Pas Bilong Ol Man

Man i Painim Mama Tru  Mi laik tok tenkyu long dispela stori “Wanpela Gutpela Samting Tru Mi Kirap Nogut Long En.” (Mas 8, 1997) Man! Bel bilong mi i kirap tru long kaunim dispela stori long olsem wanem pikinini man hia i painim mama tru bilong em, na em i kisim save olsem mama tu em i wanpela sista bilong em long spirit!

M. G. D., long Itali

Aiwara bilong mi i pundaun taim mi kaunim stori bilong Dana Folz. Mi gat wanpela brata em papamama bilong mi i kisim em bilong lukautim. Taim em i kamap bikpela pinis em i painim mama tru bilong em. Ol i bin bung gen, tasol em i no gutpela bung na em i no amamas. Inap long nau, bel bilong em i no amamas taim em i tingim famili tru bilong em. Dispela stori i helpim mi long save olsem em bikpela samting long mi mas soim em olsem mi laikim em na mi mas mekim pasin isi long em.

M. D. L., long Ajentina

Mi painim nius bilong yupela long rum waswas bilong wanpela ofis long ples. Em i gat wanpela stori i kirapim tru bel bilong mi, winim ol narapela stori mi bin kaunim! Planti taim ol man i bin askim mi olsem: “Olsem wanem sapos meri i kisim bel taim man i reipim em? Sapos olsem yu ting i stret long meri i rausim bel?” Ol samting i painim Dana Folz em inap kirapim tru ol man long tingim gut laip bilong pikinini i stap yet long bel bilong mama.

M. P., long Amerika

Lain Raskol  Mi wanpela man bilong givim tingting long ol sekyuriti, na mi memba bilong lain Police-Community Relations Committee. Mi save olsem ol tok yupela i kamapim long olsem wanem yumi inap lukautim famili long pasin raskol, em ol gutpela tok long bihainim na em i bilong helpim yumi. (“Lain Raskol i Mekim Wanem Long Yu?,” long Kirap! Mas 8, 1997) Mi bin givim pinis dispela nius long ol narapela komiti. Man! Em gutpela samting tru long save olsem wanpela taim bai i kamap na i no gat moa pasin raskol.

C. E. J. A., long Naijiria

Ol dispela stori i helpim gut mi, long wanem, mi bin mekim Baibel-stadi wantaim wanpela man em i insait long wanpela lain raskol inap 11-pela yia pinis. Dispela stori i kamapim stret ol hatwok bilong lusim wanpela lain raskol. Jehova bai helpim em, na em tu inap lusim lain raskol sapos em i tingting long mekim olsem.

A. M., long Amerika

Ol Plaua  Mi gat 10-pela krismas, na mi laik tok tenkyu long yupela long stori “Ol Plaua i Makim Olsem Wanpela i Tingim Yu.” (Mas 8, 1997) Em i lainim mi long olsem wanem mi inap lukautim ol plaua bambai ol i no ken dai hariap.

L. C., long Itali

Inap planti yia mi laik save long olsem wanem mi inap lukautim ol plaua, long wanem, mi save laikim tru ol. Tasol planti taim ol i save drai wantu tasol. Ol tok yupela kamapim insait long Kirap! i bin helpim tru mi. Mi tok tenkyu tru long gutpela wok yupela i mekim.

J. P., long Meksiko

Mekim Nogut Long Narapela​—⁠Em Samting Nating?  Tenkyu long stori “Ol Yangpela i Laik Save . . . Mekim Nogut Long Narapela​—⁠Em Samting Nating?” (Epril 8, 1997) Long skul olgeta manki i save daunim ol narapela manki i no gat strong, na ol i subim mi tu long mekim wankain samting. Tasol tok yupela kamapim long dispela stori, olsem yumi mas tingim dispela hevi i painim ol manki i olsem hevi bilong yumi yet, em i helpim mi tru long abrusim pasin bilong mekim nogut long narapela. Mi tok tenkyu gen.

M. N., long Frans

Mi gat 17 krismas, na mi laik tok tenkyu tru long dispela stori. Em i makim olsem Jehova i harim ol beten bilong mi na dispela i strongim mi tru. Mi save olsem Jehova i no laikim pasin bilong mekim nogut long narapela na dispela i helpim mi tru long senisim sampela pasin bilong mi i no stret. Gutpela Lo Tru bilong Jisas na gutpela pasin bilong em tu, dispela i kirapim mi na i helpim mi long mekim pasin i stret.

V. T., long Itali