Em i Kirapim Yangpela Man Long Skelim Wokabaut Bilong Em
◼ Long yia i go pinis wanpela yangpela man i salim pas long brens ofis bilong ol Witnes Bilong Jehova. Em i stori olsem bubu meri bilong em i bin givim em buk Nambawan Man Tru i Winim Olgeta Narapela Man. Em i tok: “Mi putim dispela buk long kabot.” Tasol i no longtaim i go pinis em i sik nogut tru, na em i ting olsem em bai dai.
Em i tok: “Wanpela samting i kirapim mi long kisim dispela buk na ritim. Mi gat tupela tingting tasol mi kirap ritim tasol. Taim mi pinis ritim, mi save olsem pasin mi save mekim em i no stret. Mi kirap long beten long God.”
Em i tok olsem: “Taim sik bilong mi i pinis, mi ritim buk namba tu taim. Mi kirap nogut olsem i gat sampela nupela samting yet mi lainim. Mi kisim save olsem, tru yumi mas beten na ritim ol buk bilong Baibel, tasol i gat sampela samting moa yumi mas mekim. Bikpela samting em olsem, yumi mas givim laip bilong yumi long God na helpim ol narapela long bilip long em. Tok piksa bilong Jisas long wokboi i kisim mani i lainim mi olsem, yumi mas wok strong long mekim wok bilong Kingdom Bilong God i go bikpela.”—Luk 19:13-27.
Long pinis bilong pas em i tok: “Mi laik tok tenkyu long ol Witnes Bilong Jehova long dispela gutpela buk em i bin senisim pasin bilong mi. Mi laik kisim sampela save moa na stadi long Baibel. Tasol bikpela laik tru bilong mi em long mekim wok bilong God long laip olgeta bilong mi, na helpim ol narapela long bilip long em.”
Buk Nambawan Man Tru i Winim Olgeta Narapela Man i stori long ol tok bilong Jisas, na ol tok piksa na ol mirakel em i bin mekim. Ol i raitim ol stori i bihainim stret ol taim ol samting i bin kamap, wanem samting i kamap pastaim na wanem samting i kamap bihain. Ol piksa long buk i kamapim ol tingting na ol samting em Jisas na ol man i stap long taim bilong em ol i save pilim.
Sapos yu laik kisim dispela buk i gat 448 pes long en, raitim nem na atres bilong yu long dispela hap na salim long atres daunbilo, o long atres i stret long yu em i stap long pes 5 bilong dispela nius.
□ Salim wanpela buk Nambawan Man Tru i Winim Olgeta Narapela Man long mi.
□ Plis kam lukim mi, mi laik stadi long Baibel, no gat pe.