Rot Bilong Abrusim Kar Eksiden

NOIS bilong taia i sikirapim rot, pairap bilong kar i bam, glas i bruk, ol manmeri i singaut . . . em ol nois ol man husat i bin insait long kar eksiden i save long en. Lain Population Reference Bureau i tok olsem long olgeta hap bilong graun, “long olgeta yia, inap olsem 1.2 milion manmeri i dai long ol eksiden i kamap long rot, na inap 50 milion manmeri i kisim bagarap.”

Pasin bilong tingim seifti na bihainim gutpela tingting inap helpim yu long abrusim planti eksiden. Orait nau yumi ken stori long dispela.

Spit Limit, Sitbelt, na Salim Teks

Yu inap ting olsem long sampela rot spit limit em daunbilo tumas. Tasol sapos yu abrusim spit limit, ating bai yu no kamap hariap tru long hap yu laik i go long en. Olsem, sapos yu draiv inap 50 kilomita long rot we spit limit em 90, tasol yu spit long 110, orait bai yu winim 6-pela minit tasol. Yu ting em savetingting long spit na winim sampela minit tasol na eksiden inap kamap?

Ol i wokim ol sitbelt bilong lukautim ol man. Wanpela lain bilong gavman long Amerika i tok olsem, long 2005 i go inap 2009 long kantri bilong ol, sitbelt i bin helpim inap olsem 72,000 manmeri long abrusim indai. Sapos kar i gat air bag, yu ting i no gat wok long putim sitbelt? Nogat, i no olsem. Taim kar i gat air bag na man i putim sitbelt, tupela wantaim bai lukautim gut moa laip bilong man. Tasol sapos yu no putim sitbelt, orait air bag i no inap mekim gut wok bilong en, na em inap bagarapim yu tu. Olsem na kisim pasin bilong putim sitbelt, na tokim ol pasindia long mekim wankain. Narapela tok lukaut: No ken tru ritim o raitim teks mesis taim yu draiv.

Rot na Kar

Sapos rot i wet, i gat planti das, wesan o karanas long en, ol taia i no inap holim gut rot. Sapos yu no spit, ating kar bai no wel taim yu putim brek. Long sampela kantri, sapos ol man i draiv long ol rot i gat ais o sno long en long taim bilong kol, i gutpela sapos ol i baim ol taia bilong sno. Ol dispela kain taia i gat bikpela grip bilong holim gut rot.

Ol rot bung em ples we eksiden inap kamap. Wanpela tisa bilong skulim ol man long draiv i tok olsem: Taim trafik lait i grin, wet liklik paslain long yu draiv i go. Taim yu wet inap liklik taim tasol, ating yu inap abrusim kar we i no bin stop long retpela lait na nau em bai no bamim yu.

Pasin bilong lukautim na stretim kar bilong yu i wanpela bikpela rot bilong abrusim ol eksiden. Tingim samting inap kamap sapos brek bilong kar i no wok gut taim yu draiv. Bilong ensin samting bilong kar i ken wok gut, sampela papa bilong kar i save kisim kar i go long wanpela gutpela mekenik bilong em i ken sekim na stretim kar. Tasol sampela papa bilong kar, ol yet i save stretim sampela hevi bilong kar. Maski yu yet o narapela i stretim kar, em bikpela samting long wanpela i sekim gut na stretim kar bilong yu.

Dring na Draiv

Ol draiva husat i save draiv gut, ol inap kisim eksiden sapos ol i draiv bihain long ol i bin dring liklik alkohol tasol. Long 2008, long Amerika, winim 37,000 manmeri i dai long kar eksiden. Inap 33 pesen bilong ol i dai long ol eksiden we draiva i bin dring alkohol. Liklik alkohol tasol inap mekim na yu no draiv gut. Sampela i pasim tok olsem ol bai no dring liklik sapos ol i laik draiv.

Pasin bilong bihainim ol lo bilong trafik, putim sitbelt, stretim gut kar, na no ken draiv bihain long yu dring alkohol, ol dispela samting inap lukautim laip bilong yu na bilong ol narapela man. Ol dispela tok inap helpim yu long abrusim eksiden taim yu draiv, tasol yu mas bihainim ol dispela tok.

[Blok/Piksa long pes 11]

No Ken Draiv Taim Yu Aislip

“Ol man i mas tingim olsem sapos man i aislip na draiv, dispela i wankain olsem man i dring na draiv.” Dispela tok bilong wanpela wokman bilong lain U.S. National Sleep Foundation, i soim olsem eksiden inap kamap taim yu aislip na draiv. Daunbilo ol i kolim ol samting i makim olsem i no seif long yu draiv:a

● Hatwok long lukluk stret, blinkim ai klostu klostu, o ai i hevi

● Hatwok long apim het na lukluk stret

● Yon klostu klostu

● Hatwok long tingim ol samting yu bin lukim long rot insait long sampela kilomita i go pinis

● I no lukim ol trafik sain

● Hatwok long stap long sait bilong rot yu draiv long en, draiv klostu tumas long narapela kar

Sapos wanpela bilong ol dispela samting i kamap long yu, larim narapela man i draiv o stop long wanpela hap we yu ken slip liklik. Maski yu leit, seifti bilong yu na bilong ol narapela i bikpela samting moa!

[Ol Futnot]