Wara na Skin Bilong Yu

WANPELA nius (Health) i tok: “Yu no ken ting taim nek i drai, dispela bai tokim yu long hamas wara skin bilong yu i mas kisim.” Tasol pasin bilong dring planti wara, em i bikpela samting bilong helpim skin na bel long i stap isi. Olgeta taim wara long skin bilong yumi i save lus taim yumi tuhat, na krai, na pispis, na taim yumi pulim na rausim win. Yumi mas kisim sampela wara bilong inapim dispela wara i lus. Skin i mas kisim hamas wara? Planti saveman i tok, i gutpela long dring 8-pela glas wara​—⁠olsem 2-pela lita​—⁠long olgeta de.

I gat wanem as na yumi mas dring planti wara olsem? Wara i bikpela samting bilong karim ol gutpela marasin samting i go nabaut insait long skin bilong yumi na i rausim ol pipia bilong bodi tu. Em i gat bikpela wok long bosim hat bilong skin na skin i no ken hat tumas o kol tumas, na wara i welim olgeta skru bilong han na lek. Nius Health i tok: “Maski skin i sot liklik tasol long wara, skin bilong yu inap les . . . o sik. Taim wara i pinis long skin dispela i as na skin bilong planti man i les olgeta, tasol ol man i no save long dispela samting.” Dispela nius i tok: “Yumi no ken kisim tingting kranki na ting kopi na ti, na loliwara i gat marasin kafin long en, na bia samting ol i gat wara, olsem na ol dispela em inap long yumi; ol dispela samting i save mekim skin i sot long wara.” Ol samting i gat marasin kafin long en na bia samting, dispela i save mekim na skin i gat laik long pispis klostu klostu, olsem na wara i lus long skin.

Na tu, “skin bilong yu i mas i gat wara insait long en bilong em i no ken i go strong na em bai malumalum.” Bilong helpim skin long i stap olsem, yu inap putim sampela kain wel long en. Tasol wel samting i no save givim hap wara moa long skin. Nogat. Wok bilong en em bilong lukautim skin na wara i stap pinis insait long skin i no ken lus. Skin i gat wara, em i bikpela samting taim yumi kisim bikpela krismas, long wanem, taim yumi wok long go lapun liklik, skin bilong yumi bai lusim sampela strong bilong en bilong holim wara.

Sori tru, long planti hap bilong graun, ol i mas hatwok tru bilong painim gutpela, klinpela wara. Tru, em i hatwok, tasol hatwok bilong ol i no lus nating. Olsem na i gutpela long dring planti wara, na bihainim dispela rot bilong mekim skin bilong yu i stap gutpela na bai yu amamas long yu yet!