Ol Samting i Mekim na Loida Inap Toktok

Mama bilong Loida i kamapim dispela stori

OLSEM planti mama i gat bel, mi tingting planti, olsem taim mi karim dispela bebi, em bai i gat sampela sik o bagarap long skin o nogat. Mi save, sampela taim sik o hap bagarap i stap pinis long skin bilong pikinini taim mama i karim em, tasol taim mi harim bikpela krai nogut tru bilong Loida, em namba 3 pikinini bilong mi, bel bilong mi i bagarap tru. Dokta i popaia na brukim wanpela bun long sol bilong Loida. Ol i katim em bilong stretim bun i bruk na sampela wik bihain mipela lusim haus sik. Amamas bilong mipela long kisim Loida i kam long haus i no stap longpela taim.

Insait long 2-pela mun samting, mipela kisim save olsem Loida i gat sampela bikpela sik samting long skin. Marasin bilong em i kamapim sampela hevi olsem​—⁠skin hat, pekpek wara, na sampela taim skin i guria strong​—⁠na i luk olsem marasin bilong stretim ol dispela samting i bagarapim em moa yet. I no longtaim na Loida i no inap bosim han lek samting. Bihain ol dokta i tokim mipela olsem Loida i gat wanpela sik long kru (cerebral palsy). Ol i tok, em bai i no inap wokabaut o toktok o save long toktok bilong mipela.

Ol Samting Mipela i Bin Mekim Bilong Toktok Wantaim Em

Maski ol dokta i tok olsem, mi yet mi pilim olsem Loida inap save long planti samting. Olsem na mi ritim sampela ol buk long em, na mi wok long skulim em long ABC. Tasol Loida i no inap toktok, na tu, em i no inap mekim wanpela samting bilong makim olsem em i kisim tok bilong mi. I no gat rot long save olsem em inap kisim gut wanpela tok o nogat.

Ol yia i wok long kam i go na mi gat tingting olsem wok bilong mi long skulim Loida i no helpim em tumas. Tasol mi lusim bikpela hap taim yet long ritim ol buk long em. Mipela save kisim em i kam sindaun wantaim mipela taim mipela wokim famili-stadi wantaim Noemi, em laspela pikinini meri bilong mipela, long buk Harim Tok Bilong Bikpela Tisa na buk Baibel Stori Buk Bilong Mi. a Mi ritim planti ol sapta bilong ol dispela buk planti taim long Loida.

Taim yu no inap toktok wantaim wanpela yu save laikim em tru, bai yu no stap bel isi. Taim mi kisim Loida i go long pak, em i save krai planti, na mi no inap mekim bel bilong em i stap isi. Bilong wanem em i mekim olsem? Long tingting bilong mi, i olsem bel bilong em i bagarap stret, long wanem, em i no inap ran na pilai olsem ol narapela pikinini. Wanpela taim Loida i kirap na krai nogut tru taim sista bilong em i ritim wanpela hap bilong buk bilong skul long mi. Mi save, wanpela samting i wok long bagarapim bel bilong em, tasol mi no save liklik em i wanem samting. Loida i no inap mekim ol toktok i klia, em i save mekim sampela krai tasol long nek bilong makim olsem em i gat laik long kaikai, dring wara, slip, o go long toilet.

Taim Loida i gat 9-pela krismas, em i kirap na go long wanpela skul bilong ol pikinini i mas i gat ol lain bilong lukautim ol gut. Tasol insait long 3-pela yia, ol hevi bilong em i go nogut moa. Sapos i no gat wanpela long helpim em, em i pret long wokabaut liklik, na em i no traim na kamapim sampela toktok olsem long bipo. Mi na man bilong mi i ting olsem em bai gutpela moa sapos Loida i kisim sampela skul long haus.

Insait long 6-pela yia mi wok strong long skulim Loida. Mi raitim ol leta long blakbot, na mi laik bai Loida i raitim ol dispela leta. Ol samting mi mekim i no helpim em liklik. Mi no save i gat wanem as na Loida i no inap rait​—⁠nogut em i no inap kisim save, o em i no inap bosim tupela han bilong em.

Taim Loida i gat 18 krismas, wok bilong lukautim em i givim bikpela hatwok tru long mi, olsem na mi beten strong long Jehova long helpim mi long painim rot bilong toktok wantaim em. Bekim bilong dispela beten i kam long narapela kain rot.

Rot i Op Bilong Toktok

Senis i kamap taim ol pikinini meri bilong mi i laik penim rum slip bilong mipela. Taim ol i laik rausim olpela pepa i stap long ol banis bilong rum, pastaim Noemi i raitim sampela nem long en​—⁠em sampela nem i stap long Baibel na nem bilong sampela pren na famili bilong mipela. Narapela pikinini meri bilong mi, em Rut, i askim Loida olsem nem “Jehova” i stap we long banis bilong rum; em i no save Loida inap bekim o nogat. Bilong bekim dispela askim, Loida i go na putim het bilong em klostu long nem bilong God. Bilong painimaut olsem Loida i save long ol narapela nem o nogat, Rut i givim sampela askim moa long em. Rut i kirap nogut tru taim Loida inap makim olgeta nem em i bin kolim​—⁠na sampela nem em i makim, em i no bin lukim bipo! Rut i singautim olgeta long famili long kam na lukim dispela samting. Loida i save long rit!

Bihain mipela i kamapim wanpela rot na Loida inap “toktok” wantaim mipela. Mipela i pasim ol leta ABC insait long sampela banis bilong haus. Loida i no inap bosim tumas tupela han bilong em, olsem na mipela no inap putim ol leta long samting em i ken holim long han na mekim wok long en. Olsem na taim Loida i laik toktok wantaim mipela, em bai go sanap klostu long ol wan wan leta bilong kamapim ol tok mipela ken ritim. Dispela i kisim bikpela hap taim liklik. Tru tumas, bilong kamapim planti tok liklik Loida i mas wokabaut i go i kam, inap olsem sampela kilomita, na dispela wok inap kisim sampela aua!

Maski em i bikpela wok liklik, Loida i amamas long “toktok” wantaim mipela long dispela rot. Namba wan tok em i bin kamapim long mipela i olsem: “Mi amamas tru na mi laik tok tenkyu long Jehova, nau mi inap toktok wantaim yupela.” Mipela i kirap nogut na givim askim long Loida olsem: “Yu bin mekim wanem taim yu sindaun long de olgeta?” Loida i tok em i bin tingting long ol tok em i laik mekim long mipela. Inap long 18 yia samting em i gat bikpela laik tru long toktok wantaim mipela. Em i tok olsem: “Taim Rut i kirap na go long skul, mi bin ritim buk skul bilong em. Maus bilong mi i op, tasol mi no inap kamapim ol tok yupela inap kisim. Em long dispela as na planti taim mi bin krai.”

Mi krai na tok sori long em, long wanem, mi no bin save long tingting bilong em. Loida i tok olsem: “Yu wanpela gutpela mama, i no gat wanpela taim yu bin les long helpim mi. Olgeta taim mi bin amamas long stap wantaim yu. Mi save laikim yu tru. Olsem na yu no ken krai moa.”

Kamap Strong Long Samting Bilong Spirit

Loida i gat save pinis long tok bilong Baibel, na em i bin lainim sampela ves na putim long tingting bilong em. Tasol i no longtaim na em i tokim mipela olsem em i gat laik long bekim tok long Stadi Wastaua bilong kongrigesen, em wanpela miting i gat ol askim na bekim bilong sampela tok bilong Baibel. Em bai bekim tok olsem wanem? Wanpela bilong mipela bai ritim olgeta tok bilong Wastaua ol bai stadi long en. Bihain Loida bai makim wanem askim em i gat laik long bekim. Mipela bai raitim bekim bilong em taim em i wok long kamapim long rot bilong ol leta ABC. Na long taim bilong miting, wanpela bilong mipela bai ritim bekim bilong em. Wanpela taim Loida i tokim mipela olsem: “Mi kisim bikpela amamas long bekim tok long ol miting, long wanem, mi pilim olsem mi wanpela wanwok bilong ol narapela long kongrigesen.”

Taim Loida i gat 20 krismas, em i kamapim laik bilong em long kisim baptais. Na taim mipela i askim em olsem dediket em i wanem samting, em i tok em i bin dediket inap 7-pela yia i go pinis, taim em i gat 13 krismas. Em i tok: “Mi bin beten long Jehova na tokim em olsem mi bai mekim laik bilong em i go inap oltaim oltaim.” Long Ogas 2, 1997, Loida i kisim baptais long wara bilong makim olsem em i dediket long Jehova. Long dispela taim em i tokim mipela olsem: “Mi laik tok tenkyu long Jehova, long wanem, mi inapim pinis namba wan laik bilong mi, em bilong kisim baptais!”

Loida i amamas long autim tok long Kingdom bilong God long ol wanblut na ol lain i stap klostu long haus bilong mipela. Sampela taim em i save kam wantaim mipela taim mipela autim tok long ol manmeri i stap long rot. Em i bin redim wanpela pas mipela ken lusim long haus taim i no gat man i stap. Loida i save tingim ol lapun na ol lain i gat hevi long sampela sik. Ol dokta i bin rausim lek bilong wanpela sista long kongrigesen bilong mipela. Loida i bin tokim mipela olsem: “Mi save pinis long dispela hevi olsem man i no inap wokabaut,” olsem na em i bin raitim wanpela pas bilong strongim bel bilong dispela sista. Long narapela kongrigesen i gat wanpela manki nem bilong em Jairo, na skin bilong em i dai. Taim Loida i kisim save long hevi bilong em, em i raitim wanpela pas long em. Hap tok bilong pas i tok: “I no longtaim na Jehova bai oraitim sik bilong yumi. Long Paradais bai i no gat pen na hevi i stap. Long dispela taim mitupela bai ran long wanpela resis. Nau mi lap i stap, long wanem, bai yumi kisim bikpela amamas long dispela taim. Tingim, skin bilong yumi bai gutpela tru, wankain olsem Jehova i bin wokim long pastaim​—⁠bai yumi no gat sik . . . Dispela samting i gutpela tumas a?”

Samting i Helpim Em Long Karim Hevi

Nau mi save pinis long sampela pasin bilong Loida long bipo mi bin tingting planti long en. Olsem: Loida i tokim mipela olsem em i no bin amamas taim em i pikinini yet na mipela laik holim em, long wanem, bel bilong em i bagarap stret. Em i tok olsem: “Ol sista bilong mi inap toktok na lainim ol nupela samting, tasol mi yet i no inap, na mi pilim olsem i no stret liklik. Mi belhat long dispela samting. Sampela taim mi bin ting olsem mi no laik stap laip moa.”

Pasin bilong toktok i olsem wanpela gutpela presen Loida i kisim, tasol em i gat planti hevi i stap yet. Olsem: Klostu long olgeta mun skin bilong em i guria strong na i olsem nek i pas na ol han lek bilong em i go nabaut na em i no inap bosim. Na tu, ol sik i save pinisim strong bilong em, maski em liklik kus tasol. Sampela taim Loida i save bel hevi long sik bilong em. Wanem samting i helpim em long karim hevi? Em yet i ken tokim yu:

“Beten em i bin helpim mi tru. Mi amamas long toktok wantaim Jehova na pilim olsem mi pas gut wantaim em. Mi amamas long ol brata sista long Haus Kingdom ol i save tingim mi na mekim pasin sori long mi. Maski mi gat hevi long skin bilong mi, papamama bilong mi i bin lukautim mi na ol i save laikim mi tru, na dispela em i bikpela samting tru long mi. Bai mi no lusim tingting long samting tupela sista bilong mi i bin mekim bilong helpim mi. Ol dispela leta ol i bin raitim long banis bilong rum i bikpela samting tru, long wanem, dispela i bin senisim laip bilong mi. Sapos Jehova na famili bilong mi i no bin laikim mi tru, i stap bilong mi bai i no gat as bilong en.”

[Futnot]

[Piksa long pes 12]

Loida wantaim famili bilong em