Pasim Sia Let Bilong Lukautim Yu
◼ Long Amerika, namba wan as bilong indai bilong planti yangpela namel long 5-pela na 24 krismas em ol ka i save bam.
◼ Long Japan, ol manmeri i save bagarap long rot i planti moa, winim ol meri i dai long sik kensa bilong susu (olsem dabol), na i winim moa yet ol man i dai long sik kensa bilong prostet (inap fopela taim).
◼ Long Yurop, ol bagarap i kamap long ka i kilim i dai planti man moa. Long olgeta wan wan man em ol i bin kilim ol i dai, i gat fopela i dai long ka i bam.
OL STORI hia i kamapim klia olsem planti bagarap i save kamap taim man i raun long ka—spit inap kilim man i dai. Man i dring na draivim ka em inap kilim man i dai. Gutpela tru na i gat rot long daunim dispela hevi bilong kisim bagarap taim ka i bam. Tasol yu inap mekim wanem samting?
Wok long kisim pasin bilong draivim gut ka, em namba wan samting bilong helpim yu. Sampela saveman i tok, 9-pela bilong ol 10-pela 10-pela bagarap i save kamap ol man inap abrusim. Tasol ol man i no save draivim ka stret long mak bilong spit ol i putim long rot, na ol i ran na baut baut nabaut na abrusim ol narapela ka, na ol i ran klostu tru long narapela ka, na ol i draiv taim ol i kisim drak o dring bia samting, na ol i draivim ka em sampela samting long en i bagarap pinis. Long hia yumi kolim sampela pasin tasol bilong man i no save was gut taim em i draivim ka. Sapos yumi tingim gut laip bilong man na yumi laikim ol narapela, dispela bai kirapim yumi long kisim pasin bilong was gut na ting olsem em i bikpela samting long draivim gut ka.—Matyu 7:12.
Sia let em i narapela samting bilong lukautim yumi, tasol planti taim ol man i ting em i samting nating. Tim Hurd, em mausman bilong lain U.S. Department of Transportation, em i tok, “sia let em i gutpela samting tru bilong lukautim laip bilong yu na yu no bagarap taim ka i bam. Em inap helpim tru ol man long abrusim bagarap.” Na sapos ol i pasim pikinini insait long sia bilong pikinini, em inap helpim ol moa yet long abrusim bagarap.a
Maski i gat ol dispela lo bilong draivim gut ka, ol i tok, klostu 32 pesen bilong olgeta pasindia long ol ka long Yunaitet Stets ol i no save pasim sia let. Sapos yu wanpela papa o mama, yu save was gut na pasim gut pikinini long sia bilong em taim yu laik kirap na draiv long ka? Dispela hap taim yu lusim bilong pasim sia let bilong pikinini em i bikpela samting.
[Futnot]
a Lain National Highway Traffic Safety Administration i tok: “Ol liklik pikinini i sindaun long sia bilong ol pikinini em ol i tanim na pikinini i lukluk i go baksait, ol i no ken pasim ol long sia bilong pasindia long poret i gat bek win long en. Taim win i go insait long bek na paitim pikinini i sindaun long sia bilong pikinini em inap bagarapim pikinini.”