Ol i Kisim Tok Lukaut Taim Ol i Ritim Kirap!
OL MAN i save ritim Kirap! long olgeta taim ol i save amamas long ol stori bilong en. Tasol wanpela stori, nem bilong en “Traipela Biksi—Ol Stori Nating na Ol Trupela Tok Bilong En,” long Kirap! bilong Epril-Jun, 2001, i bin helpim gut tupela marit bilong Jemani em ol i go malolo long Khao Lak, Tailan, long Disemba 2004.
Nius Frankenpost (Selber Tagblatt) bilong Jemani i kamapim stori bilong tupela, olsem: “Roswitha Gesell i tok: ‘Mipela i bin subim wara.’ Bihain long ol i subim wara, tupela i bin go long hotel bilong senisim klos bilong ol. Reiner Gesell i stori long narapela kain samting i bin kamap: ‘Tenpela minit bihain mitupela i go bek long nambis, na mipela i lukim olsem solwara i drai i go olgeta.’ Kirap long nambis i go inap long rip, em longwe inap 7-pela kilomita, ol man inap lukim wesan tasol. ‘Olgeta man i bin subim wara, solwara i karim ol i go.’ Tupela marit i bin abrusim bagarap, long wanem, ol i bin ritim stori long nius Kirap!” Stori bilong dispela Kirap! i kamapim olsem planti taim paslain long sunami i kamap solwara i save drai i go bek.
Nius i tok moa: “Taim tupela marit i lukim traipela biksi i stap longwe, ol i tanim na ran i go bek. Reiner Gesell i tingim bek olsem wara i solap i go antap inap 12 i go 15 mita. Wanpela samting nogut tru em i tingim yet em ol narapela turis i sanap tasol na lukluk i go long solwara. ‘Ol i stap tasol. Mi singaut long ol i mas ran i go long ples hait, tasol i no gat wanpela i mekim olsem.’ Klostu olgeta bilong ol i bin bagarap.”
Long ol samting i painim tupela marit, niuspepa i tok moa: “Ol i Witnes Bilong Jehova, na long taim bilong malolo ol i bin bung wantaim kongrigesen, em i stap longwe long Khao Lak inap olsem 140 kilomita. Taim ol wanbilip bilong ol i harim toksave long bikpela hevi i bin kamap, olgeta manmeri bilong kongrigesen i bin go long Khao Lak bilong painim ol.”
Nau tupela marit i stap gen long Jemani, na ol i amamas tru long ol gutpela tok i stap long Kirap! Na ol i tenkyu tru long ol manmeri long Tailan em ol i bin helpim ol, na ol i amamas moa yet long ol brata spirit bilong ol, em ol i bin bihainim pasin Kristen bilong laikim tru narapela!