Wanpela Banis i Mekim Sampela Samting Long Ren
WANPELA MAN LONG AUSTRALIA I RAITIM DISPELA STORI BILONG KIRAP!
WANPELA taim bipo em i bin i stap olsem mak i brukim Westen Australia long hap not i go long hap saut. Taim ol i wokim pinis dispela banis long yia 1907, longpela bilong dispela banis em ol i wokim long ol diwai na waia em inap 1,833 kilomita. Em i longpela banis tru na i no gat wanpela banis long graun long dispela taim i longpela olsem dispela. Nem ol i givim long dispela banis em Namba Wan Banis Bilong Pasim Ol Rabit.
Olsem nem bilong en i makim, ol i wokim dispela banis bilong pasim planti tumas ol rabit i wok long go long sait bilong hap wes bilong Australia paslain liklik long yia 1900 samting. Long nau dispela banis i gat 100 krismas tasol planti hap bilong en i stap yet na i no bagarap. Inap sampela yia i go pinis, banis i bin i stap olsem samting ol saientis i laik kisim save long en, tasol as na ol i mekim olsem i narapela kain. I luk olsem dispela banis ol man i bin wokim i save mekim sampela samting long ren.
Paslain long yumi stori long olsem wanem na dispela banis i go antap inap long wan mita tasol em inap long mekim dispela kain samting, yumi laik kisim save long sampela stori bilong bipo long dispela banis.
Hatwok i Lus Nating
Long taim ol i wok strong long pasim ol rabit, inap 400 wokman i wok hat long yia 1901 i go inap 1907 long wokim dispela Namba Wan Banis Bilong Pasim Ol Rabit. Dipatmen bilong lain didiman bilong Westen Australia i tok: “Inap 8,000 ton ol samting bilong wokim banis em sip i karim i kam na bihain tren i karim i go long hap ol i putim ol samting long ol hos, kamel, na donki bilong pulim i go long hap ol i wokim banis long en.”
Long ol arere bilong tupela sait bilong banis, ol wokman i katim ol diwai na gras samting inap 3 mita longwe long banis. Sampela bilong ol dispela diwai ol i bin katim ol i yusim olsem pos bilong banis, na taim i no gat ol diwai, ol i baim ol pos ain. Taim ol i wokim pinis banis, em i bin pasim ol rabit, tasol em i bin stap tu olsem rot kirap long wanpela sait na i go olgeta long narapela sait bilong kantri.
Banis i stiaim ol rabit i go insait long sampela hap bilong banis we ol i no inap lusim na bihain ol i dai—banis i stap olsem traipela umben. Tasol ol rabit i bin kalapim sampela hap bilong banis. Ol i mekim olsem wanem? Taim ol i wok long i go long hap wes, ol i kalap antap long bodi bilong ol narapela rabit i bin dai na i hip i stap arere long banis, long dispela rot bikpela lain tru i kalapim banis i go hapsait. Ol i joinim tupela banis moa long namba wan banis, na ol i go long narapela hap. Olgeta dispela banis wantaim i go inap olsem 3,256 kilomita.
Banis—Mak Bilong Man i Wok Strong
I gat liklik lain tasol i save raun lukautim banis, wanpela bilong ol em F. H. Broomhall, em i bin patrol raun long dispela longpela banis. Long buk bilong em (The Longest Fence in the World), Broomhall i tok: “Wok bilong ol man i patrol raun . . . em bilong lukautim na stretim Banis na liklik rot i stap arere long en . . . , na long katim ol gras na timba long tupela sait bilong Banis [na] lukautim ol get em ol i stap longwe long narapela narapela inap 32 kilomita, na ol i mas rausim [ol rabit] i dai pinis long hap bilong Banis i stap olsem trap.”
Dispela wok bilong man long raun lukautim banis i mekim na man i stap wanpis. Em bai poroman wantaim kamel bilong em tasol. Olgeta wan wan patrol man i kisim wok bilong lukautim ol hap bilong banis i go i go inap planti kilomita. Sampela patrol man i no gat kamel bilong raun long en, long wanem, ol i mas mekim wok bilong ol na raun long dispela rot nogut long baiskol tasol. Long nau ol man i raun long ol foa wil trak bilong lukautim ol hap bilong banis i stap yet.
Hatwok i No Lus Olgeta
Tru banis i no pinisim hevi bilong i gat planti tumas rabit, tasol em i helpim wok bilong pasim narapela samting i stap long Australia na i kamapim hevi, em wanpela pisin kain olsem muruk. Long 1976 winim 100,000 bilong ol dispela traipela pisin i no inap flai ol i kirap na go long hap wes bilong banis we graun i gutpela bilong kamapim kaikai. Banis i pasim ol long i go, na ol man i kilim i dai 90,000 bilong ol dispela pisin, dispela i mekim na ol kaikai ol man i bin planim long dispela yia i no bin bagarap.
Long taim bilong dispela hevi, ol i bin strongim o lainim gut gen 1,170 kilomita bilong dispela banis bambai em i ken lukautim ol fam bilong Westen Australia long ol muruk na weldok. Olsem na dispela banis i stap olsem mak. Long hap is em ples bus nating bilong Australia. I go long hap wes em ol bikpela hap graun ol man i wokim gaden long en.
Samting Ol i No Tingim i Kamap
Ol samting i kru long tupela sait bilong banis i narapela narapela, ating dispela em i as na dispela banis inap mekim sampela samting long ren. Wanpela saiens magasin (The Helix) i tok: “Ol man i kirap nogut long bikpela ren i save pundaun long hap is winim long bipo na i no gat planti ren i save pundaun long hap wes bilong banis olsem bipo.” Olsem na oltaim bus long hap is i save kisim wara, tasol ol fama long hap wes i mas putim ol paip bilong pulim wara i go long ol gaden. Dispela magasin i kamapim wanpela as na ol i ting dispela senis i kamap, na i tok: ‘Long wes Australia ol kaikai samting ol i planim, rop bilong ol i no go insait tru long graun na ol i no save lusim planti wara i go long win. Tasol rop bilong ol samting i kru long bus long hap is i save go insait tru long graun na i lusim planti wara i go long win.’
Profesa Tom Lyons i stori long narapela as bilong dispela senis na i tok: “Mipela i ting olsem ol bus i kamap nating, kala bilong ol lip samting bilong ol i tudak moa long ol samting man i planim, olsem na em i save wokim planti hat i go long win na dispela i kirapim strongpela . . . win na win i helpim wok bilong kamapim ol klaut long skai.”
Ating dispela Namba Wan Banis Bilong Pasim Ol Rabit i no bin helpim ol fama bilong Westen Australia long hevi bilong i gat planti tumas ol rabit, tasol ol samting em i mekim long ren na skul man i kisim olsem i gutpela long skelim ol samting bai kamap bihain taim ol i mekim ol samting bilong lukautim graun, ating em i bikpela samting bai helpim ol long bihain.
[Mep long pes 18, 19]
Namba Wan Banis Bilong Pasim Ol Rabit
[Piksa long pes 19]
Ol rabit
[Piksa long pes 19]
Patrol raun long yia 1908 samting
[Piksa long pes 19]
Ol bikpela pisin i kain olsem muruk
[Piksa long pes 19]
Ol i wokim Namba Wan Banis Bilong Pasim Ol Rabit i go longpela inap 1,833 kilomita na long taim ol i wokim i no gat narapela banis long graun i longpela olsem dispela. Banis i stap olsem mak i brukim ples i stap olsem bus na ol graun bilong wokim gaden, olsem na em i mekim sampela bikpela samting long ren
[Ol Piksa Kredit Lain long pes 19]
All color pictures: Department of Agriculture, Western Australia; top center: Courtesy of Battye Library Image number 003582D