i pulim bel bilong ol man na paulim tingting bilong ol na ol i lusim lotu tru bilong Jehova. Provep 4:23 i tok: “Olgeta taim yu mas was gut tru long tingting bilong yu.” Olsem na yumi mas was gut long ol kain musik na singsing yumi save harim. Long wanem musik i gat strong bilong kirapim bel bilong yumi na givim tingting nogut long yumi. Em inap pulim yumi na bai yumi lusim “gutpela rot” na yumi kirap mekim pasin i no stret, pasin i bagarapim nem bilong God.—Sam 27:11.
5. Bilong wanem yumi mas skelim gut musik na singsing yumi laik harim?
5 Musik em i wanpela gutpela samting God Jehova i bin givim long ol man. Tasol planti man i mekim nabaut long dispela gutpela samting God i bin givim long ol! Olsem na yumi mas skelim gut ol musik na singsing yumi harim. Maski yumi no putim yau long ol tok bilong singsing, tasol sapos yumi harim krai tasol bilong en yumi inap save, em i gutpela singsing o nogat, na em i laik kirapim ol manmeri long mekim wanem kain pasin. Taim Moses i stap longwe yet long kem bilong ol Isrel, em i harim musik na singsing i kamap na em i save, dispela “i no singaut bilong ol man i winim pait. Na i no krai bilong ol man i lus long pait.” Em i narapela kain. Na taim Moses i kamap pinis long kem na em i lukim pasin ol Isrel i mekim, nau em i save, dispela musik em i dispela kain i save kirapim ol long lotuim god giaman na mekim pasin i o stret. (Eksodas 32:15-19, 25) Olsem na long nau tu yumi mas skelim gut ol musik na singsing yumi harim, dispela musik o singsing i laik givim wanem kain tingting long yumi na em i laik kirapim yumi long mekim wanem kain pasin? Em i strongim yumi long mekim gutpela pasin o em i laik bagarapim gutpela pasin bilong yumi na pulim yumi long mekim pasin i no stret?
6. Seten i mekim wok long sampela musik na singsing bilong mekim wanem? Olsem na yumi mas tingim gut wanem tok bilong Pol?
6 Aposel Pol i save, Seten i laik bagarapim gutpela pasin bilong lain bilong Jehova. Em i laik pulim ol long mekim pasin i no stret. Olsem na em i tokim ol wanlotu bilong em, ol i mas klia long ol man i mekim pasin i no stret. Em i tok: “Olsem wanem stretpela pasin na pasin bilong sakim lo tupela i ken pren wantaim? Olsem wanem lait i ken bung. wantaim tudak? Ating Krais i save stap wanbel wantaim Seten, a?” (2 Korin 6:14-17) Long nau, long rot bilong musik na singsing i no stret, Seten i giamanim planti man na pulim ol long mekim pasin i no stret na ol i lusim God. Yumi ol witnes bilong Jehova i dediket long God, yumi mas was gut long ol dispela kain musik na singsing.
No Ken Insait long Wok Bilong Ol Spirit Nogut!
7. Olsem wanem Kristen inap save, wanpela kain musik o singsing i gat samting bilong ol spirit nogut long en?
7 Musik inap bagarapim yumi long ol samting bilong spirit. Planti string-ben na lain bilong paitim gita o mekim singsing long nau, ol i insait long wok bilong ol spirit nogut. Sampela ol i tokaut olsem ol save lotu long Seten, na dispela samting i kamap insait long singsing na musik bilong ol. Olsem wanem Kristen inap save wanpela kain musik o singsing em samting bilong ol spirit nogut o nogat? Sampela taim, sapos yu lukim tasol karamap bilong plet singsing o bilong kaset, yu inap save. Planti taim ol i putim ol narapela kain piksa long karamap, olsem piksa bilong masalaimeri o bilong samting bilong ol spirit nogut. Sampela taim nem bilong lain bilong singsing em i makim ol i insait long ol samting bilong ol spirit nogut. O nem bilong singsing o ol tok bilong singsing i makim olsem. Sapos yu lukim nem bilong wanpela singsing i olsem: “Laikim Tumas Seten” (tok Inglis, Sympathy for the Devil) bai yu ting olsem wanem? O sapos yu lukim nem bilong wanpela singsing i olsem: “Ol Pikinini Bilong Matmat” (tok Inglis, Children of the Grave), bai yu ting olsem wanem? Wanpela nius bilong Amerika (New York Post) i tok long wanpela kain singsing olsem na i tok, dispela singsing i “tokaut klia” olsem ol manmeri bilong mekim dispela singsing ol i “wok wantaim Seten.”
8. Ol i putim hait wanem kain tok long sampela plet singsing?
8 Long sampela plet singsing long nau i gat sampela tok i stap em i no stret wantaim ol tok bilong Baibel o em i tok bilong ol spirit nogut. Ol i putim hait ol dispela tok na ol i mas rivesim plet singsing bambai dispela tok i kamap. Wanpela singsing planti manmeri i laikim, sapos ol i rivesim, tok olsem i kamap: “Yu mas kisim drak maruana.” “Yu mas kisim drak maruana.” Na narapela singsing planti manmeri i save laikim, sapos ol i rivesim, i gat tok olsem i kamap: “Mi bai singsing long wanem mi save stap wantaim Seten, . . . o yes, switpela Seten.
9. Sampela kain musik i givim wanem kain tingting long yumi? Bilong wanem yumi mas was gut long dispela samting?
9 Tru, yumi no save rivesim ol plet singsing. Yumi no inap mekim olsem. Tasol taim yumi harim sampela kain musik na singsing, sapos yumi no was gut, tingting nogut, olsem tingting i no stret wantaim Baibel o tingting bilong ol spirit nogut, em inap go insait long tingting bilong yumi. Wanpela nius (High Fidelity Magazine) i kamapim tok bilong wanpela bos bilong wanpela kampani bilong wokim ol plet singsing. Dispela man i tok: “Olgeta musik bilong nau, nupela rok na nupela klasikal, i wankain tasol. . . . Yu mas opim tingting bilong yu na larim dispela musik i kam insait na kisim tingting bilong yu olgeta.” Tasol yu ting i gutpela yu mekim olsem? Sapos yu no was gut na yu opim tingting olsem, bai ol spirit nogut inap kam insait!—Skelim tok bilong Matyu 12:43-45.
10. Ol gutpela kristen i mas ting olsem wanem long olgeta samting i samting bilong ol spirit nogut?
10 Pol i laikim tumas ol brata Kristen bilong em na em i tokim ol: “Samting ol haiden i save ofaim, em ‘ol i ofaim long spirit nogut. Ol i no ofaim long God. Na mi no laik yupela i bung wantaim ol spirit nogut. I no inap yupela i dring long kap bilong Bikpela na long kap bilong ol spirit nogut wantaim. I no inap yupela i kaikai long tebol bilong Bikpela na long tebol bilong ol spirit nogut wantaim.” (1 Korin 10:20, 21) Ol gutpela Kristen i no ken insait long pasin pamuk samting o samting bilong ol spirit nogut.—Diuteronomi 18:10-12; Galesia 5:19-21.
11. Sapos Kristen i holim sampela plet singsing o kaset i gat samting bilong ol spirit nogut long en, em i mas mekim wanem?
11 “Spirit bilong God i givim tingting long Pol na em i raitim dispela tok. Olsem na sapos yumi lukim sampela plet singsing o kaset bilong yumi i gat samting bilong ol spirit nogut long en, orait, yumi mas mekim wanem? Yumi mas rausim. Yumi mas bagarapim. Long wanem, ol manmeri bilong Jehova ol i no laik “bung wantaim ol spirit nogut.” Ol Kristen bilong pastaim i bagarapim ol samting bilong ol em i samting bilong ol spirit nogut. Baibel i tok: “Planti manmeri i bin mekim posin na marila samting, ol i bungim buk bilong ol na kukim long paia long ai bilong olgeta manmeri. Ol i kaunim pe bilong olgeta dispela buk, na em inap 50,000 mani silva.” (Aposel 19:19) Ol dispela manmeri i ‘laikim tumas Jehova,’ ol i no laikim tru samting nogut. Maski i gat bikpela pe bilong en, tasol ol i bagarapim ol samting bilong ol em i samting bilong ol spirit nogut. Dispela samting i helpim ol tru long spirit.—Sam 97:l0.
Klia long Pasin Bilong Graun
12, 13. (a) Planti musik bilong nau na ol man bilong wokim musik i kirapim ol man long mekim wanem kain pasin? Planti taim ol i kirap mekim wanem? (b) Ol Witnes Bilong Jehova i mas bihainim tok bilong Galesia 6:7 olsem wanem?
12 Na yumi mas tingim pasin bilong ol manmeri bilong wokim musik na singsing long nau. Taim ol i paitim gita na singsing, ol i save mekim narapela kain pasin na mekim nabaut. (Skelim tok bilong Efesas 2:1-7.) Olsem: Taim ol i kanselim wanpela bung bilong harim musik, planti tausen manmeri i kam bung ol i kros na ol i kirapim pait. Wanpela nius (The Toronto Star) i stori long dispela samting, olsem: “Inap wanpela hap aua ol i tromoi ol botol na hap sen na ol narapela samting long ol polis . . . Ol i rausim 200 sia i pas long pos ain insait long simen. Ol i tromoi planti sia ain i go long pletfom. . . . Ol i brukim ol dua ain long ples bilong go insait, na brukim windo bilong ol ples bilong kisim tiket na bilong bikpela haus kaikai, na ol i bagarapim sampela ka i stap ausait long stediam.” Yu ting i gutpela sapos Kristen i go long kain bung olsem na bung wantaim ol man i mekim kain pasin olsem?
13 Long ol bung bilong harim musik, planti man i save dring na kisim drak. Na musik ol i harim wantaim ol samting ol man bilong wokim musik i mekim i save kirapim ol manmeri long mekim nabaut na ol i go wail olgeta. Ol dispela kain musik na ol samting bilong ol spirit nogut na drak na pasin pait, dispela olgeta samting i samting bilong bagarapim pasin bilong man na kirapim em long mekim pasin i no stret. Orait, yu ting yumi inap harim dispela kain musik long haus bilong yumi yet na i no ken bagarapim tingting na pasin bilong yumi? Nogat tru! Ol witnes bilong Jehova i laik i stap gut long God ol i save tingim gut lo bilong Baibel i tok: I no gat wanpela em inap long giamanim God. Sapos man i planim pikinini bilong kaikai, orait dispela kain kaikai tasol bihain bai em i kamautim.”—Galesia 6:7.
14. Bilong wanem i no stret sapos yumi harim musik o singsing i kirapim yumi long mekim pamuk samting?
14 Tasol sampela i ting olsem: “Mi no save tingim ol tok bilong singsing. Mi laikim tasol krai bilong musik bilong en. Em gutpela musik bilong danis.” Wanpela nius (The Times-Herald bilong Newport News, Virginia) i tok: ‘Man o meri i save go long disko, ating nait olgeta em i danis na harim wanpela singsing, tasol em i tingim tasol musik bilong dispela singsing na dispela wanpela bikpela tok ol i kolim planti taim insait long singsing.’ Tru, ating musik bilong singsing i gutpela bilong danis, tasol tok bilong en i lainim yu long mekim wanem? Yu ting i stret sapos wanpela witnes bilong Jehova i danis na harim harim wanpela singsing em bikpela tok bilong en i laik kirapim em long mekim pasin pamuk?—1 Korin 6:9, 10.
15. Wanem ol samting nogut i kamap insait long ol musik na singsing long nau?
15 Yumi stori pinis long dispela kain musik ol i kolim “rok” na “disko” samting em inap kamapim tingting nogut long bel bilong man. Tasol long planti kantri ol manmeri i gat ol kain musik na singsing long ol em planti man i save laikim, tasol krai bilong dispela kain musik na ol tok bilong singsing i no stret long tingting bilong ol Kristen tru. Wanpela nius bilong Amerika (The News & Observer bilong Raleigh, North Carolina) i tok, ‘Ol olpela singsing bilong “kantri” musik i save stori long ol meri pamuk na ol man i giamanim meri bilong ol, tasol ol dispela kain singsing long nau i save kolim klia olgeta pasin bilong pamuk ol i mekim.’ Na wanpela nius (The Spokesman-Review) i stori long singsing ol manmeri bilong nau i save laikim, em ol dispela singsing i kamapim tok long pasin i no stret, na nius i tok: ‘Ol meri i singsing long slip wantaim man long nait, na slip wantaim man long ples danis, na slip wantaim man long kona bilong rot.’ Olsem wanem long ol kain singsing olsem? Ol i givim tingting nogut tasol long ol manmeri na bagarapim pasin bilong ol, a?
16. Sapos bel bilong wanpela man i kirapim em long harim o danis long musik nogut, i gat wanem samting bilong helpim em?
16 Yu no ken lusim tingting: Bel bilong yumi ol sinman i save giaman tru. (Jeremaia 17:9) Olsem wanem? Bel bilong yu i pulim yu long harim musik o singsing i no stret long ai bilong Jehova? Yu save amamas long harim kain musik olsem na danis long en? Sapos olsem, orait yu mas lukaut! Yu mas beten askim God long helpim yu bambai yu ken ‘kisim save long ol pasin God i laikim na yu no ken poroman wantaim ol man i save mekim pasin bilong tudak.’ (Efesas 5:10-12; Sam 5:1, 2) Ol musik na singsing i laik pulim ol man long mekim pasin pamuk samting, sapos yu strong long sakim ol dispela kain musik, ating bai yu inap stretim ol narapela, em bel bilong ol i giamanim ol.
17. Taim yumi tingim musik na singsing, olsem wanem yumi ken bihainim tok bilong (a) Efesas 5:3? (b) Taitas 2:11-14?
17 Ol manmeri i bihainim pasin na tingting bilong dispela graun, ating ol i amamas long harim musik i mekim bel i kirap o harim singsing i stori long pasin pamuk samting. Tasol olsem wanem gutpela Kristen i ken laikim kain musik o singsing olsem? Baibel i tokim ol Kristen: “Pasin pamuk na olgeta pasin doti na mangal nogut, tok bilong ol dispela pasin em i no ken kamap liklik namel long yupela. I no inap yumi manmeri bilong God yumi toktok long dispela kain pasin.” (Efesas 5:3) Olsem wanem? Yumi ‘lusim pinis pasin bilong givim baksait long God na olgeta laik nogut bilong pasin bilong graun’? Sapos olsem, orait, yumi mas was gut na yumi no ken toktok long pasin pamuk na pasin doti o harim singsing i stori long dispela kain pasin. Yumi mas “tingting gut na wokabaut stret na bihainim pasin bilong God nau long dispela taim.”—Taitas 2:11-14.
18. Yumi ken mekim wanem ol askim long tingting bilong yumi long sampela man bilong wokim musik o singsing?
18 Yu ting olsem wanem long ol man bilong paitim gita na singsing samting? Askim skin bilong yu yet: Mi save pasim klos wankain olsem bilong ol? Mi save bihainim pasin bilong ol long komim gras na bilas na mekim toktok? Oltaim mi save toktok long ol na mi stori stori long musik bilong ol? Mi save pasim singlis o saket i gat piksa bilong ol long en? O mi putim piksa bilong ol long rum bilong mi? Olsem wanem? Mi litimapim nem bilong ol olsem ‘god’ bilong mi? Sapos mi mekim olsem bai God Jehova i amamas long mi? Baibel i tok yumi mas ‘lusim pasin bilong lotuim god giaman.’—1 Korin 10:14; Rom 1:24, 25.
Skelim Gutpela Pasin na Pasin Nogut
19. Yumi mas skulim gut tingting bilong yumi na olsem wanem bai dispela i helpim yumi long skelim gut musik na singsing yumi laik harim?
19 Aposel Pol i raitim tok, olsem. “Strongpela kaikai em i bilong ol man i kamap bikpela pinis. Kain man olsem ol i skulim tingting bilong ol yet planti taim, na ol inap pinis long skelim gutpela pasin na pasin nogut.” (Hibru 5:14) Ol papamama na ol yangpela ol i mas skulim tingting bilong ol bambai ol inap skelim gutpela pasin na pasin nogut. Ol i mas sakim olgeta ol musik na singsing i laik pulim ol long mekim pasin i no stret. Ol manmeri bilong dispela graun, em Seten i bosim ol, ol i save tok: ‘Laik bilong wan wan.’ Olsem na ol witnes bilong Jehova, ol yangpela wantaim ol lapun, ol i mas strong moa long mekim ol pasin i stret wantaim ol lo bilong Papa bilong ol long heven.—Sam 119:9-16; 1 Jon 5:19.
20. Yangpela man o meri i kirap laikim musik o singsing nogut, gutpela sapos em i mekim wanem?
20 Yu no ken lusim tingting: Musik i gat strong. Em inap pulim bel bilong yu. Olsem wanem? Bel bilong yu i kirap laikim ol singsing bilong dispela graun i gat tok i no stret? Orait, kwiktaim yu mas mekim ol samting bilong stretim tingting bilong yu. Sapos yu yangpela, orait, yu ken toktok wantaim papamama Kristen bilong yu long ol samting yu mas mekim. Na yu mas beten strong na askim Jehova long helpim yu long rot bilong spirit holi bilong em.—Provep 4:23; Luk 11:13; Galesia 5:22-24.
21. Ol papamama Kristen i ken mekim wanem bilong helpim pikinini bilong ol bambai ol i klia long ol musik na singsing nogut?
21 Yupela ol papamama, yupela i mekim wanem bilong helpim ol pikinini bambai ol i ken save wanem kain musik na singsing i gutpela na wanem kain musik na singsing i nogut? Yupela i Kristen, olsem na yu ting i stret sapos yu larim ol pikinini i harim singsing i stori long ol samting bilong ol spirit nogut o pasin pamuk o drak o pasin pait? Orait, taim yu laik baim nupela kaset o plet singsing bilong ol pikinini o ol pikinini i laik harim sampela kain musik o singsing, skelim gut pastaim. Yu ken lukim karamap bilong plet singsing o piksa i stap long kaset, i kamapim gutpela samting o samting nogut? Na skelim gut nem bilong dispela singsing na ol tok bilong en. Sapos singsing i nogut, orait long gutpela pasin toktok wantaim ol pikinini bilong yu long dispela samting. Ating yu ken tokim ol, yumi olgeta Kristen ‘long pasin nogut yumi mas i stap olsem liklik pikinini, tasol long tingting bilong yumi yumi mas kamap olsem bikpela man.’ Ol i no ken wok long save long ol pasin nogut na pasin i gat sem. Ol i no ken pulimapim tingting nogut long tingting bilong ol (1 Korin 14:20) Taim yupela i toktok pinis mipela save, bihain bai yu wantaim ol pikinini bai yupela i rausim olgeta plet singsing o kaset i no stret wantaim Baibel. Bai yupela i pasim tok long i no ken harim moa ol kain singsing nogut olsem.
22. Sapos yumi sakim musik na singsing nogut yumi lus long sampela samting? (b) Taim yumi skelim musik o singsing yumi laik harim, yumi mas i gat wanem kain tingting?
22 I gat planti gutpela musik na singsing yumi ken harim em i stret wantaim Baibel na em inap strongim yumi. I gat ol singsing bilong Kingdom ol witnes bilong Jehova long olgeta hap i save amamas long en. Olsem na sapos yumi sakim ol musik na singsing nogut, bai yumi no lus long sampela samting. Sapos oltaim yumi stadi na lainim ol tok bilong Baibel na bilong ol buk Kristen, bai yumi skulim gut tingting bilong yumi na bai yumi inap skelim gutpela pasin na pasin nogut. Yumi mas holim samting i stret. Sapos musik o singsing i no stret wantaim lo bilong Jehova, yumi mas sakim. Yumi mas bihainim tok bilong Em na strong long bihainim “gutpela rot” (Sam 27:11) Tru tumas, yumi mas was gut long musik i laik pulim yumi long mekim pasin i no stret! Ol musik na singsing yumi yet i laik harim em i mas litimapim nem bilong God, em i “save givim yumi planti gutpela samting bilong mekim yumi amamas.”—1 Timoti 6:17.
Bai Yu Bekim Olsem Wanem?
□ I gat wanem samting na yumi ken save, musik i gat strong?
□ Olsem wanem yu inap save wanpela kain musik o singsing i gat samting bilong ol spirit nogut long en o nogat?
□ Sapos yu gat sampela plet singsing o kaset i gat samting bilong ol spirit nogut long en, yu mas mekim wanem?
□ Sapos bel bilong man i kirapim em long laikim musik nogut, i gat wanem samting bilong helpim em?
□ Ol papamama Kristen i ken mekim wanem bilong helpim pikinini bilong ol long klia long ol musik na singsing nogut?
[Piksa long pes 10]
Lain bilong Jehova ol i no save laikim musik i bagarapim gutpela pasin bilong man
[Piksa long pes 12]
Yu ting i stret sapos Kristen tru i bihainim pasin bilong ol man bilong dispela graun ol i man bilong paitim gita o mekim singsing samting? Yu ting i stret em i bilas olsem ol?