Jeni Ren—Liklik Pisin, Strongpela Krai

WANPELA MAN LONG BRITEN I RAITIM DISPELA STORI BILONG KIRAP!

OL PLAUA primros i karamapim graun arere long wara, na lait bilong san i sut i kam insait long ol diwai, olsem na gras na lip bilong ol diwai samting ren i bin wasim, ol i lait tru. Mi sindaun na malolo long wanpela diwai i pundaun pinis na mi lukluk i go long tupela liklik pisin. Ol i hariap i go i kam long wanpela kain gras i drai pinis na i hangamap i kam daun long wanpela liklik ples ston antap long wara.

Mi laik save long samting ol pisin i mekim, olsem na mi kirap sanap bilong lukim. Em nau, mi painim haus bilong wanpela pisin ren. Em i bin wokim gutpela haus long wanpela kain mosong na i hait gut insait long dispela gras. Bikpela bilong pisin ren i olsem 10-pela sentimita tasol, kirap long arere bilong maus bilong en i go inap long tel, na ol man i tok, em i wanpela liklik pisin tru bilong Briten.a Long dispela as, long 1937 ol i wokim piksa bilong dispela pisin long wanpela liklik mani tru bilong Briten long dispela taim.

Jeni ren o kiti ren, em tupela nem ol man bilong bus long Inglan ol i save kolim long pisin man na pisin meri. Planti man long Yurop, na ol hap namel long Yurop na Esia, na long Yunaitet Stets, ol i save long dispela pisin. Long Briten i no gat narapela pisin i stap long planti hap bilong kantri olsem dispela pisin, na long ol pisin i save kamapim pikinini long Briten, dispela pisin i bikpela lain, winim ol narapela. Krai bilong en i swit tru na sampela i tok, krai bilong en i olsem krai bilong pisin naitingel. Na maski pisin i stap longwe olsem wanpela kilomita, ol inap harim strongpela krai bilong en! Tasol long taim bilong bikpela kol planti pisin ren i save bagarap, na sampela taim inap 75 pesen bilong ol pisin ren i bin kisim bagarap. Long kain taim olsem, ol pisin ren i laik bung wantaim bilong hatim skin liklik. Wanpela taim ol i painim 60 pisin ren ol i bung bung long wanpela bokis bilong putim kiau.

Long mun Epril, pisin man i save wokim kain kain haus, mak bilong en i raunpela na i hait gut tru. Taim em i wokim pinis ol haus, em bai kisim pisin meri bilong em i go lukim olgeta haus. Orait, pisin meri bai makim wanpela haus na bilasim long gras bilong pisin. Long pinis bilong mun Epril, em i putim pinis 5-pela o 6-pela waitpela kiau i gat retpela na braunpela mak mak. Pisin meri tasol bai sindaun long ol kiau inap 14 de, na tupela wik samting bihain ol pikinini bai lusim haus.

Long taim bilong san ol pisin ren i save kamapim pikinini tupela taim, na taim pisin meri i sindaun long ol namba 2 kiau, pisin man bai lukautim ol pikinini i bin kamap long ol namba wan kiau. Sampela taim em bai kisim ol pikinini i go long narapela haus bilong em. Sapos taim bilong san i gutpela na i gat planti binatang bilong kaikai, pisin man bai kisim narapela poroman na kisim em i go long narapela haus bilong em.

Mi sindaun long dispela diwai i pundaun pinis, na mi inap pilim san bilong mun Me i hatim skin bilong mi, na mi lukluk i go long dispela tupela pisin ren i flai i go i kam. Taim tupela i sindaun long liklik han bilong diwai klostu long hap mi sindaun long en, mi lukim gras bilong ol​—⁠gras i retpela na braunpela, na pul bilong ol i gat ol longpela mak. Tasol taim ol i save mi stap long hap bilong ol, liklik tel bilong ol i sanap, na ol i kirap mekim krai bilong ol bilong toksave olsem birua i stap. Em nau, isi isi mi mas lusim hap bilong ol.

[Ol Futnot]