Yu Save Long Dispela Singsing?

SAVE long wanem singsing? Em wanpela singsing bilong bipo em planti man i save laikim? Em i stret, ol singsing bilong bipo bipo tru​—⁠ol olpela singsing tru. Em wanem ol singsing? Em ol singsing bilong ol pisin.

Planti man i save lukim kala, na lukluk bilong ol pisin, na pasin bilong ol long flai, na long wokim haus, na long dispela rot ol inap save ol i wanem kain pisin. Tasol yu bin putim gut yau long singsing bilong ol pisin bilong save ol i wanem kain pisin?

I no hatwok long save long sampela pisin, long wanem, ol i no gat kain kain krai. Tingim kotkot, maski em i wanpela bilong ol pisin i gat save tru, em i no gat gutpela krai. Ol man inap luksave long en wantu tasol taim ol i harim krai bilong en olsem “kor, kor.” Pisin rook i gat nem olsem pisin i no gat gutpela krai. Narapela pisin i no gat gutpela krai em pisin whippoorwil. Taim yu harim krai bilong en long nait bai yu les tru. Krai bilong en i makim stret nem bilong en, na taim yu laik slip em bai krai i go i go na i no gat malolo bilong en.

Tasol ol pisin “marsh wren ol i narapela kain, ol inap mekim olsem 100 singsing; na ol pisin mockingbird i gat 100 i go inap 200 singsing. Wanpela pisin brown thrasher em i bin kamapim olsem 2,000 singsing”!​—⁠Nius Audubon, bilong Mas-Epril 1999.

Bilong makim hap ples bilong en na long pulim ol pisin meri, ol pisin man i save mekim singsing, tasol sampela taim ol pisin meri i save insait wantaim ol long singsing. Sampela pisin i save mekim olsem tu em ol pisin Baltimore, o Northern oriole, na pisin cardinal long Not Amerika, na ol pisin rose-breasted grosbeak.

Yu save long ol pisin i stap long hap bilong yu? Long planti kantri, ol i putim ol singsing bilong ol pisin long kaset samting na dispela inap helpim yu long save long ol pisin. Yu inap baim tu ol klok na long olgeta wanpela wanpela aua krai bilong narapela narapela pisin i save kamap. Ating kwiktaim yu bai lain long krai bilong 12-pela pisin!

[Piksa long pes 27]

Pisin Marsh wren

[Piksa long pes 27]

Pisin Rose-breasted grosbeak

[Piksa long pes 27]

Pisin Cardinal