Pas Bilong Ol Man
Larim Ol Tasol Mi gat 22 krismas, na mi laik tok tenkyu long yupela long ol stori “Larim Ol Tasol—Dispela Pasin i Go Bikpela Tumas?” (Februeri 8, 1997) Ol yangpela Kristen i gat planti ol traim ol i mas winim. Dispela stori i helpim mi long skelim gut ol samting na i strongim mi long stap gut long wok bilong Jehova maski ol hevi bilong graun i laik daunim mi.
M. B., long Itali
Bikpela Kotkot Mi laikim tru dispela gutpela stori “Bikpela Kotkot—Olsem Wanem Em i Narapela Kain?” (Janueri 8, 1997) Mi gat 18 krismas na ol i kisim mi bilong wok haptaim long wanpela wok bilong skelim ol samting bilong graun, olsem ol diwai na ol animal samting. Namel long ol animal mipela i lukautim i gat tupela naispela kotkot. Mi kisim save olsem tupela i wankain olsem stori bilong yupela i kamapim—ol i gat save tru. Mi laik kamapim dispela stori long ol wanwok bilong mi.
J. C., long Amerika
Dispela stori yupela i kamapim em i tru na i gutpela. Ol pisin kotkot na wanlain bilong ol, ol i man tru bilong stil. Insait long banis bilong yunivesiti, em skul mi go long en long Gana, mipela i save gut long dispela pasin bilong ol. Ol kotkot i gat nem long stilim kain kain samting—maski em pis o hap sop o wanem samting. I gat ripot olsem ol kotkot i bin opim sospen bilong sampela skulmanki na kaikai ol kaikai bilong ol!
F. A. A., long Gana
Autim Rong Mi wanpela elda long kongrigesen, na mi laik tok tenkyu long stori “Ol Yangpela i Laik Save . . . Mi Mas Autim Rong Bilong Mi?” (Februeri 8, 1997) Dispela stori i kirapim sampela yangpela long autim ol bikpela rong ol i bin mekim sampela taim bipo. Em gutpela tru long lukim olsem taim ol i kisim helpim pinis, ol dispela yangpela i strongim gen pasin pren bilong ol wantaim Jehova. Ol i tingting strong long i stap klin.
O. B., long Itali
Dispela stori i helpim mi long save olsem sapos mi no tokaut long rong bilong mi dispela inap nogutim tru mi. Yumi save sem long autim rong bilong yumi long narapela, tasol taim yu autim pinis rong bilong yu long Jehova na papamama, dispela i save strongim pasin pren bilong yu wantaim ol.
B. K., long Gaiana
Dispela stori i kamap long taim i stret long mi. Em i helpim mi long save olsem mi mas tokim papamama bilong mi na ol elda long kongrigesen long samting mi bin mekim. Dispela tok yupela i raitim i sutim stret mi. Taim mi tokim ol pinis long ol hevi bilong mi, bel bilong mi i stap isi tru!
A. A., long Amerika
Indai Bilong Ol Bebi Tenkyu long dispela stori “Pasin Bilong Smok na Indai Bilong Ol Bebi” long hap “Sampela Tok i Kam Long Olgeta Hap.” (Februeri 8, 1997) Mi laik bai olgeta mama i mas tingim gut dispela tok long bel. Klostu pikinini man bilong mi i dai long sik SIDS (Sudden Infant Death Syndrome), long wanem, mi wok long smok taim mi gat bel. Inap wanpela yia bihain long dispela hevi, taim em i go slip, long olgeta taim em i mas putim wanpela masin (heart monitor) bilong skelim klok bilong em—sapos klok bilong em i no wok masin bai pairap bilong toksave. Man! Sapos mi save long Jehova long dispela taim bipo em bai gutpela tru. Bai mi lusim pasin bilong smok, na ating mitupela pikinini man bilong mi inap abrusim dispela bikpela hevi tru.
A. C. A., long Amerika