Gutpela Samting Tru Bilong Laip—Wara

JISAS i tokim wanpela meri Samaria i wok long pulimapim wara long hulwara long wanpela wara i kamap oltaim na bai i givim em laip i stap gut oltaim oltaim. (Jon 4:​14) Dispela wara Jisas i toktok long en em i olsem tok piksa, tasol wara bilong dring em tu i bikpela samting bilong laip, oksijen tasol i stap namba wan na wara i stap namba tu long en. Man inap i stap laip maski em i no kaikai inap sampela wik, tasol sapos em i no dring wara, em inap i stap laip 5-pela de tasol!

Klostu olgeta hap bilong bodi bilong yumi em wara. Olsem: Kru bilong yumi em 75 i go 85 pesen wara, na ol masol em 70 pesen. Wara i save helpim bodi long kisim kaikai na mekim gutpela wok long en na karim ol gutpela samting bilong kaikai i go long ol sel. Wara i save rausim ol marasin nogut na ol narapela pipia long bodi, em i helpim ol skru na rop bilong bel na i helpim bodi long i no ken hat tumas o kol tumas. Tasol olsem wanem? Yu save olsem pasin bilong dring planti wara em i wanpela rot bilong lusim skin?

Dring Wara Bilong Lusim Skin

Namba wan samting, wara i no gat kalori o gris o kolestrol, na i no gat planti sodiam. Namba tu, wara i save daunim laik bilong kisim kaikai. Namba tri, wara i save helpim bodi long rausim gris i stap long bodi. Em i mekim olsem wanem? Taim ol kidni i no gat wara, ol i no inap wok gut. Orait nau lewa i mas helpim wok bilong kidni, tasol taim lewa i mekim olsem, dispela i pasim strong bilong lewa long rausim gut gris. Gris i stap insait long bodi na dispela i mekim skin i go patpela. Olsem na Dokta Donald Robertson bilong Southwest Bariatric Nutrition Center long Scottsdale, Arizona, U.S.A., i tok: “Pasin bilong kisim planti wara em namba wan rot bilong lusim skin. Sapos ol manmeri husat i traim long lusim skin i no dring planti wara, bodi bilong ol i no inap rausim gut gris i stap long en.”

Tru, taim wara i pulap long bodi, dispela inap mekim hevi bilong bodi i go bikpela. Olsem na planti manmeri husat i gat dispela hevi i ting rot bilong stretim em ol i mas dring liklik wara tasol. Tasol dispela i no stret. Taim bodi i no gat planti wara, orait bodi i save holim wara em man i dringim na i putim long ol hap olsem lek, na han. Olsem na ol saveman bilong skelim kaikai i ting i gutpela yumi givim bodi bilong yumi samting em i mas i gat​—⁠planti wara. Na tingim, sapos yu kaikai planti sol, bodi i mas i gat planti wara bilong daunim strong bilong sol.

Givim Wara Long Bodi Bilong Yu

Long olgeta de, bodi i save lusim averes mak bilong wara olsem 2-pela lita long rot bilong skin, waitlewa, rop bilong bel, na kidni. Yumi save lusim hap lita wara long rot bilong pulim win i kam aut. Sapos yumi no kisim sampela wara moa, bodi bilong yumi bai sot tru long wara. Sampela mak bilong bodi i sot tru long wara i olsem: het i pen, skin i les, pen i kamap long ol masol, kala bilong pispis i tudak, yu no gutpela long stap long san, na maus na ai i drai.

Olsem na hamas wara yumi mas dring? Dokta Howard Flaks, em i saveman bilong skelim skin i patpela, i tok: “Man i mas dring 8-pela i go 10-pela glas wara long olgeta de. Em i mas kisim planti wara moa sapos em i mekim planti eksasais o em i stap long ples hat. Na ol man skin bilong ol i patpela tru i mas dring planti wara moa.” Tasol sampela long nau i tok olsem sapos yu dring wara taim nek bilong yu i drai, em inap. Tasol sapos nek bilong yu i drai tru long kisim wara, ating bodi bilong yu i sot pinis long wara.

Olsem wanem? Ol narapela kain dring inap kisim ples bilong wara? Wara bilong kumu sayor samting na prut em ol i tanim wantaim wara, i gutpela, tasol ol i gat kalori long en. Na tu, ol dring i gat planti suga na susu long en bai i mekim na bodi i laikim moa wara, long wanem, i mas i gat wara bilong bel i ken mekim wok long ol. Na ol dring i gat alkohol na kafin olsem long kofi na ti inap mekim na bai yu go pispis klostu klostu, olsem na yu mas dring planti wara moa long senisim wara yu lusim. I no gat wanpela samting i olsem senis bilong dispela gutpela samting tru, em wara. Orait, olsem wanem? Yu laik dring wanpela glas wara nau?

[Blok/Piksa long pes 12]

Sampela Tok Bilong Helpim Yu Long Dring Moa Wara

● Karim wanpela botol wara.

● Dring wanpela glas wara long taim yu kaikai.

● Dring wara paslain long eksasais, long taim bilong eksasais, na bihain long en.

● Long taim bilong malolo bilong dring kofi​—⁠dring wara.

● Bilong mekim na yu ken i gat laik long dring wara long tep, yu ken putim wara bilong pait muli o sipim wara.

[Piksa Kredit Lain long pes 12]

Photo: www.comstock.com