‘Wok Bilong Yupela i Save Helpim Ol Man Olsem Wanem?’
DISPELA em i wanpela askim em Chandrakant Patel, wanpela niusman bilong India, em i mekim long wanpela man i wok long hetkota bilong ol Witnes Bilong Jehova, long Bruklin, Nu Yok. Mista Patel i go raun lukim ol samting long hetkota na em i kirap nogut tru long ol samting em i lukim na harim, olsem na taim em i go bek long India, em i raitim wanpela stori bilong wanpela niuspepa long tok ples Gujarati.
Mista Patel i stori long sampela bilip bilong ol Witnes Bilong Jehova na skelim wantaim bilip bilong ol narapela misin long India, na em i tok ol Witnes Bilong Jehova i save bilip long God i gat olgeta strong, em Jehova, na dispela i narapela kain long God Triwan em planti misin i save skulim ol man long en, na ol Witnes i no save mekim wok long ol imis taim ol i lotu. Em i tok, em i lukim ol Witnes i bihainim ol stretpela lo, long wanem, ol i strong long bihainim ol lo Kristen em Baibel i makim long pasin bilong bagarapim marit, rausim bel, na bel nogut long ol narapela o kilim ol i dai. Em i tok ol Witnes ol i lain bilong i stap bel isi, na laikim ol narapela, na ol i no save belhat kwik, na ol i tingting long helpim ol narapela, na tu, ol i no save pret, na ol i save givim bel long autim tok bilong Baibel long ol narapela.
Niusman bilong India i kisim wanem bekim long askim bilong em olsem, ‘Wok bilong yupela i save helpim ol man olsem wanem?’ Em i tok: ‘Bekim mi kisim i olsem: Pasin bilong skulim man long Baibel, dispela inap helpim em long olgeta samting em i mekim.’ Mista Patel i laik save long wok bilong helt na wok mani samting. Em i kamapim sampela tok ol brata i kamapim bilong bekim askim bilong em, na em i tok: ‘Sapos wanpela man i bihainim ol tok Baibel i mekim long sakim ol samting nogut olsem smok na ol drak na em i bihainim stretpela pasin, em i ken abrusim ol sampela kain sik. Na ol man i wok strong, na wokabaut stret, na bihainim stretpela pasin, ol inap painim wok mani. Na tu, pasin bilong stretim ol hevi long pasin isi na gutpela pasin em inap mekim na narapela i pas gut wantaim narapela. Olsem na pasin bilong skulim man long ol tok bilong Baibel i save helpim man long hap em i stap long en.’
Taim dispela niusman i go long hetkota bilong ol Witnes Bilong Jehova, em i lukim ol manmeri i bihainim tok bilong Baibel. Stori bilong em i litimapim tru pasin bilong ol dispela manmeri i givim bel long mekim wok long nambawan ples bilong kamapim ol kaikai bilong spirit, em ol i stap klin na ol i gat pasin bilong amamas. Ol tok bilong Baibel inap helpim yu tu. Ol Witnes Bilong Jehova bai amamas long soim yu olsem wanem tok bilong Baibel inap helpim yu.
[Piksa Kredit Lain long pes 31]
Niuspepa: Kisim long Naya Padkar, Gujarati Daily em Anand long India i wokim