Taim Man i Dai Em i Dai Tru
“Dok i gat laip i winim laion i dai pinis. Olsem tasol, ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol.”—Saveman 9:4, 5.
PLANTI man i gat sampela bilip i no klia tumas olsem wanpela tewel i save lusim man taim em i dai na i stap laip yet, o i save kamap nupela gen long narapela narapela bodi. Na sampela i bilip olsem man i dai pinis em inap kamap laip gen. Ol i askim Thomas Lynch, em wanpela man i wok bisnis long stretim skin bilong ol daiman, long tingting bilong em long laip bihain long taim man i dai. Em i tok: ‘Ol dispela man i driman na lukim wanpela kain samting, na ol narapela samting i painim ol klostu long taim ol i laik i dai, ol i no dai na i kamap laip gen, nogat; i olsem ol i dai pinis, long wanem, mipela i no inap moa long skelim klok na ol narapela samting long skin bilong ol i makim olsem ol i stap laip yet o ol i dai pinis. Sapos yu “dai pinis” yu no inap kam bek.’—Nius The New York Times Magazine.
Baibel i tok stret long dispela samting inap planti tausen yia. “Dok i gat laip i winim laion i dai pinis. Olsem tasol, ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol.” (Saveman 9:4, 5) Go wokabaut liklik long wanpela ples matmat bilong bipo na bai yu save olsem dispela tok em i tru.
Olsem wanem? Dispela i makim olsem i no gat gutpela samting i wetim ol man i dai pinis? Baibel i no mekim wanpela tok i strongim bilip olsem ol man i gat wanpela tewel i no save dai. (Stat 2:7; Esekiel 18:4, 20) Tasol Krais Jisas i bin autim tok long kirap bek na i stap laip taim graun i kamap Paradais gen. Wanpela disaipel bilong lain Juda, em Mata, na nau tasol brata bilong em Lasarus i bin dai, em i bilip long kirap bek, long wanem, em i tok olsem long Lasarus: “Mi save, em bai i kirap bek long las de, long dispela taim olgeta manmeri bai i kirap bek.” (Jon 11:24) Jisas i bekim tok olsem: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip . . . Na olgeta man i stap laip na i bilip long mi, bai ol i no i dai. Nogat.” (Jon 11:25, 26) Paslain liklik long dispela taim, em i bin tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot.” Tasol Jisas i no mekim wanpela tok liklik long wanpela tewel i no save dai!—Jon 5:28, 29; Luk 23:43, NW.
[Rait long pes 31]
‘Sapos yu “dai pinis” yu no inap kam bek.’ Thomas Lynch, man bilong stretim skin bilong ol daiman