Bea Bilong Wara i No Save Bagarap Kwik
DISPELA STORI I KAM LONG JAPAN
◼ SAPOS yu lukluk long olgeta hap bilong graun i gat wara—ples i gat gras olsem mosong, ais, ol liklik wara i ran, hatwara i kamap insait long graun, ol raunwara, solwara, o long banis bilong yu yet—ating yu inap painim wanpela kain liklik snek i no save bagarap kwik ol i kolim bea bilong wara. Em i liklik tru na i hatwok long lukim, na sotpela bodi bilong en i gat fopela hap bilong en na i gat wanpela skin i karamapim. Em i gat 8-pela han, na ol wan wan han i gat pinga olsem huk.
Ol dispela liklik snek i save wokabaut isi isi tru. I gat kain kain, inap sampela handet, na ol meri i save putim 1-pela i go inap 30 kiau long wanpela taim. Sapos yu kisim hap wesan o graun malumalum long han bilong yu, bai yu inap painim planti tausen ol i stap. Gutpela ples bilong painim ol, em long grinpela mosong i save kamap long rup bilong haus.
Maski taim nogut tru i painim ol dispela liklik snek, ol inap i stap laip yet. Buk Encyclopædia Britannica i tok: “Ol i bin putim sampela long botol samting i no gat win long en, na bihain inap 3-pela de ol i stap insait long ges helium i no hat, na bihain long en ol i putim long ples i kol nogut tru olsem ais, mak bilong en -272°C, tasol taim ol i putim ol long ples i hat liklik olsem insait bilong haus, ol i kirap bek.” Na maski ol i putim ol long X-rei i gat bikpela strong moa, inap long kilim man i dai, ol i winim dispela tu. Na ol man i ting ol inap i stap laip inap sampela haptaim long ples antap tru, olsem long hap bilong mun samting.
As bilong dispela, em ol inap mekim na ol samting long bodi bilong ol i olsem i no wok, na i olsem bodi i dai i stap. Bilong mekim olsem, ol i save pulim ol han bilong ol i go insait long bodi, na i gat wanpela kain suga i kamap long skin bilong senisim wara i bin lus, na ol i brukim bodi i kamap olsem liklik bal na i gat wanpela kain gris olsem gris kandel i kamap long skin. Orait taim i gat liklik wara i kamap long graun samting ol i stap long en, ol i save kirap gen insait long sampela minit o sampela aua. Wanpela taim ol dispela liklik snek ol i kolim bea bilong wara ol i bin i dai i stap inap 100 yia, na ol man i kirapim ol gen!
Tru tumas, long pasin i narapela kain tru na yumi kirap nogut long en, ol dispela liklik samting tru bilong graun ol i save litimapim nem bilong Jehova.—Song 148:10, 13.
[Piksa Kredit Lain long pes 23]
© Diane Nelson/Visuals Unlimited