Skin i Les Olgeta—Wanpela Hevi Bilong Ol Draiva

WANPELA MAN LONG JEMANI I RAITIM DISPELA STORI BILONG KIRAP!

OL AUA i kam i go. Krai bilong strongpela ensin i mekim wankain krai tasol, na i olsem tu long krai bilong ol 14 wil long rot, olsem na draiva bilong trak em i hatwok long bosim skin​—⁠skin i les olgeta. Ol lait bilong trak i holim ol mak i brukim rot long 2-pela hap na taim trak i ran i go, ol mak i go hariap hariap tasol. Nau wantu tasol trela long baksait i wok long go i kam; trak i laik lusim rot.

Draiva i tanim strong stia, na trak bilong em i gat hevi olsem 40 ton em i kam bek long rot. Olaman! Draiva i kirap nogut tru! Ai bilong em i no slip moa, na em i save, ol samting i bin kamap insait long sampela sekon tasol, em i no inap tingim. Skin bilong em i les olgeta.a

Taim skin bilong man i les olgeta na em i draivim ka o trak samting, i no hatwok long ai i slip inap sotpela taim. Long nau planti ka samting i save pas pas long ol rot, olsem na taim ai i slip em inap kamapim bikpela bagarap long draiva yet na ol narapela man i draivim ka samting. Olsem: Long Saut Afrika, ol bagarap i bin painim ol semitrela kirap long Janueri 1989 i go inap Mas 1994, winim 35 pesen bilong ol i bin kisim dispela hevi, long wanem, draiva i slip.

Profesa G. Stöcker, em i wanpela man bilong skelim pasin bilong ol man i save draivim ka o trak samting, na long nius Fahrschule bilong Jemani em i tok, taim skin bilong man i wok long les olgeta, ai i laik slip, na samting dispela i save mekim long skin i wankain liklik long samting dring i save mekim long skin. Tok bilong em i stret long ol man bilong draivim trak na long ol man bilong draivim ka tu.

Ol As na Skin i Les Olgeta

Bilong wanem planti taim birua i kamap long rot, long wanem, skin bilong man i les olgeta, tasol lo bilong planti kantri i tok draiva i no ken winim planti aua long draivim trak? Orait, yumi mas tingim olgeta aua ol draiva i save wok​—⁠ol aua ol i lusim long draivim trak na ol aua ol i lusim bilong mekim sampela wok moa. Ol i mas wok planti aua na sampela taim ol i mas senisim ol aua bilong wok.

Planti draiva i laik pinisim olgeta wok bilong ol, olsem na maski i gat san, ren, ais, ol bai kisim kago i go long ol man bilong baim. Ol kampani i laikim draiva i save winim planti kilomita na karim planti kago i go. Ol aua bilong draiva long wok i winim ol aua planti ol narapela man i save wok. Long Jemani, klostu olgeta man i save wok 36 aua samting long wanpela wik, tasol planti draiva i save wok 72 aua samting.

Long ol narapela kantri ol samting i wankain liklik. Long Saut Afrika, ol man i save kisim liklik pe tasol, olsem na bilong kisim liklik hap mani moa, ol draiva i save wok planti aua. Ol ripot i kam long India i tok, ol kampani bilong trak i givim taim long ol draiva i ken pinisim raun bilong ol, tasol bilong kisim liklik hap mani moa planti draiva i save kisim sampela hap kago moa bilong karim i go long sampela hap moa. Em nau, ol i mas lusim sampela aua moa long draivim trak. Olsem na bilong kam bek long ples wok long taim stret, ol i no inap slip planti aua.

Long sampela kantri bilong Yurop, lo i makim hamas aua insait long wanpela wik ol draiva inap draivim trak bilong ol, olsem na sapos ol draiva i skelim gut ol dispela aua, ol inap draivim trak inap 56 aua insait long wanpela wik, tasol long wik bihain, ol i no ken winim 34 aua long draivim trak. Wanpela kain liklik masin insait long trak i save makim hamas aua draiva i save draivim trak, na hamas minit o aua bilong putim kago long trak na long rausim kago. Dispela masin i mekim na papa bilong trak inap save, olgeta wan wan draiva i save bihainim lo o nogat.

Na narapela samting tu na draiva bai wok planti aua, em tingting bilong papa bilong trak. Em i bin tromoi bikpela mani long baim trak, olsem na em i laik bai trak i mekim bikpela wok; sapos inap em i laik bai trak i ran 24 aua long olgeta de, na olgeta taim trak i karim kago. Na nau ol kampani bilong trak i resis long mekim wok bisnis i go bikpela, olsem na ol maneja i strong long ol draiva i wok planti aua moa sapos ol i orait long mekim olsem.

Skin bilong man i save les olgeta taim em i mas wok planti aua na taim wok bilong em i kirap long narapela kain taim stret. Olsem: Planti draiva i kirap wok namel long 1 klok na 4 klok moningtaim. Long dispela kain taim skin bilong planti draiva i no gat strong na ol i no inap putim gut tingting long wok bilong ol. Na hevi bilong ol draiva i go bikpela moa sapos ol bisnis i no save holim planti kago, olsem na taim kago bilong ol i laik pinis ol i strong long nupela kago i mas kamap long ‘taim stret.’ Em nau, draiva i mas kamap long ples bisnis wantaim kago long taim ol i bin makim. Sapos i gat planti ka long rot, o ren samting, o ol wokman i stretim rot, dispela inap mekim na hap taim i lus, olsem na draiva i mas mekim sampela samting na em i no ken kam bihaintaim.

Maski i gat lo long hamas aua ol draiva inap draivim trak, taim polis i sekim ol draiva, ol i painim sampela draiva i no save bihainim lo. Wanpela nius (Polizei Verkehr & Technik) i tok: “Long olgeta 8-pela 8-pela draiva bilong trak, bas, na bikpela semitrela i karim kago nogut, wanpela draiva i no save bihainim lo long hamas aua em inap draiv na malolo.” Taim ol polis i pasim ol trak samting long Hambek bilong sekim, ol i kisim save olsem draiva bilong wanpela trak em i bin draiv inap 32 aua, no gat malolo.

Luksave Long Hevi

Inap 30 yia wanpela man i bin draivim trak i go long ol longwe ples bilong karim ol kago i go long ol narapela kantri, na ol i bin givim askim long em long dispela hevi bilong skin i les olgeta. Em i tok: “Pasin antap na pasin hambak inap mekim na draiva i no laik tingim skin bilong em, olsem skin i les. Kain tingting olsem i mekim na birua i save kamap long rot.” Long blok long pes 22, i gat sampela samting i makim olsem skin i les olgeta.

Man i luksave kwik olsem skin i laik les, dispela inap helpim em na ol narapela man long abrusim bagarap. Long Yunaitet Stets, ripot bilong wanpela lain (National Transportation Safety Board) i kamapim klia wanpela samting nogut, olsem: Long 107 draiva i no bin dai taim trak bilong ol i kisim bagarap, inap 62 bilong ol i gat hevi long skin i les olgeta. Olsem na ol kampani bilong trak i ting i bikpela samting long wokim wanpela kain masin samting bilong toksave long draiva taim ai bilong em i laik slip.

Wanpela kampani bilong Japan i wok long wokim wanpela masin i gat video-kamera bilong skelim hamas taim draiva i save pasim na opim ai bilong em. Sapos ai bilong draiva i hevi na i pas na isi isi i op, wanpela nek bai kamap long masin bilong tokaut long draiva olsem em i laik slip. Wanpela kampani bilong Yurop i wok long wokim wanpela kain samting bilong skelim ran bilong trak, olsem draiva i stiaim gut trak o em i tanim nabaut stia. Sapos trak i seksek nabaut, wanpela masin bai krai insait long haus kepten. Tasol ol faktori i no wokim yet ol kain masin olsem.

Ol Samting Bilong Daunim Hevi

Skin i les olgeta i olsem wanpela pasindia i sindaun long olgeta ka na trak, tasol draiva i no laikim em na em i no bin singautim em i kam raun wantaim em. Olsem na yumi laik save olsem wanem draiva i ken rausim em. Sampela draiva i mekim save long ol dring i gat marasin kafin long en, tasol maski ol i mekim olsem, skin i les yet. Na sampela draiva i save kisim sampela samting moa bilong kirapim tingting na bai tingting i wok gut. Tasol ol dispela samting inap givim sik long skin. Long Meksiko, sampela draiva i save kaikai lombo i gat bikpela pait na ai i no ken slip.

Pastaim long draiva i kirap long moningtaim tru na draiv, em i mas kisim gutpela slip. Na olsem lo i tok, em i mas draivim trak inap long ol aua i stret long lo. Long Saut Afrika ol saveman i tok, inap 5-pela aua bihain long em i draivim trak, i gutpela sapos draiva i malolo liklik. Long ol rot i go stret tasol na i no gat planti baut baut long en, draiva mas mekim sampela samting na bai tingting bilong em i wok gut na i no slip. Sampela draiva i save opim redio o ol i toktok wantaim ol narapela draiva long wanpela kain redio (CB) long trak. Wanpela draiva, em i wanpela Witnes Bilong Jehova, em i save harim ol kaset bilong Baibel, olsem ol kaset i gat ol tok bilong Wastaua na Kirap! na Baibel long en. Sampela samting moa bilong helpim ol draiva i stap long blok long dispela pes.

Pe bilong ol samting i wok long i go antap na i hatwok moa long kisim mani inap long helpim sindaun bilong yumi, olsem na i hatwok tru long kisim stretpela tingting long dispela samting. Sampela kampani o maneja ol i no ting pasin bilong skin i les olgeta em inap mekim na draiva i kisim bagarap. Olsem na olgeta man i gat wok long sampela samting bilong trak, ol i mas tingim save ol man i kisim pinis long pasin bilong skin i les olgeta. Na tu, ol draiva yet i save long sampela samting i bin painim ol na em inap helpim ol narapela draiva long daunim dispela hevi long ai i laik slip.

Tasol nambawan rot bilong was long dispela hevi, em long bihainim toksave bilong skin: Sapos skin bilong yu i pilim narapela kain, orait taim yu kamap long hap ol trak i save malolo long en, pasim trak na slip liklik. Bihain, yu inap kirap na draiv i go. Nogut yu kisim bagarap long dispela hevi bilong skin i les olgeta​—⁠em wanpela hevi ol draiva i no inap lukim!

[Futnot]

[Blok long pes 22]

Sampela Samting i Makim Olsem Yu Mas Mekim Samting Wantu

• Olsem wanem? Ai bilong yu i sol o i hevi?

• Tingting bilong yu i lukim wanpela samting i no stap tru o tingting i wokabaut?

• I olsem rot i liklik na yu draivim trak namel long rot?

• Sampela hap yu bin raun long en yu no inap tingim?

• Planti taim yu tanim nabaut stia na mekim nabaut long brek na trak i no ran gut?

Sapos yu tok yes long wanpela tasol bilong ol askim antap, dispela i makim olsem wantu yu mas malolo

[Blok long pes 23]

Taim Yu Raun Longwe

• Kisim gutpela slip

• Long olgeta taim no ken kisim ol samting bilong kirapim tingting

• Planti taim kisim liklik malolo, na eksasais, olsem tromoi han lek samting

• No ken lusim tingting: Bagarap inap kamap long ol rot i go stret tasol na i no gat planti baut baut long en

• No ken kirap raun sapos yu hangre. Skulim skin bilong yu long kaikai gut: kisim gutpela kaikai, tasol no ken kisim planti tumas

• Dring planti wara samting, tasol no ken dring bia