Ol i Helpim Ol Kalabusman Long Meksiko
Dispela stori i kam long Meksiko
WANPELA as na ol i save putim ol kriminal long kalabus, em bilong helpim ol long senisim pasin bilong ol. Tasol dispela samting tasol i no inap stretim pasin bilong ol. Tingting na bel bilong kalabusman i mas kirapim em long senis, na em i mas bel hevi long ol rong bipo em i mekim na em i mas i gat laik long senisim pasin bilong em. Long planti kalabus long olgeta hap bilong graun, sampela kalabusman i bin senisim tru pasin bilong ol long rot bilong wanpela program bilong skul long Baibel ol Witnes Bilong Jehova i save mekim. Yumi ken skelim program bilong ol long Meksiko.
Ol Witnes Bilong Jehova i save visitim 150 haus kalabus long Meksiko we ol i wokim wanpela program bilong ritim Baibel na skul long ol stretpela pasin na ol tok bilong Baibel. Long haus kalabus long Ciudad Juárez, Chihuahua, ol Witnes Bilong Jehova i save autim tok long 1,200 kalabusman. Ol kalabusman i save rispek long ol, na lukautim ol tu taim hevi i kamap. Wanpela taim pait i kirap long dispela kalabus na sampela kalabusman, em ol narapela i save pret long ol, ol i pasim ol lain i pait na larim ol Witnes i lusim haus kalabus na abrusim hevi.
Planti kalabusman na ol bos bilong kalabus ol i laikim Kirap! bilong Julai-Septemba 2001, i stori long “Ol Kalabusman Inap Senis?” Long haus kalabus long San Luis Río Colorado, Sonora, 12-pela Witnes i tilim 2,149 bilong dispela Kirap!
Taim ol Witnes Bilong Jehova i lukim olsem i gat sampela kalabusman i gat laik tru long kisim save long Baibel, ol i save go olgeta wik bilong skulim ol long Baibel na mekim ol miting bilong lotu. Olsem wanem? Dispela program bilong skul long Baibel i bin helpim ol long senisim pasin bilong ol?
Ol i Autim Tok
Jorge i kamap kriminal taim em i no winim yet 20 krismas. Taim em i pinisim 13 yia bilong em long kalabus long Islas Marías, ol i larim em i go fri. Tasol i no longtaim na em i kirap gen long wok bisnis long drak. Em i holim gan na kamap wanpela kilman em ol man inap haiarim em bilong kilim ol narapela i dai. Taim ol man i tokim em long kilim wanpela man i dai, em i mekim tasol. Em i kilim 32 man. Em i kalabus gen na bihain ol loya bilong em i tokim em olsem ol bos bipo em i bin wok long ol i redi long lusim bikpela mani bambai em i ken lusim kalabus. Ol i laik bai em i kilim i dai wanpela man. Tasol Jorge i kirap pinis long stadi long Baibel wantaim ol Witnes Bilong Jehova na em i kamap strong long ol samting bilong spirit. Em i kisim baptais pinis na i save autim tok fultaim long kalabus. Em bai mekim wanem? Em bai orait long kamap fri na mekim wok bilong ol bikman bilong wok bisnis long drak o em bai stap yet long kalabus na mekim wok bilong Jehova? Jorge i tok: “Mi bai stap long kalabus na karim hevi bilong ol pasin nogut mi bin mekim. Nau mi save mekim wok bilong Bikpela King, God Jehova.” Jorge i stap gut long God, na taim em i dai, em i gat tingting olsem em inap kirap bek. Ol Baibel sumatin long kalabus i save stori long em olsem, “Em i ‘save long tok tru na dispela tok tru i bin mekim em i kamap fri.’ ”—Jon 8:32.
Ol i makim 110 yia long David i mas stap long kalabus. Em i bin stil, kilim man i dai, na holimpas sampela man na kisim i go. Ol i putim em long wanpela hap long kalabus we i gat planti gad i was. Long kalabus em i kirap stadi long Baibel wantaim ol Witnes Bilong Jehova na em i mekim planti bikpela senis long laip bilong em, olsem na ol bosman bilong kalabus i orait long em i ken go long wanpela miting ausait long dispela hap wantaim wanpela gad. Pasin bilong em i stret nau wantaim ol tok bilong Baibel, olsem na em i insait long wok autim tok na em i gat 8-pela Baibel stadi long dispela hap bilong kalabus i gat planti gad. Famili bilong em ol i amamas tru long ol senis em i mekim, olsem na ol i save go long em bambai em i ken stadi wantaim ol long Baibel. Devit i tok: “I no gat wanpela taim mi les long tok tenkyu long Jehova long em i bin helpim mi long kamap fri long sait bilong spirit.”
Program bilong ol Witnes Bilong Jehova long skulim ol kalabusman long Baibel, dispela i bin mekim na 175 kalabusman long 79 haus kalabus long Meksiko, em ol i bin senisim pasin bilong ol, ol i insait long wok autim tok, na 80 bilong ol i baptais pinis. Ol i mekim 703 Baibel stadi wantaim ol arapela kalabusman. Na tu, inap 900 kalabusman i save kam long ol miting Kristen i save kamap insait long ol haus kalabus
Ol Bikman i Amamas Long Wok Bilong Ol
Ol bikman bilong kalabus i luksave long wok ol Witnes Bilong Jehova i mekim. Ol bikman long kalabus long Tekax, Yucatán, i bin givim wanpela setifiket long ol i tokaut long “ol gutpela wok ol i bin mekim bilong helpim” ol kalabusman long yia 2002.
Taim program bilong skulim ol man long Baibel i bin kirap nupela long dispela kalabus, i gat planti gad i was i stap taim ol i mekim miting bilong ol. Tasol bihain, taim ol i lukim pasin bilong ol i senis, ol gad i stat long rispektim ol, olsem na ol i putim wanpela gad tasol bilong was.
Haus kalabus long Ciudad Juárez i gat wanpela Haus Kingdom. Ol bikman i orait long ol i kisim sampela plang samting i kam insait long haus kalabus na stretim wanpela olpela haus na mekim i kamap wanpela ples bilong lotu. Ol 13 kalabusman i baptais pinis wantaim ol kalabusman em ol i Baibel sumatin bilong ol, ol i mekim dispela wok konstraksen. Dispela haus i gat maikrofon na spika, na toilet, na ol gutpela sia inap 100 man i ken sindaun long en. Inap 50 man i save kam long ol 5-pela miting ol i save mekim long olgeta wik.
Tru tumas, man inap senisim pasin bilong em long rot bilong skul long Baibel. Olsem Manase long Baibel—em wanpela king bilong Juda i bin mekim bikpela rong na i stap kalabus long Babilon—em i tanim bel na beten askim God long lusim rong bilong em, ol kalabusman long nau tu inap senisim pasin bilong ol na kamap man i save aninit na pret long God.—2 Stori 33:12, 13.
[Piksa long pes 30, 31]
Baptais insait long haus kalabus
[Piksa long pes 30, 31]
Ol kalabusman i autim tok fultaim na ol tisa bilong ol long Skul Bilong Wok Painia insait long kalabus