Ol Eksiden Bilong Ka—Bagarap i No Inap Painim Yu?

“Mi save draivim gut ka, olsem na i no gat wok long mi tingting planti long wanpela eksiden i painim mi.” “Ol eksiden i save kamap tasol long ol yangpela draiva na ol draiva i save mekim nabaut.” Planti i save ting eksiden i no inap painim ol. Yu save ting olsem? Yu ting ol eksiden bilong ka i no inap painim yu?

TAIM ol i skelim hamas ka i save bam ol i luksave olsem sapos yu stap long wanpela kantri i gat planti mani samting, ating wanpela taim insait long laip bilong yu bai yu kisim bagarap long taim ka i bam. Long planti man, kain ol eksiden olsem i save kilim ol. Nau long olgeta wan wan yia long graun olgeta, winim 5 handet tausen man i save dai taim ka i bam. Ating planti bilong ol man i dai long yia i go pinis i ting olsem dispela samting i no inap kamap long ol. Yu inap mekim wanem na eksiden i no inap painim yu? Pasin bilong abrusim eksiden em bikpela samting. Orait, skelim ol samting yu ken mekim bilong abrusim eksiden i kamap taim man i draiv em i ai slip na ol hevi bilong man i go lapun.

Draiva i Ai Slip

Sampela saveman i tok olsem wanpela draiva i ai slip inap kamapim eksiden long rot wankain olsem wanpela draiva i spak. Ol ripot i soim olsem namba bilong ol eksiden ol draiva i ai slip i kamapim i go antap. Wanpela nius (Fleet Maintenance & Safety Report) i tok olsem insait long wanpela yia, long olgeta 12-pela 12-pela draiva long Nowe, wanpela i slip taim em i draiv. Long nius The Star bilong Johannesburg, Saut Afrika, i tok, long olgeta 10-pela 10-pela eksiden i kamap long rot long kantri, 3-pela i kamap, long wanem, skin bilong draiva i les olgeta. Ol ripot bilong ol narapela kantri i soim olsem planti draiva i save pilim skin i les olgeta taim ol i draiv. Bilong wanem i gat planti draiva i pilim ai slip?

Long nau ol man i save hariap hariap long mekim samting na dispela tu i kamapim dispela hevi. Nius Newsweek i tok olsem ating ol manmeri bilong Amerika “ol i no slip planti aua olsem ol lain bilong Amerika i bin slip long yia 1900 samting​—⁠na dispela hevi bai i go bikpela moa.” Bilong wanem? Dispela nius i kolim tok bilong wanpela saveman bilong skelim pasin bilong slip em Terry Young, olsem: “Ol manmeri i ting slip em i wanpela samting ol i ken sotim. Ol i ting man i no slip planti aua, em i man bilong wok strong na man i kamapim gutpela wok tru.”

Ol i tok olsem ol man i mas slip inap olsem 6-pela aua na hap i go inap 9-pela aua long olgeta nait. Taim ol man i no slip inap long skel, ol i kamapim wanpela “dinau bilong slip.” Wanpela ripot bilong lain AAA Foundation for Traffic Safety i tok: “Maski sapos man i sotim taim bilong em long slip inap 30 o 40 minit long ol de namel long wik, orait long wiken dispela inap kamap olsem 3-pela i go inap 4-pela aua dinau bilong slip i lus, na dispela inap mekim na man i laik slip long san.”

Long sampela taim, ating yu no inap slip gut long nait. Hevi bilong i no inap slip, lukautim wanpela pikinini i sik, o ol narapela samting em yu no inap bosim i mekim na yu no slip gut. Long de bihain taim yu laik draiv, bai yu pilim ai slip. Bai yu mekim wanem sapos dispela samting i kamap?

Ol pasin planti man i save mekim taim ai bilong ol i hevi olsem dring kofi, opim windo, kaikaim pike o samting i gat lombo long en i no inap mekim na yu no slip. Ol dispela pasin i no inap pinisim dispela hevi. Samting yu mas mekim, em slip. Olsem na yu mas kisim taim bilong slip liklik. Nius The New York Times i tok: “Bilong kisim nupela strong, pasin bilong slip liklik long belo i no ken winim 30 minit, long wanem, sapos yu abrusim 30 minit bai bodi i laik slip moa, na bai yu hatwok long kirap.” Tru taim yu slip liklik, ating yu bai kamap bihain taim liklik long hap yu laik go long en, tasol dispela bai mekim na yu stap laip longtaim.

Sindaun bilong yu inap mekim yu kamap draiva i ai slip. Olsem wanem? Yu save lusim planti aua long Intenet, o lukim TV i go inap long biknait? Yu save go long ol pati na stap inap long tulait? No ken larim ol dispela pasin i mekim na yu no slip gut. Saveman King Solomon i tokaut klia olsem liklik malolo em gutpela samting.​—⁠Saveman 4:​6, NW.

Ol i Gat Ekspiriens Tasol Ol i Lapun

Ol lapun draiva i gat planti ekspiriens long draivim ka. Na tu ol i save was gut na ol i save long ol samting ol inap mekim o ol i no inap mekim. Tasol i no olsem ol eksiden i no inap painim ol lapun draiva. Em i isi tru long ol inap kisim bagarap long ol dispela kain eksiden taim ol i wok long go lapun. Nius Car & Travel i tok: “Nain pesen bilong olgeta manmeri long graun em ol man i winim 70 krismas, tasol 13 pesen bilong ol man i dai taim ka i bam em ol man i winim 70 krismas.” Sori tru, namba bilong ol lapun i insait long eksiden i wok long go antap.

Tingim ol samting Myrtle, em i gat 80 krismas i wok long skelim.a Em i kirap long draiv winim 60 yia i go pinis na em i no bin bamim ka. Tru, olsem planti narapela, em i pilim ol hevi bilong i go lapun​—⁠ol dispela hevi inap mekim em i kamapim eksiden. Em i tokim Kirap!: “Taim yu wok long i go lapun, olgeta samting long laip bilong yu [draivim ka tu] bai i gat hatwok bilong en.”

Em i mekim wanem na em i no ken bamim ka? Myrtle i tok: “Kirap long sampela yia i go pinis na i kam inap nau mi mekim sampela senis, long wanem, mi go lapun.” Olsem: Em i no save draiv planti taim long nait. Dispela liklik senis i helpim em long i no insait long ol eksiden na ol i no ken pasim em long draiv.

Tru i hatwok long tok olsem, tasol olgeta man bai pilim hevi bilong i go lapun. (Saveman 12:​1-7) Kain kain hevi bilong helt bai kamap, yumi no inap hariap long mekim ol samting, na ai bilong yumi bai go tudak​—⁠olgeta dispela samting inap mekim na i hatwok long draiv gut. Tasol pasin bilong i go lapun, dispela tasol i no as na man i no inap draiv. Bikpela samting em pasin bilong em long draivim gut ka. Taim yumi luksave long ol senis i kamap long strong bilong bodi bilong yumi na yumi mekim sampela senis long i stap bilong yumi, dispela inap helpim yumi long draiv gut.

Ating yu no luksave long dispela samting, tasol strong bilong ai bilong yu long lukim ol samting i wok long senis. Taim yu wok long go lapun, ai bilong yu i no inap lukim ol samting long sait sait olsem bipo na hap bilong ai (retina) i laikim planti lait moa. Wanpela buklet, The Older and Wiser Driver, i tok: “Wanpela draiva i gat 60 krismas i mas i gat planti lait moa bilong lukim gut samting, winim wanpela yangpela i gat 16-19 krismas samting na ai bilong em bai kisim longpela taim moa long lukim ol samting taim lait i senis i kamap tudak.” Dispela ol senis long ai bilong yumi inap mekim na i hatwok long draiv long nait.

Henry i gat 72 krismas na em i draiv gut winim 50 yia. Ol yia i kam i go pinis, na em i kirap luksave olsem lait bilong nait i mekim na i hatwok long draiv. Bihain long dokta i sekim ai bilong em, em i save olsem em i mas kisim nupela aiglas em ol i wokim bilong pasim lait bilong nait. Henry i tok: “Nau i no hatwok long mi draiv long nait.” Dispela liklik senis i helpim em tru long taim em i draiv. Long sampela, olsem Myrtle, ol i no ken draivim ka long nait.

Taim man i wok long i go lapun, dispela inap mekim na em i no hariap long mekim ol samting. Ol lapun i gat gutpela tingting na ol inap skelim gut ol samting winim ol yangpela. Tasol, taim man i go lapun, tingting bilong em i save wok isi isi na em i no hariap long mekim ol samting. Dispela bai mekim na i hatwok long draiv, long wanem, ol ka i go kam long rot na ol samting bilong rot i save senis olgeta taim. Draiva i mas save kwik long ol dispela senis na mekim ol samting i stret hariap.

Nius Car & Travel i tok olsem “namba wan as bilong ol eksiden i kilim i dai ol lapun draiva em ol i no stopim ka stret long ol trafik lait.” Bilong wanem? Nius i tok moa: “Dispela hevi . . . i save kamap long taim wanpela lapun draiva i mas skelim ol toksave bilong rot i senis​—⁠olsem em i mas lukluk long ol ka i kam long han kais na han sut paslain long em i draiv i go long rot bung.”

Yu inap mekim wanem taim yu no hariap long mekim ol samting? Was gut taim yu draiv i go klostu long ol rot bung. Kisim pasin bilong sekim sekim ol ka taim yu kamap long rot bung. Mas was gut taim yu wok long tanim ka. Eksiden inap kamap taim yu tanim ka long rot bung na rot yu laik kisim em rot narapela ka i wok long kam long en.

Long Amerika, ol i save draivim ka long han sut, na long olgeta draiva i winim 75 krismas na ol i dai long eksiden long rot bung, 40 pesen bilong ol i kisim dispela bagarap taim ol i laik tanim ka i go long han kais. Lain AAA Foundation for Traffic Safety i tok long ol draiva long dispela kantri: “Long sampela taim, yu ken tanim ka 3-pela taim long han sut bilong i go long ples yu laik go long en bambai yu no ken tanim ka i go long han kais.” Ating yu inap stretim na bihainim dispela tingting (hia long Papua Niugini, olsem tanim ka 3-pela taim long han kais bilong kamap long hap i stap long han sut) long hap yu stap long en. Taim yu skelim ol samting pastaim, ating yu inap abrusim ol rot bung i hatwok.

Samting Yu Mas Tingim

Wanem samting i ken helpim yu long skelim pasin bilong yu long draiv? Gutpela sapos yu askim wanpela gutpela pren o wanblut long stap wantaim yu taim yu draiv na em i ken skelim pasin bilong yu long draiv. Orait putim gut yau long tok ol i mekim long samting ol i lukim. Ating bai yu laik go long wanpela kos bilong draiv gut. Planti ol skul bilong draiv i gat ol kos ol mekim em bilong ol lapun draiva. Sapos tupela taim o planti taim liklik klostu yu insait long wanpela bikpela eksiden, dispela i olsem wanpela toksave long yu olsem pasin bilong yu long draiv i no gutpela olsem long bipo.

Long wanpela taim bihain i stret yu mas pinis long draiv. Dispela em wanpela samting i hatwok long yu mekim. Myrtle, em yumi stori pinis long em, i save olsem i no longtaim bai em i no ken draiv moa. Long nau yet em i no draiv planti, em i save kalap long ka wantaim ol narapela. Em i pilim olsem wanem, taim em i givim wok bilong draiv i go long narapela? Em i tok: “Mi amamas long raun long ka na mi no wari long hevi bilong draiv.”

Taim yu tingim gut dispela samting, ating bai yu pilim wankain. Go long ol stua, lukim dokta na go long ol miting bai gutpela moa taim wanpela pren i go wantaim yu. Ating wanpela pren inap draivim ka bilong yu na kisim yu raun. Long dispela rot ating bai yu no bungim birua na bai yu amamas olsem yu no go wanpis long ka. Narapela gutpela rot em yu ken kalap long PMV samting. Tingim, ol man i no save tingim pasin bilong yu long draiv na ol i skelim olsem yu gutpela man o nogat. Ol gutpela pasin bilong yu em ol bikpela samting long ol famili bilong yu na ol pren bilong yu​—⁠na long God.​—⁠Sindaun 12:2; Rom 14:⁠18.

Maski yu lapun o yangpela, yu draiv planti yia o yu kirap nau long lain long draiv, ol eksiden bilong ka i ken painim yu. Yu mas save olsem i gat bikpela wok bilong draiv. Yu mas was gut na bai yu no insait long wanpela eksiden bilong ka. Taim yu mekim olsem, bai yu lukautim yu yet na ol narapela taim yu raun long ka bilong i go long narapela hap.

[Futnot]

[Piksa long pes 12]

Bodi bilong yu i mas kisim “nupela strong” taim yu slip gut long nait

[Piksa long pes 13]

Ating liklik slip bai kisim sampela taim bilong yu, tasol em inap mekim na sampela man i no ken dai

[Piksa long pes 13]

Ol lapun draiva i gat planti ekspiriens long draiv tasol ol i gat planti hatwok

[Piksa long pes 14]

I gat planti gutpela samting i kamap taim yu raun long ka wantaim narapela