Liklik Blakbokis Tru
● Long 1973, saveman bilong Tailan em Kitti Thonglongya na ol wanwok bilong em, ol i kisim 50 blakbokis em ol i no bin save long en, long keiv klostu long wara kalap bilong Sai Yok long Tailan. Em i salim sampela bilong ol dispela pisin i go long saveman J. E. Hill long British Museum of Natural History long London. Sori tru, Kitti i dai paslain long em i kisim save olsem em i bin painim wanpela kain blakbokis em ol man i no bin save long en bipo; Hill i givim nem Craseonycteris thonglongyai, long en bilong tingim bek wok bilong Kitti. Long nau ol man i save kolim long dispela nem Kitti’s hog-nosed.
Longpela bilong blakbokis em 30 milimita na longpela bilong wing bilong en em 13 sentimita. Kitti’s hog-nosed blakbokis em wanpela blakbokis i liklik tru. Em i liklik tru, olsem na sampela taim ol i kolim em binen blakbokis. Sampela narakain samting long dispela blakbokis em olsem: nus bilong en i luk olsem bilong pik, em i no gat tel, em i gat traipela yau na i gat hap skin i solap na karamapim hul bilong yau.
Liklik Hap Em i Stap Long En
Ol dispela blakbokis i stap tasol long Sai Yok Nesenal Pak long Tailan na long sampela hap bilong Mianma. Olsem ol arapela blakbokis, Kitti’s hog-nosed blakbokis i save bihainim krai o pairap bilong ol binatang taim ol i painim kaikai bilong ol. Ol i gat longpela wing, olsem na ol inap flai i stap na pulim binatang long lip bilong ol diwai. Ol i save slip long ol keiv insait long ston antap tru we i gat planti rum—em ol ples we i seif na i hot liklik bambai ol dispela liklik blakbokis i no ken pilim kol. Tru tumas, Man Bilong Wokim ol samting i givim narakain tingting na pasin long ol dispela liklik animal!—KTH 4:11.
Kitti’s hog-nosed blakbokis ol i liklik lain tru, na ol i stap long wanpela liklik hap tasol. Olsem na ol inap i dai na pinis olgeta sapos ol samting long i stap bilong ol i no kamap gutpela. Ol man i bin mekim sampela samting bilong lukautim gut ol dispela blakbokis, tasol pasin bilong katim diwai na bus samting, wokim rot, na wok turis i wok long bagarapim ol. Ol man i wok long bagarapim hap em ol dispela blakbokis i stap long en, olsem na yumi no save sapos ol inap abrusim bagarap o nogat.
[Blok/Piksa long pes 30]
TRAIPELA TRU NA LIKLIK TRU
I gat olsem 1,000 narapela narapela kain blakbokis. Traipela blakbokis (1), ol i kolim flying fox, wing bilong en i longpela inap 1.5 mita na hevi bilong en inap olsem 1 kilogram. Taim yumi skelim wantaim Kitti’s hog-nosed blakbokis (2) longpela bilong wing bilong en em 13 sentimita na hevi bilong en inap olsem 2 gram tasol.
[Piksa Kredit Lain long pes 30]
Photos: © Merlin D. Tuttle, Bat Conservation International, www.batcon.org