Baibel i Tok Wanem Long Hevi Bilong Wara i No Klin i Kamap Long Olgeta Hap Bilong Graun?
Yumi olgeta i nidim klinpela wara. Tasol UN Secretary-General António Guterres i mekim dispela tok lukaut olsem: “Long olgeta hap bilong graun ol man i nidim wara na dispela namba i wok long i go antap moa, olsem na yumi inap bungim bikpela hevi tru bilong wara i sot.” Planti bilion manmeri long olgeta hap bilong graun i hatwok tru long kisim klinpela wara bilong dring long en.
Strdel/AFP via Getty Images
I gat wanpela taim bai kamap na yumi bai i gat inap wara bilong olgeta manmeri? O oltaim yumi bai karim hevi bilong wara i sot o wara i no klin? Baibel i tok wanem?
Tok promis Baibel i mekim long saplai bilong wara
Baibel i tok promis olsem wanpela taim bai kamap we hevi bilong wara i sot bai pinis olgeta. Long dispela taim, bai i gat planti wara i klin na i fres.
“Ol wara bai sut i kam aut long ples nating, na ol hanwara bai ron long ples drai nating. Graun i hat na drai nogut tru bai kamap raunwara, na graun i no gat wara, ol hanwara bai ron.”—Aisaia 35:6, 7.
Wai na yumi ken bilipim dispela tok promis bilong Baibel? Tingim tok Baibel i mekim long hau God i disainim Graun.
Tok Baibel i mekim long Graun na raun bilong wara
“[God] i no wokim graun bilong i stap nating, nogat, em i wokim bilong ol samting i ken stap long en.”—Aisaia 45:18.
God i wokim graun bilong sapotim ol samting i gat laip, olsem na em i disainim gut raun bilong wara bilong kamapim planti fres wara.
“[God] i save mekim wara i go antap long skai. Na wara i kamapim ol klaut na i tanim i kamap ren. Orait ren i save lusim ol klaut na i pundaun. Em i pundaun antap long ol manmeri.”—Jop 36:27, 28.
Yumi ken tok olsem, dispela skripsa i kamapim klia olsem God i disainim gut raun bilong wara na bai wara i ken klinim em yet na saplaim fres wara long olgeta taim. Wara i save lusim graun na solwara na i go antap olsem smok, tanim i kamap wara gen na pundaun i kam daun olsem ren. Oltaim dispela samting i save kamap na dispela i kamapim wara i klin na i fres bilong ol manmeri na ol animal i ken dring.—Eklisiastis 1:7; Amos 5:8.
“Orait bai mi mekim ren i kam daun long taim bilong ren, na planti kaikai bai kamap long graun, na ol diwai bai karim ol prut.”—Wok Pris 26:4.
God i tok promis long blesim ol Israel bilong bipo—ol i lain bilong wok gaden—long rot bilong mekim ren i pundaun long olgeta taim na bai planti kaikai i kamap long gaden bilong ol. Em i save olsem bilong kaikai i ken kamap, ren i mas pundaun long taim stret.
Klostu nau God bai mekim wankain samting long graun olgeta olsem em i bin mekim long ol Israel bilong bipo. (Aisaia 30:23) Tasol long nau yet, long planti hap bilong graun, hevi bilong wara i wok long i go bikpela moa bikos ren i no save pundaun, na i gat ol narapela risen tu. Wanem narapela tok Baibel i mekim long pinisim hevi bilong wara long nau?
Rot bilong pinisim hevi bilong wara
Baibel i tokaut olsem long rot bilong Kingdom bilong em, God bai pinisim ol hevi i wok long bagarapim Graun, dispela i makim tu hevi bilong wara i no klin i kamap long nau. (Matyu 6:9, 10) Kingdom Bilong God em wanpela gavman i stap long heven na em bai bosim dispela graun. (Daniel 2:44; Revelesen 11:15) Moa yet, Kingdom Bilong God bai mekim samting em ol gavman bilong nau i no inap long mekim—em bai pinisim tru ol samting i save kamapim hevi bilong wara.
Hevi: I gat planti samting i kamapim bikpela senis long raun bilong wara na wanpela em senis long klaimet. Na dispela i kamapim ol hevi olsem taim bilong bikpela san na bikpela tait wara we i kamap bikos bikpela ren tru i pundaun o mak bilong solwara i go antap.
Rot bilong stretim: Kingdom Bilong God bai stretim bek olgeta samting long envairomen we i bagarap na bai Graun i ken kamap gutpela gen. God i tok promis olsem: “Harim! Mi mekim olgeta samting i kamap nupela.” (Revelesen 21:5) Fres wara bai pulap long ol ples em graun i drai, na ol plaua na diwai samting bai gro long ol hap em nau ol i no stap long en. (Aisaia 41:17-20) Na tu, Kingdom Bilong God i stap aninit long wok bos bilong Jisas Krais bai kontrolim win na ren samting.
Taim Jisas i stap long graun, em i mekim i dai strongpela win na dispela i helpim yumi long luksave long liklik hap tasol bilong strong God i givim long em. (Mak 4:39, 41) Taim Krais i mekim wok king long Kingdom Bilong God, bai i no gat moa ol netrol disasta. Ol manmeri bai stap seif na bel isi tru, na ol bai i no inap pret long ol disasta samting.
Hevi: Ol bisnis lain i gat gridi pasin na ol man em ol i no tingim ol hevi inap kamap long ol disisen ol i mekim, ol i mekim na polusen i bagarapim ol riva, ol raunwara, na ol hulwara i stap aninit long graun, dispela i mekim na i no gat inap saplai bilong klinpela wara.
Rot bilong stretim: God bai klinim graun na stretim bek ol bagarap i kamap long ol riva, ol raunwara, ol solwara, na long graun. Graun bai kamap wanpela paradais. Long rot bilong poem, Baibel i tok: “Ples nating na ples em graun i drai, ol bai amamas, na ples drai nating bai amamas na ol plaua bai karamapim ples olsem plaua safron.”—Aisaia 35:1.
Wanem samting bai painim ol man em ol i no tingim envairomen na ol narapela manmeri? God i tok promis long “bagarapim ol man i wok long bagarapim graun.”—Revelesen 11:18; Provep 2:21, 22.
Hevi: Ol man i mekim nabaut long wara saplai na ol i no yusim gut, olsem na ol i westim planti moa wara winim mak bilong wara em graun i save kamapim.
Rot bilong stretim: Yumi amamas olsem long rot bilong Kingdom, laik bilong God—i no laik bilong ol manmeri em ol i gat pasin gridi—bai “kamap long graun.” (Matyu 6:9, 10) Kingdom Bilong God bai givim gutpela skul tru long ol manmeri i daun long en. Aisaia 11:9 i tok: “Graun bai pulap long save bilong Jehova.”a Ol manmeri bai i gat save bilong God, na tu, ol bai laikim tru God na olgeta kriesen bilong em, na dispela bai kirapim ol long lukautim gut Graun em naispela planet bilong yumi na ol samting i stap long en.
Bilong kisim sampela save moa long Kingdom Bilong God bai mekim wanem, lukim atikol “Kingdom Bilong God Bai Mekim Wanem?”
Ritim sapta 35 bilong Buk Aisaia long Baibel bilong kisim save long olsem wanem graun bai kamap wanpela paradais.
Lukim vidio Bilong Wanem God i Wokim Graun? bilong kisim sampela save moa long samting God i tingting pinis long mekim long dispela graun na long ol manmeri.
a Jehova em nem bilong God. (Buk Song 83:18) Lukim atikol “Jehova Em i Husat?”