Hatwok Tru Long Painim Coelacanth
WANPELA MAN LONG KENYA I RAITIM DISPELA STORI BILONG KIRAP!
LONG Epril 2001, ol i kisim wanpela meri pis coelacanth (kolim olsem si-la-kant) long nambis bilong Kenya.a Longpela bilong dispela pis em 1.7 mita na hevi bilong en em 77 kilo. Ol i save luksave long pis coelacanth long tripela raunpela hap bilong tel bilong en na skin i blupela na i gat waitpela mak mak long en.
Bipo ol i bilip olsem dispela pis coelacanth i pinis olgeta long bipo bipo yet, na i no stap moa. Tasol long 1938 ol i painim wanpela coelacanth klostu long nambis bilong Saut Afrika. Dispela em wanpela bikpela samting tru lain bilong skelim ol animal samting i bin painim namel long 1900 i go inap 2000 na ol i kirap nogut tru long en. I kam inap long dispela taim, ol i save long dispela pis long rot bilong ol bun tasol. Kirap long namba wan taim ol i bin kisim dispela pis, ol i lukim ol narapela coelacanth klostu long hap bilong Mosambik na Madagaska. Ol i bin painim planti lain coelacanth long ol ailan Komoro.
Ol kiau bilong meri coelacanth i no save bruk insait long wara, nogat. Ol i kamapim ol kiau i save bruk insait long bel bilong mama o ol i bruk wantu tasol taim meri i rausim ol long bel. Ol i bin kisim 17 kiau—sais bilong wanpela i wankain long bal bilong pilai tenis—insait long bel bilong meri coelacanth em ol i bin kisim las yia.
Ol samting bilong solwara olsem pis coelacanth ol i litimapim ol narapela narapela pasin na gutpela tingting na save bilong Man bilong wokim ol, em God Jehova.—Song 148:7.
[Futnot]
a Dispela nem coelacanth i kam long tok Grik koilos (i gat hul long en) na akantha (bun bilong baksait), dispela tok i makim bun bilong pis long baksait i gat hul long en.
[Piksa Kredit Lain long pes 14]
Photo and drawings: Ichthyology Department/NATIONAL MUSEUMS OF KENYA