Pas Bilong Ol Man
Sindaun Bilong Ol Man Long Kantri i Stap Daunbilo Mi laik tok tenkyu tru long gutpela stori long i stap bilong ol man long Ostrelia, nem bilong en “Sindaun Bilong Ol Man i Narapela Kain Long Kantri i Stap Daunbilo.” (Oktoba 8, 1997) Maski mi kaunim planti stori long ol kain kain gutpela samting bilong dispela kantri, stori bilong yupela i helpim mi long save olsem yumi mas tenkyu long Jehova long ol gutpela gutpela samting em i bin wokim.
L. K., long Jemani
Paradais i No Gat Hevi Long En Mi amamas tru long ol stori “Paradais i No Gat Hevi Long En—Wanem Taim Bai Kamap?” (Oktoba 8, 1997) Bubu meri bilong mi i dai paslain long taim mama i karim mi. Em i dai long sik kensa. Tasol long Paradais, bai i no gat sik moa. Dispela stori i strongim mi long stap strong bambai mi inap lukim em long Paradais.
M. J., long Trinidat
Mi gat 9-pela krismas, na mi laik tok tenkyu long stori “Paradais i No Gat Hevi Long En—Klostu Bai Kamap Tru.” (Oktoba 8, 1997) Mi pilim tru dispela stori, long wanem, papa bilong mi i mas i go longwe long wanpela hap, na long nait mitupela mama i save pret long opim wanpela windo, nogut wanpela man i brukim haus na i kam insait. Olsem na taim mi kaunim stori long ol tok promis bilong Jehova long pinisim pasin raskol na pasin bilong bagarapim man, bel bilong mi i stap isi.
D. M., long Amerika
Pait na Ol Pikinini Tenkyu tru long ol stori “Ol Samting Pait i Save Mekim Long Ol Pikinini.” (Novemba 8, 1997) Em i helpim tru yumi long save olsem, Kingdom bilong Jehova i mas pinisim ol samting nogut pait i kamapim. Tru tumas, ol dispela stori i kirapim tingting bilong yumi, na i helpim yumi long save long ol pasin nogut bilong givim pen long ol pikinini long ol narapela kantri em yumi planti i no save long en.
Y. C., long Inglan
Mi no amamas long kaunim ol stori long pasin nogut ol man i save mekim long ol pikinini. Nau long dispela taim tu mi laik krai. Mi no laik tru long lukim pasin bilong ol man i senis na ol i stap olsem ol man i no gat save na ol i no gat sori moa long narapela. Mi tok amamas long yupela i kamapim stret ol samting long dispela stori bilong kirapim tingting bilong ol man.
K. E., long Amerika
Yupela i No Man Bilong Dispela Graun Mi laikim dispela stori “Baibel i Tok Wanem? ‘Yupela i No Man Bilong Dispela Graun’—Wanem Insait Bilong Dispela Tok?” (Septemba 8, 1997) Taim mi stadi pinis long en, mi pasim tok long bel olsem mi no ken kolim dispela tok “ol man i no bilip” bilong makim man i no Kristen. Inap 30 yia i go pinis, mi tu i no wanpela Kristen. Sapos namba wan man i bin toktok wantaim mi long Baibel em i gat pasin antap, ating bai mi no gat laik moa long toktok wantaim wanpela Witnes gen!
B. G., long Amerika
Lotu na Pait Mi raitim pas bilong tok tenkyu long ol gutpela stori i toktok long lotu i insait long pait. (Me 8, 1997) Namba wan stori, “Kilim i Dai Ol Man Long Nem Bilong God” i kirapim tru tingting bilong mi. Em i sotpela stori na i kamapim kwik as bilong tok, olsem as na God Jehova i orait long ol Israel bilong bipo i kilim i dai ol Kenan.
S. J., long Amerika
Stori Bilong Ginger Klauss Mi laik tokim yupela olsem stori bilong Ginger Klauss “Nau Mi Amamas Long i Stap Laip!,” em i bin strongim tru mi. (Me 8, 1997) Olsem em, mi tu i no gat strongpela tingting o bel, na mi pilim olsem mi nogut pinis na i no gat wanpela i laikim mi. Mi no inap karim bel hevi bilong mi, olsem na olgeta de mi beten na krai long God olsem mi laik i dai. Mi tingim dai i olsem gutpela samting bilong pinisim hevi bilong mi. Tasol wanpela taim mi beten olsem: “Sapos em laik bilong yu, plis givim strong long mi na mi gat laik long i stap laip.” Bihain long mi beten olsem, mi kisim dispela Kirap! Taim mi lukim dispela stori, mi save God i bin harim beten bilong mi. Pasin bilong Ginger i lainim mi long lap na mi no ken tingting tumas long mi yet na long ol hevi bilong mi. Mi inap tok stret olsem, dispela wanpela nius i kirapim mi na mi gat laik long i stap laip.
M. K., long Japan