Let Bilong Lukautim Laip

WANPELA nius i tok, “Pasin bilong mekim wok long sia let em nambawan gutpela rot bilong daunim namba bilong ol birua na ol bikpela bagarap i save kamap taim ol ka i bam.” (Morbidity and Mortality Weekly Report, MMWR) Wanpela ripot i tok, taim ol man i mekim gut wok long sia let, namba bilong man inap i dai long taim ol i kisim birua long ka i go daun inap 43 pesen. Na namba bilong ol man inap kisim bikpela bagarap i go daun olsem 50 pesen.

Long yia 1970 gavman bilong Ostrelia i kamapim long namba wan taim pasin bilong mekim wok long sia let i olsem wanpela lo. Long nau inap 35 kantri i gat lo bilong mekim wok long sia let. Taim ol man i brukim dispela lo, ol i mas baim kot, na sampela taim polis inap rausim laisens bilong ol long draivim ka. Sampela gavman i kamapim lo olsem ol pasindia i mas pasim sia let (maski ol i sindaun long poret o long baksait).

Nius MMWR i tok, “long olgeta hap bilong graun, insait long olgeta wan wan yia samting olsem 300,000 manmeri i save dai, na 10 i go inap 15 milion manmeri ol i save kisim bagarap taim ol ka i bam.” Dispela namba inap go daun moa sapos ol dispela manmeri i bin pasim sia let.